Popular Bible Verses from Yesaia 60

Share

“Yerusalem kadi bekyuli, bɛta na bikeye! Ɔsika Unwoti bukeye bɔ́tu aani ɔƒɛ na buuwi-mii lɛlɔ.

Na kalɔ kadi bekyuli ku bana baga badubo-ɔ kudɔ babanu ƒula bukeye kadi kawɔdi kani négye-ɔ.

Kalɔ lɛlɔ ƒui ku kana kadi bekyuli ƒui báƒɔ lɛlɔ bakya lɛdisa kemmo, nsu amii ni, Unwoti úbo-mii kudɔ, na nwuna bukeye búbewi-mii lɛlɔ.

Kaduli kani bekyuli nse blii suɛ ƒui muedi badubunwini kadi bekyuli bani mbo ɔyikun geen. Ami ndi Unwoti na ndubo ala amɛni ƒui bɔbla kɔnakunwi si uwi na ana ɔblawi údu.”

Na bɛ́sɔ bilawia ɔƒɛ iye kɔbuli bukeye bɔdi na ɔƒiiwi iye usien, ɔsika ami Unwoti ɔlati bukeye ndubo-mii buteewi úsela uwi ƒui.

Bina ɔƒɛ iye kɔbuli kɔsɔ kɔɔɔdubo bɔnu kudii. Ɔsika ami bina Unwoti ndubunwini bina bukeye uwi ƒui. Na bina keku ku kɔnyana buwulo emeyi ƒui adububo kawɔlɔkɔ.

Na si bɛ́nu ɔmɛni ni, bina anumi adubukeye, na kayi lɛnɔ kata-mii na bɛtalaku lɛlɔ katɔ ku lɛmɛnɛ. Na badubɔsiku ala abuni ku lɛkɛ lɛni na lɛ́si ketu ɔvi ku kadi bamba bekyuli akɔ ƒui beboku-mii.

“Bibimi bina anumi na bɛnu! Bɛnu bɛmana na bɛnu bekyuli lisu bonwu bani nási badubo-mii kudɔ. Bina bebi bananabi basia ulu bási ɔlɔgyu, na bakwɛni bina bebi belekubi badububoku aani banamu.

Bina kadi bekyuli badubulie siin na kalɔ kammɔ kabla bana ɔdi. Bese aani egyii ani na lɛ́lɛ na áta kalɛ na bedie mina bukeye keyi.

Na basɔ belénu kekpo ku ala bubile kɔku na ƒula liku. Na ndubo-mii bɔgyumana aani kalɛ na awodu aaka taamana lɛla lɛdi na bimwi-mi ka lɛ́ƒɔ-mii ngba ɔsu.

Bɛdubɔlɛmi bina lɛban kayakun kenye biwi usien ku ɔƒɛ na kadi bamba batɔnkune bakpanku bana bekyuli beboku-mii ku bana akɛla ani na bebo ƒui.

Na bina kalɔ ƒui kadubuyi ku kɛɛkɛ lɛni na bebuo ala betine bani bási Midia ku Eƒa ku ala abuni pii bebeyile ɔma ɔmmɔ. Na Seeba kadi bekyuli badubɔsiku bana sika ugyiedi ku oloƒui beboku na adubunu ka beemwi Unwoti lɛnyi.

“Yerusalem, ƒula ɔma unengudi awodu ani náka ámana-nwu ni, baƒɔ ndubo-nya bɔsɔku bɔtu. Na bana baga benwini bina kabla bablane. Lɛ́ni-mii kɔtu na mina livoƒi kemmo nsu ɔƒɛni amu ndubɔnu-mii kɔnyana ku mina lɛƒɔndia.

“Bekyuli békisi-mii na béni-mii uwi ɔni návi nsu ndubɔbla-a ɔma unengudi ɔni mɔɔdia bɔnu geen na bataakun lɛmɛnɛ na ƒula lɛlɔ úsela uwi ƒui.

Na adubɔkpala kadi bamba ku bana baga akɛla asiku-ma kudɔ ƒui kede kede na bɛnu bɛti ka ami Unwoti Israel Katɔti nédie-mii na lɛ́ƒɔ-mii ngba.