Yesaia 40
40
Badubɔsia Katɔti Bekyuli Kɔnu
1Katɔti ɔnini, “Sia mina bekyuli kɔnu.
2Na atɛmiku Yerusalem ku lɛdi buɛɛ ku bɔyɔ,
na aya na bati ka bana kabla ku lɛbibo lɛ́sa.
Na báƒɔ bana ekpidi lili kayu,
ɔsika Unwoti ɔ́ni-ma kɔtu ɔ́sia kama kunyɔ kunyɔ
na bana ekpidi ɔsu.
3Ukyuli ɔdi ɔkɛ ɔɔva
na ketele kalɔ kakwiidi kemmo ɔnini,
‘Bɛklibi ulu bise bite Blɔti,
na binyene ulu ɔmmɔ na kalɔ kakwiidi kammɔ kemmo,
na bɛbla ulu unengudi bite Katɔti.
4Biyile lɛbonka na bɛbwɛ abinkpo ƒui na atɛ kalɔ.
Na kesii kani nse kpukplo kpukplo ni,
bɛbla na ɔbla suɛlɛ suɛlɛ.
5Na Unwoti ɔni muukeye ni, ɔdubɔda ɔlɛ kayaa
na ukyuli biala ɔdubɔnu-nwu nwaa.’ ”
Lɛni na Unwoti ɔlati ɔ́su!
6Lɛdi lɛdi lɛ́su-mi lɛnini, “Va momoomo na atɛmi.”
Amu na líye nnini,
“Bi na nva nsu?”
Lɛdi lɛmmɔ lɛ́su lɛnini, “Su anii,
‘Bekyuli ƒui bese aani lɛku kemmo alakpi,
na ukyuli bɔdia buse aani alakpi anwula.
7Alakpi aayɛyɛ na anwula aanú.
Ɔsika Unwoti ɔ́ya na ɔƒɛƒɛɛ úkpo ɔ́vi-ni lɛlɔ.
8Livo lɛɛyɛyɛ na anwula aanú,
nsu Katɔti litemi ani lise lite uwi ƒui.’ ”
9Awɔ ɔni nda litemi buni éboku Sion ni,
kɔ sie abi kangyaa ammɔ eli.
Na awɔ ɔni nda litemi buni éboku Yerusalem ni,
kɔliku ƒula lɛdi katɔ momoomo.
Va momoomo, na tayia!
Su Yuda lɛma lɛmmɔ anini,
“Aanu ƒula Katɔti!”
10Bɛnu, Unwoti Ɔyikune Ƒui ɔ́si ɔdubo
ubadi bekyuli lɛlɔ ku nwuna ɔyikun bonwu.
Bɛnu, ɔdanku lɛyuƒɔla ku kɔnu bɔsia etela úboku bekyuli.
11Ɔɔtɔnku nwuna badi aani baƒonu ɔdane buni,
na ɔɔgyu baƒonubi bammɔ taada enu.
Na ɔɔda-ma taamana nwuna kayi.
Na bani nda bebi ni, ɔɔkpanku-ma buɛɛ.
12Ɔma ndubɔkana na ɔkɔku ɛpu ntu bumomo
ku bɔgyu na nwuna lɛkɔkɔ iye unene kayaa
ku nwuna enu na ɔti kana bune?
Ɔma ndubɔkana na ɔsala kalɔ kamɛni lɛti
uwi kagyigyɛ kemmo?
Na ɔma ndubɔkana na uti abi ku abinkpo
ɔsia unu lɛkɔkula lɛlɔ, na ɔti-nya unu?
13Ɔma nénu Unwoti kasusu
kalɔ dii
iye ɔma ndi nwuna kasusu utene ɔni nákya-nwu kakwɛ?
14Ɔma na Unwoti úye ɔnii ɔtina-nwu lɛla lɛdi asa na ɔ́ti.
Na ɔma nátina-nwu kesii kani na ɔsia?
Ɔma néte-nwu lɛlati iye ɔ́tina-nwu ulu
ɔni na ɔsia unu ala kalɔ?
15Geen ni, bekyuli bayawine baaadi lɛla lɛdi na Unwoti anumi.
Mmomu buse bese aani kalɛ na ntu buudú
teebo lɛkpibui kemmo kani
iye aani ɔtumu na unu
lɛnila lɛlɔ.
Na ɔɔnu ntuntɛkɔlɔ ƒui aani ɔtumu
na nwuna lɛkɔkɔ.
16Lebanon egyii ƒui étedu ka
basala-nya ogya babla lɛkpa.
Na bebuo bani nkya Lebanon abi lɛlɔ mmɔ ƒui
bétedu ka beti-ma bakyula babla akpala bete Unwoti.
17Kayawi kadi bekyuli ƒui baaadi Unwoti lɛla lɛdi
na ulánu-ma taakya lɛla lɛdi kemmo munu munu.
18Na si use lɛni ni,
ɔma na ukyuli ɔdi
ɔdubuti Katɔti bɔkɔku,
iye bi udu na ukyuli ɔdubɔnwi
uti ɔtina kalɛ na Katɔti use?
19Katɔti uuuse aani lɛla lɛni na bakywɛɛne
bánwamana sika ugyiedi bámana
na béti sika ɔƒualadi asɛɛ bákya-nwu bɔdia.
20Na bekyuli beeti ugyii kpakplaa
ɔni na bánu ka ulebun.
Na bawia ɔnwine ɔni ndubɔnwi lɛla lɛmmɔ
unyene na ulálɛ ulébo.
21Bɔgyi na bɛɛɛgyi tɔ ukyuli ɔni na Katɔti ɔdi?
Munuu bítenu tɔ?
Na ɔdi lɛnɔ útasu-mii tɔ ɔ́si kalɔ kesekɔ?
Bítenu tɔ ɔmɛni kalɔ ɔ́si ɔni na údie kayawi?
22Anwu ɔni nédie kayawi ni,
uli nwuna lɛgaboku lɛlɔ
na ɔɔdi kayawi bekyuli ƒui lɛlɔ ɔ́ka ɔ́mana
ɔ́si kayaa katɔ katɔ ƒui.
Údie kayaa kammɔ na kebi bekyuli lɛlɔ
na bakya-nwu kemmo aani kɔdi kevo bonwu,
na ɔɔnu-ma teemene aani bakpɔtilikpɔ.
23Uuboku bagabi kalɔ
na ɔɔyá na kayawi lɛlɔ badine ƒui baayii udu
na basɔ baaadi lɛla lɛdi na bekyuli anumi.
24Bese aani egyiibi akɔdi ani na bágyu bátálɛ,
na uwi útetu tɔ ana lɛlɔ na bedie ligyiitu,
asa na Unwoti ɔ́ya na ɔƒɛƒɛɛ úkpo ɔ́vi-nya lɛlɔ,
na áyɛyɛ na ákwii ábla
aani lɛtɔ
lɛni na ɔƒɛƒɛɛ uuti taavinku.
25Ɔma na bɛdubuti Unwoti Kedee bɔkɔku?
Buse na ukyuli ɔdi use aani nwuna kalɛ?
26Bɛkɔliku bina anumi katɔ na bɛnu kayaa,
na biye lɛlɔ bɛnii ɔma nédie ala ammɔ ƒui?
Anwu mɔɔlɛ́ku ayabi keyi unwi unwi
na ɔ́sia ɔdi biala lɛnyi.
Na ɔkɛnku nwuna ɔyikun bonwu ɔsu ni,
lɛyabi lɛdi liláyii nina kenyekɔ.
27O Israel, bi ala na bɛɛká taasu
ka Unwoti ulánu bina ala ani muukpóku-mii taati,
na ɔɔɔdaku-mii lɛda lɛnɔ?
28Bɛɛɛgyi na bítenu dii lɛnɔ
ka Unwoti ndi Katɔti ɔni nli usela uwi ƒui,
na anwu nédie kayawi ku kana kemmo ala ƒui?
Lɛlɔ liletu-nwu kudii na ukyuli ɔdi lɛnɔ
ulakana-nwu kasusu bɔkɔku bɔnu kalɛ na kese.
29Anwu mɔɔsɔku ɔlɔkplu teete bekyuli
bani na lɛlɔ lítu na bese kpɛtɛ kpɛtɛ.
30Bakloƒu ku begblebi muedi lɛlɔ liitú-ma
na baabla kpɛtɛ kpɛtɛ na baagbánta teebuli.
31Nsu bani néti bana anu básia Unwoti lɛlɔ ni,
bana ɔyikun ɔdubɔsɔ ɔbla ɔwɔdi.
Na bana ɔyikun ɔdubuse
aani kalɛ na kɔdigbo aasɛ uuveyi taavi kayaa.
Na badubo usi bukeli na balanɔ bukeli.
Na badubusie lɛgba na lɛgba lilakpulu-ma.
Currently Selected:
Yesaia 40: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
