Yesaia 42
42
Unwoti Kabla Ɔblane
1Unwoti ɔnini, “Aanu mina kabla ɔblane ɔni na lɛ́ƒuna,
mɔɔyɔ́-nwu geen na nnye-nwu kama kpakplaa lɛnɔ.
Líti mina Kɔyu lɛ́kya-nwu lɛlɔ kemmo,
na ɔdubuti ala bɔbla ulu
lɛlɔ siin
buboku kayawi kadi
bekyuli ƒui.
2Ulakyaku ukyuli ɔdi unyeƒi
iye bɔva.
Na ɔdi ulénu-nwu lɛdi
na kuyeya ulu lɛlɔ.
3Ugyii ɔni na ɔ́bu unye ni, ulaƒɛ-nwu uledie.
Na ogya ɔni mɔɔyuɛ ni, ulenine-nwu uledie.
Mmomu ɔdubɔdi litemi lɛlɔ,
na uti ala bɔbla ulu lɛlɔ siin
uboku bekyuli akɔ
uwi ƒui.
4Ulayila nwuna lɛnunsia, na enu lɛnɔ alaƒɛ-nwu
úti útédu uwi ɔni na ɔ́ya na ala bɔbla
ulu lɛlɔ siin bɔ́ƒɔ kalɔ ƒui lɛlɔ.
Na kadi bamba kɔlɔ bekyuli ƒui báƒɔ nwuna ala ani na ɔɔtina.
5“Ami ndi Unwoti Katɔti ɔni nédie katɔ lɛ́ƒala kayaa.
Na ami nédie kalɔ ku ala ani na akya-ka kemmo ƒui.
Na bekyuli bani ƒui nli kalɔ
lɛlɔ ni,
ami muute-ma ngba ku ɔƒɛƒɛɛ ɔni na baanwuna.
6Lɛ́ƒuna-a ka eti ala bɔbla ulu siin lɛlɔ eboku bekyuli akɔ.
Na anwuɔsu na nnye-ɔ kudɔ.
Lɛ́ƒuna-a na lɛ́tala-a ka enwini bukeye
ku mina bunyimi kenye
kani na líse
ete kayawi kadi bekyuli.
7Na adubɔya na banumbwɛne basɔ bataanu
na aya na bekyuli bani na likpidi líbo-ma lɛkpu
na bakya kasuudikɔ aani batɔntɛne
bakɛ bɔnwuna na balɛ bana ekpidi kemmo.
8“Ami ndi Unwoti na lɛɛɛdubo bunye bɔnu
na baƒiɔ iye ukyuli ɔyawine ɔdi ɔta unye ɔnii
ami ku-nwu buule mina bukeye
ku bumwi bɔni na ɔlɛka bekyuli beti bete-mi.
9Bɛnu! Ala ani ƒui na lɛ́su ka adubo abálɛ ni,
álɛ lɛni sɔsɔ kalɛ kani na lɛ́su.
Na ɔƒɛni ni, ndubo-mii ala ani nsɔ ndubo abálɛ bɔsu.
10“Bɛsu kayawi ƒui na bedie ɔnu ɔwɔdi bete ami Unwoti.
Na bɛsu bani ƒui nkɛ ɛpu anumi baaví
ku bani nli kalɔ ɔgyu kakaaka ƒui bɛnii
basalaku-mii na beti bumwi bete-mi.
11Bɛsu adua ani bekyuli nli kalɔ kakwiidi lɛlɔ
ku bani na abi lɛlɔ ƒui bɛnii
batɔ na badi limeyi na bedie lɛnu.
12Na bebo kudu kenye kani na ɔ́su úse na kesi kesii.
13Unwoti ɔ́nya kalɔ ɔɔví aani ukpone,
na uudie lɛdi ku kɔnyi momoomo
uwi ɔni na uubó nwuna bekisine teewi kalɔ.”
14Mmɔ na ɔ́su ɔnini,
“Nnye mɔɔnu-mii kpoo,
na naaakpete-mii uwi gyɔlɔɔ mɛni.
Nsu ɔƒɛni amu ni, ndubo bɔva
na nteedumo aani uleku ɔni ntɛ kɔwɔ.
15Ndubo bɔya na abi ku abinkpo ƒui ayii udu,
na livo ku lɛku kemmo egyii ammɔ ƒui akwii.
Na lɛya na ntukpa ku abiɔ ƒui akwii.
16Na ndubɔtɔnku mina banumbwɛne
bɔsiaku ulu ɔni na baaagyi kudii lɛlɔ.
Na lɛkpanku-ma lɛsiaku ulu
ɔni lɛlɔ na bátasia kudii lɛlɔ.
Na ndubɔya na kasuudikɔ
kani na bakya kenwini bukeye.
Na kesii kani na kese kpukplo kpukplo
kabla suɛlɛ suɛlɛ.
Na ndubo ala amɛni bɔbla
ɔni na lɛɛɛdubo-nya bɔda buse.
17Nsu bekyuli bani na baƒiɔ
bani na bekyuli bávɔ
na basia anu
na baalɔ-ma baƒiɔ bayikune ni,
badubo bunwini ku kɔƒa.
18“Amii batutine binu,
na amii banumbwɛne bɛnu!
19Ɔma bene ndi banumbwɛne ku batutine bammɔ
si ɔɔɔdi amii mina kabla bablane
bani na lɛ́ƒuna na bɛdi mina batu?
20Bɛ́ɛnu mina ala bɔbla,
nsu bɛɛdaku-ni,
na bina atu ewi, nsu bɛnii
bilénu lɛla lɛdi kalɔ.”
21Ka Katɔti use siin na ɔɔbla lɛla biala kaduɛ ɔsu ni,
ɔdi-nwu lɛƒɔyɔ ka bekyuli banu
kalɛ na nwuna ɔda bubo buukeye na bemwi-nwu.
22Nsu nwuna bekyuli bamɛni na béƒie bátɔlɔku
na bákya-ma lɛtɔ ku libu kemmo
na ukyuli ɔdi uuubo na udie-ma.
Na béƒie bana akɛla ƒui báƒɔ
na bekyuli bammɔ belenu kalɔ ka basɔku-nya bete-ma.
23Bi ɔsu na bekyuli bamɛni balatɛya
kalɛ beenú litemi?
24Israelƒuɔ bábla likpidi
na béni banii belenu Unwoti litemi
iye basiaku nwuna ala bɔtina kama.
Ɔmmɔ ɔsu na Unwoti ɔ́ya na béƒie-ma ala ƒui báƒɔ.
25Úti kɔnyi ɔ́kya-ma, anwuɔsu na ɔ́ni-ma kɔtu
na kekpo kénwini ogya na ɔɔda na bana kɔlɔ lɛlɔ.
Nsu ɔmɛni ƒui útabla-ma
lɛla lɛdi
na benu-nwu litemi.
Na baaadaku-ni ina dɛ na
ogya ɔmmɔ ɔ́ka ɔ́mana-ma
na uuĒ-ma muedi.
Currently Selected:
Yesaia 42: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
