Yesaia 37
37
1Uwi ɔni na Hesekia ɔnya únu bekyuli bammɔ kenye kani na ɔ́ni nwuna adala ɔ́duli na lɛƒɛda kemmo, na úti adikpi ɔ́da lɛlɔ na ɔ́tɔlɔ úsie Unwoti kakpakɔ. 2Na ɔ́tala Eliakim ɔni mɔɔnu ɔga kaduli lɛlɔ ku Sebna ɔni ndi ɔku unwenine ku bakpane benengudi ɔ́kya Amos ubidi Kenye Udiene Yesaia na bana ƒui benyimi adikpi. 3Na kenye kani na Hesekia ɔ́su-ma ɔnii batásu-nwu ndi ɔnini, “Ɔmwi limeyi lɛmɛni lɛdi kɔnyana limeyi geen ɔni na bédumi-bu na béwi-bu anumi kalɔ. Na buunú ɔlɛ aani uwi ɔni na kawɔƒɔ ubi údu bɔwɔ, nsu ɔyikun ɔ́sa ɔƒɔndane ɔmmɔ na ukyuli ɔni na ɔƒɔ ute-nwu uuubo. 4Na ɔƒɛni kalɛ Unwoti ƒula Katɔti únu ala ani na Asiriaƒuɔ ɔga ɔ́tala nwuna bekpone benengu na bábasu-bu na bédumi Katɔti ɔni na uli ngba. Na muuvele nnii ƒula Unwoti Katɔti unu edumi ammɔ na ɔni bani nédumi-nwu mmɔ kɔtu. Anwuɔsu kpali Katɔti na evele ete bula bekyuli ku abu bani nli ngba.”
5Uwi ɔni na Yesaia únu Ɔga Hesekia kenye kammɔ ni, 6Yesaia ɔ́su-ma ɔnini, “Bitásu bina ɔtɔlati ɔga bɛnini, ‘Unwoti ɔnii bitakpete edumi ani na Asiriani kebii kammɔ kátala nwuna benengu na bábasu-mii úti údumi-mi. 7Unwoti ɔdubɔya Asiriaƒuɔ ɔga ɔmmɔ unu etemila adi ɔsiku nwuna ɔma na ɔmmɔ ɔdubɔya na unwini usie nwuna ɔma. Na si útéduo ni, Unwoti ɔdubɔya na badu-nwu na mmɔ.’ ”
8Uwi ɔni na Asiriaƒuɔ unengu ɔmmɔ únu ka bana ɔga ɔ́tɔlɔ Lakis na úsie ɔ́kya Libna amadɔ uukpó ni, úsie mmɔ na útánu-nwu.
9Na uwi ɔmmɔ kemmo ni, kenye kédu Asiriaƒuɔ Ɔga Sanaherib ka Egyipteƒuɔ bekpone báklibi lɛlɔ na bana Ɔga Tirhaka ɔ́tɔnku-ma ka bébekpoku-ma. Anwuɔsu ɔ́sɔ ɔ́tala batu ɔ́kya Yudaƒuɔ Ɔga Hesekia ɔnini, 10“Kayi katatɔlɔ-ɔ na aƒɔ ƒula baƒiɔ bani na aakpá adi anii ɔ́su-ɔ ɔnii, ‘Asiriaƒuɔ ɔga ulakana Yerusalem ɔma lɛlɔ bɔdi.’ 11Ngyi nwaa ka énu kalɛ na Asiriaƒuɔ ɔga ɔ́bla kɔlɔ kɔni na amadɔ ƒui ku kalɛ na ɔ́yila-ku udu kede kede. Na aabu ka awɔ adubɔkana na alɛ-mi enu kemmo? 12Na mina bati kuuku báyila Gosan ku Haran ku Reseƒ na báyila bana lɛma udu. Na bádu bekyuli bani nli Eden na Telasar. Nsu bana baƒiɔ badi biala bátakana-ma bukpo bɔ́ƒɔ. 13Na wɛ na Hamat ku Arpad ku Seƒarwaim ku Hena ku Iwa baga bakya ɔmwi?”
Hesekia Ɔ́kpali Katɔti
14Ka Ɔga Hesekia ɔ́ƒɔ ɔku ɔmɛni ɔ́siku batu bammɔ kudɔ na ɔ́ka ni, úti ɔku ɔmmɔ úsienku Katɔti kakpakɔ na útébi-nwu úwi Unwoti anumi. 15Na ɔ́kpali Katɔti ɔ́su ɔnini, 16“O Unwoti ɔni ndi Israelƒuɔ Katɔti, awɔ nli ƒula lɛgaboku lɛlɔ na katɔ katɔ na kesii kani na Kerub ngba bebweyi bammɔ begyingya bana avwi bámana. Na awɔ lɛti ndi Katɔti ɔni mɔɔdi kayawi kamɛni lɛgakɔdikɔ ƒui lɛlɔ. Na awɔ nédie katɔ ku kalɔ. 17O Unwoti, se atu na enu, na ebimi anumi na anu. Nu etemila ani na Sanaherib ɔku ɔni na úti úmene, na uudumi awɔ Katɔti ɔni nli ngba ɔdanku.
18“Unwoti, ɔdi litemi geen ka Asiriaƒuɔ baga béekpo kadi bekyuli bamɛni ƒui na bébile bana kɔlɔ. 19Na bébo bana baƒiɔ bákya ogya kemmo na báyii udu, ɔsika baaadi bayikune badi, mmomu ligyii lɛnwidi ku atabi ani na bekyuli béti bana enu bábla bése lɛlɔ na badi. 20Na ɔƒɛni ni, O Unwoti, buvele na bɔda-a bɔnii die-bu na nwuna enu kemmo, kalɛ na kayawi lɛga kɔdikɔ ƒui bekyuli banu bati ka awɔ kani ndi Unwoti ku Katɔti ɔmmɔ.”
21Amu na Amos ubidi Yesaia ɔ́sia Hesekia kenye ɔnini, “Lɛni na Unwoti ɔni ndi Israel Katɔti ɔɔsu ɔnini,
“ ‘Ka ami na ákpali átɛmiku ɔkɛnku Asiria Ɔga Sanaherib
kenye kani na ɔ́su ɔsu ni,
22ami Unwoti lɛ́ya na Yerusalem
ɔni ndi ugblebi adagyaa ɔ́pii Sanaherib,
na ɔɔmá-nwu,
na bukeli bɔni na ɔdubo bukeli ɔsu.
23Ɔma na akya eedumi taama?
Na ɔma na aakwanyi taakya ku lɛdi momoomo?
Na ɔma na aanu ɔnusɛ ku bɔpii?
Ɔɔɔdi Israel Katɔti Kedee ɔmmɔ!
24Átala bekyuli ákya Unwoti,
na bákpila-nwu edumi.
Na ásu anini,
“Nkɛnku mina bapɔnkɔ kɛɛkɛ lɛlɔ na lɛ́ɛkɔ abi
ani na ákuku ƒui eli lɛ́vi
ku Lebanon kesii kani bene na kákuku ketulo ƒui.
Na egyii kpakplaa ammɔ ƒui líkulo-nya líwi kalɔ,
ku egyii abuni ani nálɛ enye salaa ƒui.
Na kesii kani na kadi kabɛkɔ ƒui líduo mmɔ bene lɛ́lɛ,
kesii kani na kadi lɛkumiɔ geen.
25Na líku abiɔ lɛ́kya kesii kani na kadi baƒɔ kɔlɔ kemmo,
na lɛ́ni ntu na mmɔ.
Mina lɛgba kalɔ geen na líti lɛ́nya Egyipte ntukpa
bɔni nákwii mmɔ.” ’
26“ ‘Bunu na étenu ɔmɛni kudii?
Ami nábla ala amɛni líse kukuuku.
Na lɛ́tina kalɛ na adubo buse na uwi ɔni návi ƒui kemmo.
Na ɔƒɛni lɛ́ya na ébo-nwu kemmo.
Na ákana na énwini lɛma linengudi lɛni na bátu bámana ábla
aani atabi ani na bála básala lisu.
27Ami náya na kadi bani bekyuli nli mmɔ ɔyikun ɔ́sa
na bese aani livo lɛni mɔɔlɛ́ ɔwɔdi
na bɛ́kana-ma lɛlɔ bɔdi na bɛ́kya-ma kɔƒa.
Na bénwini aani lɛsa katɔ livo
lɛni na ɔƒɛ ɔ́kyula asa na lɛdubɔlɛ lili.
28“ ‘Nsu ngyi kesii kani na elie,
ku uwi ɔni na eebo taatɔlɔ,
ku kalɛ na aata ku kɔnyi taasiaku-mi.
29Na ka áta ásiaku-mi ku kɔnyi,
ku ƒula ukyuli tabu bɔni na línu ku mina atu ɔsu ni,
ndubɔkya-a ɔdaliwa enwu,
na liti kenye kabuli lɛbala-a kenye,
na lɛya na enwini asia ulu
ɔni lɛlɔ na ásia ébo.
30“ ‘O Hesekia, ɔmɛni ndubɔbla ƒula likposela.
“ ‘Na lɛkwa lɛmɛni kemmo ni,
edula ani na anya alati nákwɛ na adubo bɔdi.
Na lɛkwa bamba ni, edula akukudi
ani násɔ áta ebi na adubo bɔdi.
Nsu lɛkwa lɛtɛdi ni, awɔ ɔlati kya edula na aƒɛ-nya,
na ese adingyii mmo na ede ebi ammɔ adi.
31Na Yudaƒuɔ ɛlɛɛ bani nébu badubɔsɔ bedie ligyiitu
aani kugyii kalɛ besie kalɔ kemmo ɔgyu
na banwu ebi na kayaa.
32Ɔsika ukyuli ɔdi ɔdubɔlɛ ɔsi Yerusalem.
Na bani ndubɔkɛ ngba lɛnɔ basi Sion Kɔbi.
Ɔsika kalɛ na anumi égyie ɔsu
ɔdubɔya na ɔmɛni ubo-nwu kemmo lɛni.’
33“Anwuɔsu lɛni na Unwoti ɔɔsu taasiku Asiriaƒuɔ ɔga lɛlɔ ɔnii,
“ ‘Ɔɔɔdubo ɔma unengudi ɔmmɔ kemmo buduo
iye ubo nwuna kataminta kunwi muedi na mɛni.
Na ulebo mmɔ ku lɛgyumanala,
iye ubatu kesii kani na ɔdubunye
ukpoku ɔma ɔmmɔ ɔmana.
34Na ulu ɔni lɛlɔ na ɔkɛ úbo na ɔdubɔsɔ ɔsia ɔtɔlɔ.
Ɔɔɔdubo ɔma ɔmmɔ kemmo buduo.
Lɛni na Unwoti ɔ́su.
35“ ‘Na ndubɔgyumana na likpo lɛƒɔ ɔma ɔmmɔ,
na mina lɛnyi ku mina kabla ɔblane Dawid ɔsu.’ ”
36Na usien ɔmmɔ ni, Unwoti ɔtu ɔdi ɔda úduo Asiriaƒuɔ bekpone kakyakɔ na ɔ́du bekpone mpim eti atɛ ku avlaatɛ-ɛlɔ (185,000). Na ka kadi kegye ni, békpi batɛ mmɔ. 37Ɔmmɔ Asiriaƒuɔ Ɔga Sanaherib ɔ́ya na báta mmɔ na bénwini bésie Niniwe na bétélie mmɔ.
38Limeyi lɛdi ni, ka Asiriaƒuɔ ɔga ɔkya ɔɔkpá nwuna baƒiɔ Nisrok na nwuna kakpakɔ ni, ɔga ɔmmɔ bebi inyɔ bani ndi Adramelek ku Sareser béti bana kuwii na bétébeyi-nwu bádu na békeli bésie Ararat kalɔ lɛlɔ. Na ubidi bamba ɔni baalɔ bani Esarhadon úti-nwu keliekɔ aani ɔga kalɛ.
Currently Selected:
Yesaia 37: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
