Yesaia 61
61
1Unwoti Ɔyikune Ƒui Kɔyu kɔ́ƒɔ-mi lɛlɔ kemmo!
Ɔsika ɔ́tala-mi ɔnii nkɔ litemi buni lɛsa nte bawabane.
Na lɛbwi bani muunú ɔlɛ na bana kayi kemmo
na basɔ beeebo lɛnunsia,
na libo kudu lite bani na béƒie
na bébo-ma lɛkpu ka badubɔkɛ bɔnwuna
na balɛ kasuudikɔ mmɔ.
2Lɛkwa lɛmɛni na Unwoti Katɔti
úse ka wabla-bu lɛƒɔndia,
na ɔni bula bekisine kɔtu,
na lɛsia bani muuwulo kɔnyana kɔnu.
3Na lɛƒɔ lite bani nkya Yerusalem,
na lɛya na bana anumi
eteekeye ku lɛlɔyɔ ku lɛma
na bana kɔnyana buwulo kenye.
Na beteedie bumwi lɛnu,
na kɔnyana lɛnu kenye.
Na babla aani egyii ani na Unwoti ɔlati ɔ́lɛ,
na aalɛ́ lili siin, na batina kalɛ na Unwoti uukeye.
4Mmɔ na badubɔsɔku lɛma lɛkukudi lɛni nábwɛ
ku kuliekɔ kɔni na báda béwi ƒui batu.
5Na badubɔƒɔ kadi bamba bekyuli na banu bana baƒonu lɛlɔ
ku bana adingyii mmo bete-ma na kayu kenye.
6Nsu ama alati ama badubunwini bakpane
ku kabla bablane bete bula Unwoti.
Kadi bamba bekyuli akɛla ƒui
adubunwini bana ɔdi
na baƒɔ lɛnyi.
7Na bana kɔƒa kenye ni,
mina kadi bekyuli akɛla adubɔkɔ katɔ akpa anyɔ.
Na kalɛ na béwi-ma anumi kalɔ kenye ni,
lɛlɔ lɛdubɔyɔ-ma, na bana kadikɔ kani ndubo-ma budu ɔsu,
na lɛlɔyɔ lɛmmɔ lɛdubuse buteesie uwi ƒui.
8“Ɔsika ami Unwoti ni,
litemi bɔtɛ ulu siin lɛlɔ na mɔɔyɔ́.
Na nkisi kuyu ku ɔkɔ etemila bɔtɛ
ku ekpidi lidu bamba ƒui.
Na kalɛ na mɔɔdi mina litemi lɛlɔ ɔsu ni,
ndubɔƒɔ-ma kayu na linyimiku-ma bunyimi
bɔni ndubɔkya ami ku-ma ntɛ uwi ƒui.
9Badubɔƒɔ lɛnyi na kadi bekyuli ƒui akɔ
na ukyuli biala ɔni nánu-ma ɔnu ɔti
ka badi kadi bani na Unwoti úte-ma kusɛ kusɛ.”
10Lɛlɔ lɛɛyɔ́-mi na Unwoti lɛlɔ
na ebiti aada mina kɔyu
na lɛla lɛni na mina Katɔti ɔ́bla úte-mi ɔsu.
Kalɛ na ɔ́ƒɔ-mi ngba use
aani kalɛ na baaklibi uleku teesienku kawɛɛkɔ.
Na lɛduni lɛni mɔɔtina ka ɔ́bla-mi siin lɛma-mi lili
aani ɔkpane lɛduni lɛni na uubi lili.
11Kalɛ na edula ebi aakwɛ́
taalɛ kalɔ kemmo na
aalɛ́ lili ni,
lɛni na Unwoti Ɔyikune Ƒui ɔdubɔya
na kadi bekyuli ƒui balɛ lili
na babla siin na beti bumwi bete-nwu.
Currently Selected:
Yesaia 61: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
