Yesaia 63
63
1Ɔma na ɔdi nási Bosra
na Edom kalɛkɛ ɔdubo
ku awu ugyiedi na mɔɔnu mɛni?
Lɛlɔ ɔdine ɔmani nánya kalɔ
ɔdubo ku ɔyikun ku adala
ani muukeye lɛni?
“Ami Unwoti na ɔdi!
Lɛ́di lɛlɔ na kekpokɔ
na ndubɔkana-mii bɔƒɔ!”
2Bi nébo ɔ́kya ƒula adala
kemmo lɛni
na use aani lɛla lɛdi
néduo-ɔ awu
ɔni na akya kemmo
asa na aakɔ́ kadi kammɔ bekyuli taabwɛ
aani kalɛ na beebulo egyiibi na ntɛ kablakɔ?
3“Ami lɛti nákɔ-ma ƒui lɛ́bwɛ lɛni
aani egyiibi na mina kɔnyi kemmo!
Kadi badi bétebunku-mi.
Na mmɔ na bana ubugya úduo-mi awu.
4Na kasi na mɔɔwia lidie-ma ɔsu na lɛ́bla lɛni,
ɔsika uwi údu ka lidie mina kadi bekyuli.
5Ukyuli ɔdi uuubo mmɔ na ubunku-mi
nsu na kɔnyi kɔni na lɛ́kɛ
ɔsu ni,
lídie mina kɔnu na lɛ́bla
ɔyikun ala
útédu ka lɛ́di lɛlɔ.
6Na mina kɔnyi kemmo ni,
lítu kadi bekyuli lɛ́bwɛ
na lɛ́ya na báni bana ubugya ɔni néwi kalɔ
na ɔɔgbá na kalɔ lɛlɔ
kesi kesii mmɔ.”
7Ndubɔsu lɛƒɔndia ala ani na Unwoti ɔ́bla,
ɔsika ala ammɔ ámanku ka bemwi-nwu!
Unwoti ɔ́nu nwuna kadi bekyuli Israelƒuɔ kɔnyana
na ɔɔbla-ma lɛƒɔndia
uwi ndi uwi
na ɔɔtina kalɛ na ɔdia.
8Anwu nédie-ma ɔ́lɛku bana bubie kemmo
na ɔ́su ɔnini, “Ami mbo-ma
na baaadubo-mi kama bɔlɛ.”
9Na si ɔ́nu ka béduo lɛbibo lɛdi kemmo ni,
uukpóku Unwoti geen
na ɔɔyá na nwuna katɔ ɔtu uusié taatáƒɔ teete-ma.
Unwoti ɔ́nu kɔnyana geen
anwuɔsu na údie nwuna bekyuli
ɔ́lɛku bana bubie kemmo.
Ɔ́nu-ma lɛlɔ akwa ammɔ kemmo ƒui
na use aani bɔgyu na ɔ́gyu-ma ɔda nwuna enu kemmo.
10Nsu ina amu béni na báta bénye
nwuna Kɔyu Kedee lɛlɔ ka kɔdi-ma lɛlɔ.
Anwuɔsu na ɔ́sɔ-ma kama na únwini bana ukisine
na anwu ɔlati úkpoku-ma geen.
11Mmɔ ni, nwuna bekyuli bammɔ bákali bánu kuuku
uwi ɔni na Mose ɔ́tɔnku nwuna bekyuli.
Na béye lɛlɔ banii
wɛ na ukyuli ɔni nétiku-ma ɔ́siaku ɛpu kemmo mmɔ
ku bana lɛlɔ ɔnune aani baƒonu ɔdane buni mmɔ bávi?
Na ukyuli ɔni náya na nwuna Kɔyu Kedee
kuli-ma akɔ nɔɔ, wɛ na ɔ́vi?
12Ɔma muudie kɔnu taabla
ɔyikun ala
ani muukeye si Mose ɔ́talaku kɔnu katɔ,
na úle ɛpu kemmo inyɔ na bana anumi,
na nwuna lɛnyi lise lísela
uwi ƒui?
13Wɛ na ukyuli ɔni nétiku-ma
ɔ́siaku ɛpu kalɔ kalɔ ƒui
mmɔ ɔkya?
Básia mmɔ bálɛ aani kalɛ na ɔpɔnkɔ ɔɔkɛ ku usi
taasia kalɔ ƒiaa lɛlɔ na bétetulo iye bagbanta.
14Kalɛ na bebuo baayu teesie ɔkwalɛ kesii
kani nse-ma kpoo ni, lɛni na Unwoti ɔ́ya
na bákɛ bɔnwuna ɔkɛnku nwuna Kɔyu kɔni
mɔɔtɔnku-ma lɛlɔ na ɔ́ƒɔ lɛnyi lɛni muukeye geen.
15Unwoti, nwini anumi na anu-bu na kalɔ mɛni
asiku ƒula keliekɔ kedee na katɔ kakaaka
kesii kani muukeye mmɔ.
Wɛ na ƒula bɔyɔ ku ɔyikun ala ani na aabla teete-bu mmɔ bɔ́vi?
Éni na asɔ aaada-bu kɔkɔɔkɔ ku kɔnyana bɔnu.
16Nsu awɔ ndi-bu Katɔti, ina ka Abraham ku
Yakob ƒui basɔ baaagyi-bu aani bana bebi ni,
awɔ Unwoti ndi bula ɔti,
na Udiene na adi ete-bu ɔ́si kukuuku.
17Unwoti, bi ɔsu na áya na bɔɔyii ƒula ulu,
na áya na bula kɔyi kɔ́bla na bubo atu ɔkplu na bulabu-ɔ?
Sɔ nwini bo na abu ƒula kabla bablane ɔsu,
abu bani ndi ƒula bekyuli bani na áƒuna ése éte lɛlɔ.
18Keliekɔ kedee kani na éte-bu ni,
uwi klukwii ɔdi kani na
búlie mmɔ
asa na bekisine bébebile mmɔ báyila-ka udu.
19Awɔ badi na bɔdi ɔ́si kukuuku,
nsu ɔƒaani buse aani ɔɔɔdi awɔ mɔɔdi-bu lɛlɔ,
na use lɛnɔ aani si ɔɔɔdi ƒula lɛnyi na bɔɔdi.
Currently Selected:
Yesaia 63: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
