Yesaia 49
49
1Ukyuli biala use kɔtu
na unu,
amii ɔgyu kadi bamba bekyuli ƒui bani nkya ɛpu ɔvi.
Unwoti ɔ́ƒuna-mi
na ɔ́sia-mi lɛnyi
asa na báwɔ-mi.
2Ɔ́ya na mina kenye etemila aatu bekyuli
aani kewii kani mbo ɔbi geen
iye lɛtula lɛni kenye nse
ƒiolu ƒiolu
na use yayaaya na atula koƒo kemmo.
Ɔda-mi kɔkɔɔkɔ na ɔ́bɛla-mi
na nwuna lɛkɔkɔ kemmo.
3Na ɔ́su-mi ɔnini,
“Israel, awɔ ndi mina kabla ɔblane
ɔni lɛlɔ na ɔkɛnku
na bekyuli badubo-mi bumwi.”
4Nsu lɛ́su nnini,
“Lɛ́bla kabla lítu lɛlɔ na ńtanu kɔsia kɔdi.
Na líbile mina ɔyikun lɛnɔ keeke
na ńtanu lɛla lɛdi.
Nsu lɛla lɛni ndi mina lɛdi ni,
Unwoti lɛkɔkɔ na lɛkya.
Ɔsika anwu ndubo-mi kayu bɔƒɔ
na lɛla lɛni na lɛ́bla kenye.”
5Na Unwoti ɔni návɔ-mi
na mina uni kaƒɔ kemmo ɔnii nnwini-nwu
kabla ɔblane asa na
badubɔwɔ-mi ni,
anwu nátala-mi ɔnii nkpanku Yakob
ku nwuna kadi bekyuli Israelƒuɔ mboku-nwu kudɔ,
ɔsika Unwoti ɔɔbu-mi geen
na anwu kani mɔɔkya-mi ɔyikun
asa na mɔɔbla lɛla biala.
6Unwoti ɔ́su-mi ɔnini,
“Ndubo-ɔ kabla kenengudi kɔnu bɔkya
butulo ka akpanku Yakob adua ammɔ ƒui
ku Israelƒuɔ bani nébu eboku-mi kani.
Mmomu ndubɔbla-a na enwini bukeye
ete kadi bamba bekyuli ƒui
kalɛ na bayawine ƒui bakɛ
ngba bɔƒɔ.”
7Ɔmmɔ kama ni,
Unwoti ɔni ndi Israel Katɔti Kedee
ɔni lɛnɔ ndi bana ngba ɔƒɔne
ɔ́su nwuna kabla ɔblane ɔni na bekyuli béni
na beekisi-nwu kpakplaa
ɔsu na únwini ɔɔbla-ma kabla ɔnini,
“Baga badubɔnu-ɔ na bata benye
na bagabi badubɔnu-ɔ na bakya-a lili kalɔ,
ɔsika ami Israel Unwoti Kede
ɔni náƒuna-a mɔɔdi mina litemi lɛlɔ.
8“Si mina uwi údu ka lɛƒɔ-mii ngba ni,
ndubunu bina bɔkpali na libunku-mii.
Na ndubɔgyumana-mii na lɛda-mii kɔkɔɔkɔ.
Na ɔkɛnku amii ɔsu ni,
ndubo bunyimiku kadi bekyuli ƒui bunyimi bɔdi.
Na ndubɔya na bɛsɔ bilie
kalɔ kpi
na bina kalɔ kani nwi
na lɛla biala líbie-ka kemmo ɔƒɛni mɛni kemmo.
9Na ndubɔsu bani na béƒie bátɔlɔku nnii
‘Bɛlɛ-ma lɛlɔ bɔdi kalɔ na bɛkɛ bɔnwuna.
Na amii bani nkya kasuudikɔ ni,
bɛlɛ bibo bukeye kemmo!’
“Na badubɔbla aani baƒonu
bani nnye kɔbi lɛlɔ
baakun livo.
10Na kɔka iye utukwɛ ulada-ma.
Na ɔƒɛ ku kalɔ kakwiidi liwulu lilekeyi-ma.
Mmomu anwu ɔni mɔɔnu-ma kɔnyana
na ɔɔgyumana-ma ɔdubɔtɔnku-ma
usienku kesii kani na abiɔ ntu bɔbuni bɔkya.
11Ndubɔbwɛ abi ammɔ
na lidie ulu unengudi lɛva-ma
kalɛ na basia-nwu lɛlɔ.
12Mina kadi bekyuli badubɔsi ɔlɔgyu
na katɔ kakɛ ku
ɔƒɛ kanukɔ bebo
na basi Siniƒuɔ kalɛkɛ lɛlɔ
lɛnɔ bebo.”
13Bɛsu katɔ ku kalɔ bɛnii
beteedie lɛnu
na bataatɔ ku ebiti.
Na bibo ɔda bite abi ammɔ lɛnɔ ƒui bɛnii
ama lɛnɔ bebunku
na beteedie lɛnu.
Ɔsika Unwoti bekyuli bébo abi
nsu ɔƒɛni amu ɔ́nu-ma kɔnyana
na ɔ́yala-ma kɔƒɔ.
14Sion kadi bekyuli básu banini,
“Unwoti únwini kama ɔ́kya-bu na ɔ́yiƒala-bu.”
15Nsu Unwoti údie kenye ɔnini,
“Ubi uni ɔdi ɔdubɔkana na ɔyiƒala
ubi ɔni nányimi-nwu lɛnyii?
Munuu ɔdubuni na uláyɔ ubi
ɔni nálɛ ɔ́si-nwu lɛlɔ kemmo?
Ina ubi uni ɔdi ɔdubɔbla lɛni ni,
ami lɛɛɛdubo-mii bɔyiƒala kudii.
16Lɛ́ta-mii lɛ́sia mina lɛkɔkɔ
na bina ala akya-mi kasusu kemmo uwi ndi uwi.
17Bina bebi badubo ɔma ɔmmɔ bɔsɔku bɔtu kɔnakunwi
butulo kalɛ na béti bébile-nwu.
Na bina bekisine bammɔ
badubɔlɛ-nwu kemmo
batɔlɔ ƒui.
18Kɔliku anumi katɔ na anu amana,
na anu ka ƒula bebi básala lɛlɔ na basi badubo.
Na ka ami Unwoti ɔni nli uwi ƒui na ɔdi ɔsu ni,
muusé-ɔ kenye nnii ƒula ɔma unengudi ɔmɛni
ku nwuna bekyuli ƒui
badubɔlɛ lili
na badia bɔnu aani uleku ɔni na báwɛɛ-nwu
ku sika ugyiedi asɛɛ abuni.”
19Ɔƒaani ni, buse na Yerusalem
use aani ɔma ɔni na ɔ́bwɛ
na lɛla lɛdi lɛsɔ liiibo-nwu kemmo.
Nsu badubɔsɔku-nwu batu
na bekyuli baƒɔ ɔma ɔmmɔ kemmo tɛtɛɛtɛ.
Na bekisine balalane bani nkya ɔma ɔmmɔ lɛlɔ
ama badubusie ɔgyu kakaaka na ɔma ɔmmɔ kudɔ.
20Yerusalem use aani uleku ukpinele
ɔni nsɔ naaanu nwuna bebi
ɔsu únwini udinkɔ na uuwulo kɔnyana
ka ɔ́yila nwuna bebi ku ɔgyani ɔsu.
Nsu nwuna bebi bammɔ kani ndubo babasu-nwu banini,
“Búmi na kesii kani na bɔkya
na bɔɔwia ka abla keliekɔ bamba ete-bu
na ɔma unengudi ɔni na bekyuli báƒɔ-nwu kemmo mmɔ.”
21Mmɔ na Yerusalem aani uleku ɔmmɔ kalɛ ɔdubuye ɔnini,
“Ɔma náwɔ bebi bamɛni ama.
Lɛ́yila mina bebi na nsɔ naaanu-ma.
Wɛ na bamɛni bási?
Béti-mi bésienku kaƒɔ
na liiibo ɔma nanyuɛ bebi bamɛni?
Ami lɛti kani nebu nli.
Na wɛ na bebi bamɛni bási?”
22Lɛla lɛmɛni geen na Unwoti ɔ́su nwuna bekyuli ɔnini,
“Líbo kadi bamba bekyuli kɔnu
na ndubɔkɔliku mina aƒlaga katɔ
lɛtina bekyuli bammɔ ƒui.
Na badubɔkpanku ƒula bebi bananabi bada kɔnu,
na bagyu ƒula belekubi basia amangba beboku-ɔ.
23Na kadi bani akɔ na bákya mmɔ baga ku
beleku baga badububo babataanu-mii lɛlɔ
aani bina kabla bablane
bani nnye bati ku beni kenyekɔ bete-mii.
Na badubɔkya lili kalɔ bete-mii.
Na bɛdubɔnu bɔti ka ami ndi Unwoti ɔmmɔ.
Na anumi elewi-mii kalɔ
si bíti bina anu bɛ́sia-mi lɛlɔ.”
24Uuuse kpɛtɛ kpɛtɛ ka esie
na etékpo aƒɔ ukyuli ɔdi na ɔlalane
ɔni na ubo ɔkplu geen enu kemmo.
25Nsu Unwoti úse-bu kenye
ka ɔdubukpo ute-bu na ɔƒɔ bula bebi
ɔsiku bekyuli bekpidi bani ndi bula bekisine
bayikune bani mbo kalala mmɔ enu kemmo.
26Na ɔdubɔya na bekyuli bekpidi bammɔ
bakun ama alati bana ɔlɔna aani lɛna
na bani bana ubugya bekpi
aani kalɛ na baaní ntɛ teekpi.
“Na ukyuli biala ɔdubɔnu ɔti
ka ami ndi Unwoti Israel Katɔti Ɔyikune Ƒui
ɔni mɔɔƒɔ́-mii ngba na ɔɔyá na bɛɛkɛ́ bɔnwuna.”
Currently Selected:
Yesaia 49: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
