Yesaia 47
47
Babel Úbuli
1“Babel, awɔ ɔni nse aani ugblebi adagyaa,
ta ƒula lɛgadi liboku lɛlɔ, na etélie ɔtumu akɔ,
ɔsika ukyuli ɔdi ɔsɔ ɔɔɔdubo-ɔ bɔlɔ ɔnii
ukyuli ɔni náƒɔ kuye na baabu-nwu.
2Teesie na atálɛ akɔnkɔ na kukɔ lɛlɔ na ataakɔ ɔlaaƒɔ.
Na ada ƒula lɛdiku lɛni na eetile anumi ebimi.
Na ani ƒula awu gyɔlɔɔ ɔmmɔ akɔliku katɔ
na edie ƒula lɛgba ku
ebuli ewi
na akya ntu lɛgba avia ketu kammɔ.
3Bekyuli badubo-ɔ kasɔngya bɔnu
na kɔƒa kukpo-ɔ,
ɔsika adubo bɔvi ku kasɔngya.
Na ndubo kasi budie na ɔdi ulébu iye ukeli.
4Ami ndi Unwoti Ɔyikune Ƒui, Israel Katɔti, Kedee.
Na ami mɔɔƒɔ́-ma ngba.
5“Babel, bile kenye kpoo
na asɔ elie kasuudikɔ mmɔ,
ɔsika kadi kadi bekyuli basɔ baaadubo-ɔ bɔnu
aani bana uleku ɔga.
6Kɔnyi na líti lɛ́kya mina bekyuli
anwuɔsu na lɛ́ya na bíƒie-ma kalɔ bɛ́ƒɔ,
na bɛ́ya na kɔƒa kúkpo-ma na anumi éwi-ma kalɔ.
Bítanu-ma kɔnyana
munu munu,
mmomu bɛ́bla-ma kalala
útédu bana benengu ƒui lɛlɔ.
7Ɔ́bla-mii aani bɛdubo lɛga lɛmmɔ bɔdi
buteesie uwi ƒui.
Na bɛ́sɔ bítabu ala ani na bɛɛbla lɛlɔ bítanu,
na ubo-mii kasusu kemmo ka
lɛla lɛdi lɛdubo amii lɛnɔ bɔbla.
8“Bɛ́bu bɛnii amii kani ndi bayikune ntulo ƒui,
na amii bilénwini bekpinele,
na bina bebi lɛnɔ belekpi.
Mmomu lɛla lɛni kani lɛlɔ na bina anu asia ndi,
bɔdi ku bɔni ngba emini.
Nsu binu lɛla lɛni na
mɔɔsu-mii ɔƒɛni.
9Bina evo ku bɔkanti ƒui kenye kadubo bukulo
na binwini bekpinele,
na bina bebi lɛnɔ bekpi kɔnakunwi
ɔni na kama bɔnu buuubo.
10Bɛ́bɛ binye bina ekpidi pii ani na bɛɛbla kama
aani kekpo lɛgyumanala na bíse kayi bɛɛsu bɛnini,
‘Ukyuli ɔdi ulanu-bu!’
Nsu bina lɛlati ku lɛnunda líse-mii lisusu,
na bɛ́kali ka amii kani ndi bayikune bani mɔɔdi lɛlɔ.
11Nsu na bina tati tese kemmo ni,
ɔgbankpi ɔdubo-mii bɔlɛku,
na bina evo ammɔ ƒui aaadubo-mii bubunku munu munu.
12“Amii binye bitaabla bina evo,
na bitaakanti kalɛ kani na bítaabla,
ɔƒɛni kalɛ bina evo ammɔ adubɔkya ukyuli ɔdi liƒu!
Bɛya na buti-nwu lɛni.
13Bíitu lɛlɔ bɛ́vi bɛɛwia kasusu
na bekebone ku bani mɔɔnu kɔbuli
taasu-mii ala kudɔ uwi gyɔlɔɔ mɛni.
Bɛsɔ binwini bisie
na bitéye-ma ala
ani ndubo bɔlɛ ku kalɛ na bɛdubɔkɛ bɔƒɔ.
14Bekyuli bani néti bana anu básia bekyuli
bani mɔɔnu ayabi taasu-ma ala lɛlɔ ni,
bana lɛlɔ libo kɔnyana geen
utulo lɛtɔ lɛni na bákya ogya kemmo na lɛɛkywí.
Na ukyuli biala ɔni mɔɔwa-a
ogya ɔmmɔ udu muedi lɛlɔ lilábla gugungu.
15Bekyuli bani na bɛ́bi bɛsiaku
usien ku ɔƒɛ bina ngba emeyi ƒui ni,
ɔmmɔ ndi bana kawɔlɔkɔ kebunku
kani na bakana-mii bute,
na ama alati baaagyi kesii kani na bésela
na balakana-mii bɔƒɔ lɛnɔ.”
Currently Selected:
Yesaia 47: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
