Yesaia 48
48
1“Israelƒuɔ, Yakob ɔtɔ kemmo bebi na bɛdi
na bɛ́si Yuda kɔdua.
Bɛɛsu taatina bɛnii ami Unwoti Israel Katɔti
na bɛɛbu, nsu ɔmmɔ ƒui ɔkɔ na ɔdi.
2Bɛnii Yerusalem ndi bina ɔma
na bina anu ƒui asia ami Unwoti Ɔyikune Ƒui, Israel Katɔti, lɛlɔ.
3Lɛ́su-mii ala ani ndubo abálɛ ɔ́si kukuuku
na lɛ́kɔ-nya lɛsa líte-mii ku mina kenye
na lɛ́bla lɛni sɔsɔ kɔnakunwi na ébo éte lɛni.
4Ngyi ka bibo atu ɔkplu ku lili ɔkplu.
5Na lɛ́su-mii ɔmɛni ƒui líse
kalɛ na si uwi ɔni na ébo
aalɛ́ ni,
na bilasu bɛnini,
‘Baƒiɔ bani na bɔɔkpá nábla ala ammɔ.’
6Bínu ala ani na lɛ́su na bɛ́nu kalɛ na álɛ lɛnɔ.
Na amii na ɔdi ka bɛsu ka sɔsɔ na ɔdi.
“Na ɔ́si ɔƒɛni ni, ndubudie abɛla
ani na bɛɛɛgyi tɔ kudii lɛtina-mii
7Na adi ala awɔdi ani na átakya kuuku
aani ɔmwi ɔdi ɔni na biinú-nya kɔku mɛni.
Anwuɔsu ɔdi ulakana bɔsu ɔnii
‘Ngyi-nya na líinu-nya
kɔku dii.’
8Ɔ́si kukuuku ƒui bina atu étebimi tɔ
na binu lɛla lɛdi kalɔ.
Na ɔ́si uwi ɔni na báwɔ-mii ni,
ngyi-mii kalɛ na bɛ́lɛ-mi kama
na bɛ́ta binye-mii lɛlɔ.
9Na ukyuli ɔni na ndi
ku kalɛ na bekyuli bemwi-mi ku ɔbu ɔsu ni,
muuwi lɛlɔ ku mina kɔnyi ablala
kalɛ na naaayila bekyuli udu.
10Lɛ́kɔku-mii lɛ́nu na lɛbibo kemmo
aani kalɛ na baakya sika ɔƒualadi ogya kemmo
taabla-nwu kede kede.
11Na lɛ́bla ɔmɛni na ami ɔlati lɛƒɔyɔ kenye
ku ukyuli ɔni na ndi ɔsu.
Ɔsika lɛɛɛdubo bɔtuna na mina lɛnyi lɛyii udu,
iye ukyuli ɔdi ule mina ɔbu ku bukeye
bɔni na bekyuli beete-mi.
12“Israel, mina kadi bekyuli baƒunadi,
bise atu na binu.
Ami lɛti kani ndi Unwoti udeedi ku ukplodi.
13Ami ɔlati néti mina enu
na lídie kalɔ
na líbimi kayaa lɛ́ƒala katɔ
na beenú-mi lɛdi uwi biala
na lɛ́kpali-ma.
14Bina ƒui bɛsala lɛlɔ
na bibo-mi kudɔ,
na binu lɛla lɛni na mɔɔsu.
Bina baƒiɔ badi básu banii
ala amɛni adi adubɔlɛ?
Munuu básu-mii na bínu si ukyuli ɔdi
ɔdubɔbla lɛla lɛmɛni udu ku Babelƒuɔ?
15Ami náƒuna-nwu na lɛ́ɛtɔnku-nwu
ḿbedu kesii kani na bɛɛnu mɛni.
Na ɔdubo lɛlɔ bɔdi lɛnɔ.
16“Bɛni bide-mi bibu na binu!
“Ala ani ƒui na lɛ́ɛka bɔsu ni, ńtasu-nya ńtabɛ na ɔdi útenu-nya.
Na uwi ɔni na ala ammɔ aalɛ́ lɛnɔ ni, nli mmɔ.”
Unwoti Katɔti ɔkɛnku nwuna Kɔyu ɔyikun lɛlɔ na ɔ́tala-mi.
17Unwoti ɔnini, “Israel kadi bekyuli,
ami ndi Unwoti Katɔti ɔni muudie-mii.
Na kalɛ na ɔdianku-mii ɔsu na mɔɔtina-mii ala,
na mɔɔkpanku-mii taasiaku ulu geen ɔmmɔ lɛlɔ.
18Si bunu na nka bínu-mi litemi ni,
nka bíilie kalɔ kpi ku atu bɔyɔ
aani kalɛ na ketu kaatɛ
taagba buɛɛ
na bɛbla siin aani kalɛ na ɛpu ntu bɔɔta ku bukeye.
19Na bekyuli bemomo bina kalɔ lɛlɔ
utulo ɛpu kɔnwinimi.
Na nka lɛɛɛdubo bɔya
na kadi badi
badi-mii lɛlɔ na bayila-mii udu.”
20Anwuɔsu ɔƒaani ni, bɛtɔlɔ Babel!
Na si bɛ́yu ulu bísela ni, na biteedie lɛnu taatɔ ku ebiti.
Na lɛlɔ lɛyɔ-mii na biteebo kudu
na ukyuli biala unu-mii kɔku bɛnini,
“Unwoti údie nwuna kabla ɔblane Yakob.”
21Ɔ́kpanku-bu ɔ́sia kalɔ kakwiidi kemmo
na ɔ́ya na ntu bɔ́bwɛ bɔ́lɛ lɛtakpɛ kemmo
na bɔ́ni na bɔ́du bula utukwɛ.
22Nsu Unwoti úse kenye ɔnii,
“Ukyuli ukpidi biala ulákɛ atu bɔyɔ.”
Currently Selected:
Yesaia 48: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
