Yesaia 65
65
1“Lídie lɛlɔ lɛ́tina bekyuli
bani na béteye-mi lili.
Na bekyuli bani na bátawia-mi kama ulu bánu-mi.
Na kadi bani bekyuli nátakpali-mi lɛnyi kudii ni,
lɛ́su-ma nnini, ‘Bɛɛnu-mi mɛni, nnye mɛni.’
2Lídie mina enu nnye limeyi limodi
ngya bekyuli bani na báta bénye mina lilu lɛlɔ
na bakɛ ulu ukpidi lɛlɔ bésela
na basia bana kasusu
kama kani.
3Na baakya-mi kɔnyi uwi ndi uwi anumi ku anumi.
Na bakɛ mmo ku atabi akpabi lidu lidu ƒui lɛlɔ
baakyula akpala ku oloƒui.
4Bakɛ bekpine kɔvakɔ
na kɔƒiɔtɔ akɔ
usien umodi lɛlɛɛ talɛɛ talɛɛ banii baakpali ala.
Na baadú baplakuo taakun
na béƒulo lɛna lidu lɛni muusé lɛlɔ béyile kutu lɛtata.
5Bekyuli bamɛni mɔɔsu bekyuli bamba banii
batani betede-ma, ɔsika ama bese sɛɛn
na belese lɛlɔ aani bana bakpana.
Nsu geen ni, bekyuli bamɛni bese aani uyɔ
na mina enwu kemmo
na bese aani
ogya ɔni mɔɔda limeyi limodi.
6Bɛnu, mɔɔnu bunweni bɔdi na mina anumi
bɔni na Unwoti ɔɔsu ɔnini,
‘Lɛɛɛdubo mina kenye bubile bɔsɔ bulie kpoo
mmomu ndubɔƒɔ kayu keyile bute ɔdi biala.
7Bana ekpidi ani na bábla ku bana bati ekpidi lɛnɔ.
Ɔsika bákyula akpala
na abi lɛlɔ
na bése kayi báta bénye-mi lɛlɔ na abi lɛlɔ mmɔ.
Anwuɔsu ndubo bana lɛyuƒɔla
keyile kani námanku bana ablala
ani návi ƒui bɔƒɔ bute-ma.’ ”
8Unwoti ɔnini, “Kalɛ na si kutu ɛlɛɛ úbu ɔsia kugyii lili
na ubo ntu na ɔdia bɔdi
na bekyuli baasu banii batada kugyii kɔmmɔ,
ɔsika kutu ɔbuni ɔdi úbu ɔsia kugyii lɛlɔ ni,
lɛni na ndubo bɔbla bute mina kabla bablane
bani mɔɔdi mina litemi lɛlɔ
na lɛɛɛdubo bekyuli bammɔ
ƒui udu
bɔyila bɔsalaku-ma.
9Ndubo Yakob kaba kemmo bawɔ bɔƒuna ku Yuda lɛnɔ.
Na ama na ndubɔya na beti mina abi ammɔ ƒui
benwini bana ɔdi.
Na mina bekyuli baƒunadi bamɛni na ndubɔya
na beti bana kalɔ kammɔ na belie-ka lɛlɔ.
10Na Saron ɔdubunwini bebuo kadikɔ kabuni
ute bana bebuo.
Na Akor Ɔkwalɛ bonwu ɔmmɔ ɔdubunwini
kesii kani na bebuo bammɔ badubo butaatɛ taanwuna
ute mina bekyuli bani mɔɔwia-mi kama ulu.
11“Nsu amii bani néni ami Unwoti
na bɛ́yiƒala mina kɔbi kedee kɔmmɔ
na biisé kadikɔ na bɛɛsála ntɛ na bɛɛdi taani
teemwi baƒiɔ bɛnii ama mɔɔyá na lili lɛɛdia-mii
na ama mɔɔgyumana-mii kasikɔ ni,
12ndubo-mii bɔnyonu bute na bɛkya eli kalɔ
na bina bekisine badu-mii ƒui.
Ɔsika lɛ́kpali-mii na bítatuna bítete-mi.
Na lɛ́tɛmiku-mii na bítenu.
Mmomu bɛ́bla likpidi
na mina anumi
na ala ani na alayɔ-mi kaƒɔ mmomu na bɛ́ƒuna ka bitaabla.
13“Binu! Ami Unwoti Ɔyikune Ƒui mɔɔsu-mii nwaa
ka mina kabla bablane badubo bɔdi,
nsu kɔka kɔdubo amii alaekpidi bablane
butaada uwi biala.
Na badubo bɔni, nsu ntukwɛ ɔdubo-mii
butaada uwi ndi uwi.
Na lɛlɔ lɛdubo-ma bɔyɔ,
nsu kɔƒa kɔdubo-mii bukpo.
14Mina kabla bablane badubo lɛnu budie ku kubiti
bɔsiku bana kayi kemmo
nsu amii bɛdubo kɔnyana buwulo
na kayi kakpulu-mii na bɛyila lɛnunsia biala.
15Mina kabla bablane bammɔ
badubɔkpali bina anyi bewida bekyuli banii
badubɔnuku-ni aani bina kalɛ.
Nsu ama ni, ndubute-ma anyi awɔdi.
16Ami kani ndi Katɔti ɔni lɛlɔ na ukyuli
ɔdubɔkana na ɔsia lɛnu.
Ala ani na ékpoku-mii dii ƒui ávi ni,
ami nsɔ neeeti-nya lɛlɔ kasusu.
Si biivele kusɛ kusɛ teete ukyuli ɔdi iye biisé kenye kadi ni,
bɛbla lɛla biala na mina lɛnyi kemmo.
Ami lɛti kani ndi Katɔti
ɔni kani na ukyuli ɔsia lɛnu.
17“Ndubo katɔ kawɔdi ku kalɔ kawɔdi budie
na bekyuli bayiƒala ala ani na ávi ƒui.
18Bɛdi limeyi ku ebiti
na lɛlɔ litaayɔ-mii uselaku uwi ƒui!
Muudie Yerusalem ɔwɔdi ɔni kemmo
na lɛlɔyɔ bekyuli sɔɔn ndubɔƒɔ-nwu kemmo.
19Na ndubɔdiku Yerusalem bekyuli bammɔ ƒui limeyi
ɔni na kɔnyana buwulo
iye keku
kadi kasɔ kalakya ɔma unengudi ɔmmɔ kemmo.
20“Na ubi ɔdi ɔsɔ ulekpi
lɛnamu uwi
mmomu badubulie babi lɛlɔ babla benengu geen.
Na ukyuli biala na ɔ́ƒɔ akwa eti anyɔ ni,
badubɔnu-nwu ɔnamu ɔni na si úkpi
na útaƒɔ tɔ akwa eti anyɔ ni,
na ewida na adi-nwu.
21Mina bekyuli badubulie lɛtɔ
lɛni na ama alati bátu kemmo.
Na badubɔdi egyiibi mmo
bɔni na bése ebi.
22Ukyuli ɔdi uláƒɔ bana
lɛtɔ lɛni bátu
iye bana mmo bɔni na bése.
Na mina kadi bekyuli baƒunadi bamɛni
badubulie babi lɛlɔ aani egyii
na badi ala ani na ama alati
béti bana enu bábla.
23Bana kabla kalayii udu
na ɔlɛ ukpidi ɔdi uládu
bana bebi
mmomu ndubute bana bebi
ku bawɔ lɛnɔ kusɛ kusɛ.
24Ndubute-ma lɛla lɛni baawia
asa na bakpali-mi muedi
nsu si baakpali lɛnɔ ni,
ndubunu lɛla lɛni na beevele-mi.
25Begidi ku baƒonubi badubɔdi basala
na bagyata ku bakɔ ƒui badubɔkun keti.
Na balakpi badubɔkun lɛti kani!
Na baladu iye babla ɔdi
lɛla lɛdi
na mina kɔbi kedee lɛlɔ mmɔ.
Lɛni na ami Unwoti mɔɔsu!”
Currently Selected:
Yesaia 65: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
