Yesaia 53
53
1Ɔma náƒɔ-bu ɔ́di?
Na ɔma bene na Blɔti údie nwuna ɔyikun ɔ́tina?
2Unwoti kabla ɔblane ɔmɛni
ɔɔlɛ́ lili
na Unwoti anumi
aani kugyii kebi
kani nákwɛ na keedie evete iye kugyii ugyitu
ɔni muutulo taalɛ kalɔ kakwiidi kemmo.
Na ɔɔɔdi ɔga ɔni mɔɔdia
bekyuli bɔnu.
Nwuna lɛla lɛdi liiise ɔni basu banii ani mɔɔda
bekyuli kayi.
3Bekyuli békisi-nwu na béni-nwu
ɔni na nwuna ngba ƒui bɔdi kɔnyana ku lɛbibo sɔɔn.
Ukyuli ɔdi uláwia-nwu ulánu
na búdie-nwu atu na bɔɔɔdaku-nwu lɛda!
4Anwu ɔlati ɔ́bwi-bu lɛlɛ
na únu ɔlɛ pii na abu ɔsu.
Na kawɔlɔkɔ ni, bɔsu na bɔ́su bɔnii anwu ɔlati ekpidi
ɔsu na Katɔti ɔ́ni-nwu
kɔtu lɛni.
5Nsu ɔkɛnku bula ekpidi ɔsu na bébo-nwu
ulikplu kemmo bákya-nwu
ɔlɛ lɛlɔ
na báƒɛ-nwu lɛlɔ ekpo ƒui kpɛtɛ kpɛtɛ.
Na lɛbibo lɛmɛni kemmo na ɔ́sia
na ɔ́ƒɔ ngba úte abu na bɔ́kɛ bɔnwuna.
6Bula ƒui buse na buse aani baƒonu bani náyii ulu,
na ɔdi biala úti nwuna ulu úsela kesii kani na ɔɔyɔ́.
Na lɛtuni lɛni na nka ɔlɛka
bɔƒɔ ni,
ani na Unwoti úti úte-nwu
na bula lili.
7Bekyuli bédumi-nwu na básupa-nwu
ɔni na nka ɔɔɔdi anwu na babla lɛni,
nsu útakpete na ɔsu lɛla lɛdi.
Mmomu úbile kenye kpoo na bada-nwu béselaku
aani koƒonu kɔni béti batádu.
Na ɔkɛ aani koƒonu kɔni naaadaku-ni
si beekúlo-nwu linwini na útebimi kenye.
8Bákya-nwu kɔƒa na útakɛ ukyuli
ɔni náƒɔ-nwu kenye.
Údie kaba kadi?
Bi na ɔ́bla úse asa baadú-nwu na kayawi kamɛni kemmo?
Alaekpidi ani na mina bekyuli bábla ɔsu
na bádu-nwu lɛni.
9Útanyi ɔkɔ ɔdi iye ɔta unye ukyuli ɔdi lɛlɔ,
nsu báva-nwu básalaku balakɛne ku bekyuli bekpidi.
10Nsu Unwoti ɔlati nése ɔmɛni
úse lɛni ɔnii
nwuna kabla ɔblane ubo abi amɛni udu
na badu-nwu, na ɔƒɔ kayu
na bekyuli ƒui lili na bana ekpidi ɔsu.
Na ina ka úbo lɛni muedi ni,
ɔdubulie na ɔnu nwuna
bawɔ bawɔ.
Na ɔkɛnku nwuna lɛlɔ ni,
lɛla lɛni na Unwoti ɔ́lɛ ugyii úse lɛdububo-nwu kemmo.
11Ɔdubɔnu lɛla lɛni ndubɔlɛ lɛsi
kɔyu kemmo abi ani na úbo, na kaƒɔ kaba-nwu.
Ka mina kabla ɔblane
ɔni nse siin
ɔgyi mina lɛyɔla ɔsu ni,
ɔdubɔya na bekyuli pii ku Unwoti ntɛ bɔdia.
Na anwu ɔlati ɔdubɔƒɔ-ma ekpidi uti.
12Unwoti ɔdubɔƒɔ kayu kabuni bute-nwu
na ute-nwu kenyekɔ kenengudi ku ɔyikun
na kalɛ na úbo abi útédu ku kukpi kemmo
na ɔ́ƒɔ kayu na bekyuli ƒui
lili ɔsu.
Báka-nwu bákya bekyuli bekpidi akɔ.
Ɔsika bekyuli pii ekpidi na ɔ́ƒɔ ɔ́sia lɛlɔ,
na úti lɛlɔ ɔ́kpa na bana lili, na ɔ́ƒɔ-ma ngba.
Currently Selected:
Yesaia 53: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
