Yesaia 41
41
Israel Kadi Ubunkune
1“Amii ntuntɛ kɔlɔ ƒui bɛbla kpoo na mina anumi!
Bise kayi na bɛni bide-mi ku bina etemila
amii kadi kadi bekyuli ƒui.
Na bɛya na bɔsa na litemi katɛkɔ.
2“Ɔma náƒuna lɛlɔ ɔdine ɔmɛni ɔ́siku ɔƒɛ katukɔ
ɔnii ubabla-nwu kabla na ulu siin ɔmɛni lɛlɔ?
Na ɔma náya na ɔɔdi kadi bekyuli ƒui
ku baga baga lɛlɔ na uuboku-ma kalɔ?
Na nwuna kewii ku atula eesusu-ma
na beenwíni ɔtumu ɔni na ɔƒɛƒɛɛ uubó taavinku?
3Ɔɔbɔku-ma ku usi ɔni na alati
si nwuna lɛgba muedi lɛsɔ liitúku kalɔ.
Na lɛla lɛdi lɛnɔ lilatu-nwu na ɔƒɔ ɔlɛ ɔdi.
4Ɔma mɔɔyá na ala amɛni aalɛ́
na ɔɔnu ana bɔlɛ lɛlɔ na kaba kaba bekyuli akɔ
ɔ́si kalɔ kesekɔ útédu kawɔlɔkɔ?
Ami Unwoti na ɔdi!
Ami nli asa na lɛla biala lɛdubuse kalɔ
na ndubo bulie na lɛla biala libo kawɔlɔkɔ.”
5Ntuntɛ kɔlɔ bekyuli ƒui útédu kalɔ kammɔ kawɔlɔkɔ
bánu lɛla lɛni na lɛ́bla na liƒu líƒie-ma
na baatɔ́ kpakpaakpa ɔni na bási badubo.
6Na ɔdi biala uubunku ɔkpanadi
na beesé lɛlɔ kayi taasu banini,
“Bitaya na ɔmmɔ ukpoku-mii,
binye momoomo!”
7Na banwine ku bakywɛne
ku baƒiɔ bammɔ kabla bablane bamba
bákya lɛlɔ ogya na béte lɛlɔ adaku
ka ama ndaku kabla.
Na béku baƒiɔ bani na bávɔ mmɔ bálɛ kalɔ
kalɛ na balálɛ belébo.
8“Nsu awɔ Israel, Yakob kaba,
adi mina kabla ɔblane.
Lɛ́ƒuna-mii na bɛdi mina ɔkpana Abraham kaba kemmo bebi.
9Lɛ́kpanku-mii lɛ́siku kalɔ ɔgyu
na kana kɔkunɔ ƒui líboku mɛni na lɛ́su-mii nnini,
‘Amii ndi mina kabla bablane baƒunadi na ńteni-mii.’
10Bitayia, nliku-mii.
Liƒu lɛsɔ litada-mi na bitaatɔ kpakpaakpa.
Ami ndi bina Katɔti.
Ndubɔya na bɛkɛ ɔyikun, na libunku-mii.
Ndubɔtalaku-mii katɔ ku mina ɔyikun ablala ani nse siin.
11“Ukyuli biala na uukisi-mii
na ɔ́ta unye-mii lɛlɔ ka
ukpo-mii ni,
kɔƒa kɔdubo-nwu bukpo na ɔyii udu.
12Na bɛsɔ bilanu bina bekisine badi na kesii kadi,
ɔsika badubɔyii udu ƒui
na basa na kalɔ kammɔ lɛlɔ.
13Ami ndi bina Unwoti Katɔti ɔni nda-mii kɔnu
anwuɔsu bitayia, ɔsika nnye-mii kudɔ
ka libunku-mii.
14Amii Israel kadi bekyuli,
bɛda lɛlɔ bukpoku bɛya
ina bekyuli baanu-mii aani liklubi
iye biiimomo na bɛɛɛdi
lɛla lɛdi.
Amii ndi Israel Katɔti kedee
ɔni mɔɔgyumana-mii na mɔɔƒɔ́-mii ngba.
15Bɛnu! Ndubo-mii bɔbla
aani kukɔ
kɔni anyi mbo ɔbi kaduɛ
na bɛdubɔkɔ bɛvi abi ƒui
lɛlɔ bɔbla
kpɛtɛ kpɛtɛ aani ɔtumu.
16Na bibo-nya bitéwi aani kalɛ na baaƒɛ́ lɛla lɛdi,
na ɔƒɛƒɛɛ uti lɛla biala ɔtɔlɔku.
Nsu amii ni, lɛlɔ lɛdubo-mii bɔyɔ
na bimwi ami bina Unwoti Israel Katɔti kedee.
17“Uwi ɔni na bawabane
ku bani na bese kpɛtɛ kpɛtɛ beekpi utukwɛ
na balakɛ ntu na bani ni,
ami Unwoti Israel Katɔti ndubo
na mbedie-ma na naaayiƒala-ma kudii.
18Ndubɔya na ntukpa bɔlɛ bɔsi
abi eli
na bɔgba butéyi ɔkwalɛ
ɔmmɔ ƒui.
Na kalɔ kakwiidi kani na kaládia lɛla lɛdi
kadubɔlɛ abiɔ na unwini lɛba muedi.
19Na ndubɔya na egyii enengudi
ani na ebo ɔkplu lidu lidu
aƒɔ ketele kalɔ kakwiidi kammɔ kemmo ƒui
aani Sida ku akasia ku abambadi udu.
20Na bekyuli ƒui badubɔnu ɔmɛni na bati
na ɔbla-ma nwaa ka ami Israel Unwoti Katɔti kedee
nédie ala amɛni ƒui.”
21Ɔmmɔ kama ni, Unwoti
ɔ́sɔ ɔ́su-ma ɔnini,
“Ami ndi Unwoti Israel Ɔga!
Biti bina litemi biboku
na bɔtɛ bɔnu na bidie lɛlɔ kenye.
22Na bɛlɛku bina baƒiɔ biboku
na basu ala ani nálɛ ábavi ɔ́si kukuuku na bunu.
Na basu ala ani ndubo abálɛ uwi ɔni mebo lɛnɔ
na bɔti-nya buse ku uwi ɔni lɛnɔ na adubo bɔlɛ.
23Na bɛsu-bu lɛla lɛni na uwi ɔni mebo mmɔ
ɔdanku ɔduboku,
na bɔti ka bɛdi baƒiɔ bayikune.
Bɛbla akɔla budie taatina bɔdi na bɔnu,
likpidi lɛdi o-o, lɛbuni lɛdi o-o ni,
na bɔnu bɔyia ku liƒu, na bina ala abla-bu yaa.
24Nsu amii ku bina ablala ƒui
bɛdi lɛƒua
na biiibo kɔsia kɔdi.
Lɛni kani na ukyuli ɔni maƒuna-mii
ɔnii bɛdi-nwu lɛla lɛdi
ɔdi ukyuli ɔni muusé lɛlɔ geen.
25“Líitiku ukyuli ɔni ndubo ubadi-ɔ lɛlɔ
lɛ́siku katɔ kakɛ
na ɔdubɔsia ɔƒɛ katukɔ uteebo
kalɛ na ubeti ɔbu ute
mina lɛnyi.
Na ɔɔkɔ́ taavi lɛlɔ badine lɛlɔ
aani kalɛ na baawɔ́ lɛvɔti na kaawɛ kemmo.
26Bina akɔ ɔmani násu lɛla lɛmɛni udu úse
na bekyuli bati batualaku lɛtɔtɔ
na básu lɛnɔ ka lɛla lɛni na ɔ́su lɛdi sɔsɔ?
Baƒiɔ badi bátasu ɔmɛni
bétese dii.
Na ukyuli ɔdi lɛnɔ uuubo
na ɔsu ɔnii únu kenye kammɔ udu kudii.
27Ami náka Yerusalem kadi bekyuli
lɛla lɛni mɔɔlɛ́ mɛni bɔsu.
Na ami néti litemi buni lɛmmɔ
lɛ́kya ɔtu ɔdi kenye.
28Baƒiɔ bamɛni akɔ ɔdi uuubo na uute kasusu
iye udie lɛla lɛdi kenye si líye-nwu lɛla lɛdi.
29Baaadi lɛla lɛdi
na balákana lɛla lɛdi
lɛnɔ bɔbla.
Mmomu buse na bese aani ɔƒɛƒɛɛ
ɔni mɔɔnwuna taavi kani.”
Currently Selected:
Yesaia 41: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
