Yesaia 60
60
Sion Ɔdubukeye
1“Yerusalem kadi bekyuli,
bɛta na bikeye!
Ɔsika Unwoti bukeye bɔ́tu aani ɔƒɛ na buuwi-mii lɛlɔ.
2Kalɔ lɛlɔ ƒui ku kana kadi bekyuli ƒui
báƒɔ lɛlɔ bakya lɛdisa kemmo,
nsu amii ni,
Unwoti úbo-mii kudɔ,
na nwuna bukeye
búbewi-mii lɛlɔ.
3Na kalɔ kadi bekyuli
ku bana baga
badubo-ɔ kudɔ babanu ƒula bukeye kadi kawɔdi
kani négye-ɔ.
4“Bibimi bina anumi na bɛnu!
Bɛnu bɛmana na bɛnu bekyuli lisu bonwu
bani nási badubo-mii kudɔ.
Bina bebi bananabi basia ulu bási ɔlɔgyu,
na bakwɛni bina bebi belekubi badububoku aani banamu.
5Na si bɛ́nu ɔmɛni ni,
bina anumi adubukeye,
na kayi lɛnɔ kata-mii
na bɛtalaku lɛlɔ katɔ ku lɛmɛnɛ.
Na badubɔsiku ala abuni ku lɛkɛ
lɛni na lɛ́si ketu ɔvi
ku kadi bamba bekyuli akɔ ƒui beboku-mii.
6Na bina kalɔ ƒui kadubuyi ku kɛɛkɛ
lɛni na bebuo ala betine bani bási Midia ku Eƒa
ku ala abuni pii bebeyile ɔma ɔmmɔ.
Na Seeba kadi bekyuli
badubɔsiku bana sika ugyiedi ku oloƒui beboku
na adubunu ka beemwi Unwoti lɛnyi.
7Kedar baƒonu ƒui badubo-ɔ kudɔ.
Na Nebaot baƒonu bagyani bammɔ ƒui lɛnɔ
benwini awɔ badi.
Ndubɔƒɔ-ma aani etela
na bekyuli beti ɔbu bete mina kakpakɔ kammɔ.
8“Bi nkɛ kayaa mɔɔví mmɔ aani liƒlukutu?
Na use aani babloduma néveyi bésela bana kakyakɔ?
9Ƒula bekyuli benye bagya ami Unwoti
na ntuntɛ kɔlɔ kɔni nkya ɔgyu kakaaka mmɔ.
Na ɛpu lɛkɔlɔ bonwu lɛmmɔ lɛ́ɛgyu lɛtɔ
kalɛ na litéti-ma liboku ɔma,
ku bana sika ugyiedi ku ɔƒualadi ƒui.
Ami Unwoti nábla ɔmɛni líte ƒula bekyuli
kalɛ na bekyuli beti ɔbu
bete ami
bina Unwoti Israel Katɔti Kedee
na bataanu kalɛ na biikeye.
10“Yerusalem, ƒula ɔma unengudi awodu
ani náka ámana-nwu ni,
baƒɔ ndubo-nya bɔsɔku bɔtu.
Na bana baga benwini bina kabla bablane.
Lɛ́ni-mii kɔtu na mina livoƒi kemmo
nsu ɔƒɛni amu ndubɔnu-mii kɔnyana ku mina lɛƒɔndia.
11Bɛdubɔlɛmi bina lɛban kayakun kenye biwi usien ku ɔƒɛ
na kadi bamba batɔnkune
bakpanku bana bekyuli beboku-mii
ku bana akɛla ani na bebo ƒui.
12Na lɛga kadikɔ iye kadi
bani néni
banii balakya-mii kalɔ
na babla-mii kabla ni,
badubɔyii udu
na ɔdi ɔsɔ ulénu-ma kɔku.
13“Na Lebanon egyii kpakplaa enengudi lidu
lɛni nkya-ma ƒui ni, badubɔlɛku-ni beboku.
Na badubuti-ni banwi ala
beti bakya mina kakpakɔ bɔdia
kesii kani na mina lɛgba lɛɛnya.
14Na bekisine bani nékpoku-mii ni,
bana bawɔ badubɔlɛ
akɔnkɔ kalɔ
na bina lɛgba akɔ
na basu-mii banii,
‘Sion ɔdi Unwoti Israel Katɔti Kedee ɔma unengudi.’
15“Bekyuli békisi-mii na béni-mii uwi ɔni návi
nsu ndubɔbla-a ɔma unengudi
ɔni mɔɔdia bɔnu geen na bataakun lɛmɛnɛ
na ƒula lɛlɔ úsela uwi ƒui.
16Na adubɔkpala kadi bamba
ku bana baga akɛla asiku-ma kudɔ ƒui kede kede
na bɛnu bɛti ka ami Unwoti Israel Katɔti
nédie-mii na lɛ́ƒɔ-mii ngba.
17Na ndububoku-mii sika ugyiedi
na abualagyie kenye,
na liboku-mii sika ɔƒualadi
na kalɔ kemmo abuala kpakplaa kenye.
Na liboku-mii abualagyie na ligyii kenye
na liboku-mii abuala kpakplaa na atabi kenye
Na keyi buɛɛ ku litemi bɔtɛ ulu siin lɛlɔ
na ndubɔya na utaadi-mii lɛlɔ
aani bina batɔnkune kalɛ.
18Na basɔ belénu kekpo ku ala bubile kɔku na ƒula liku.
Na ndubo-mii bɔgyumana
aani kalɛ na awodu aaka taamana lɛla lɛdi
na bimwi-mi ka lɛ́ƒɔ-mii
ngba ɔsu.
19Na bɛ́sɔ bilawia ɔƒɛ
iye kɔbuli bukeye bɔdi na ɔƒiiwi iye usien,
ɔsika ami Unwoti ɔlati bukeye
ndubo-mii buteewi úsela
uwi ƒui.
20Bina ɔƒɛ iye kɔbuli kɔsɔ kɔɔɔdubo bɔnu kudii.
Ɔsika ami bina Unwoti ndubunwini bina bukeye uwi ƒui.
Na bina keku ku kɔnyana buwulo emeyi ƒui
adububo kawɔlɔkɔ.
21Bina kadi bekyuli badubulie siin
na kalɔ kammɔ kabla
bana ɔdi.
Bese aani egyii ani na lɛ́lɛ
na áta kalɛ na bedie mina bukeye keyi.
22Kaduli kani bekyuli nse blii suɛ ƒui muedi
badubunwini kadi bekyuli bani mbo ɔyikun geen.
Ami ndi Unwoti
na ndubo ala amɛni ƒui bɔbla kɔnakunwi
si uwi na ana ɔblawi údu.”
Currently Selected:
Yesaia 60: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
