Yesaia 36
36
1Na lɛkwa leevu-linedi kemmo ɔni na Hesekia ɔɔdi lɛga ni, Asiriaƒuɔ Ɔga Sanaherib útékpoku Yuda lɛma linengudi lɛni na bátu awodu bámana ƒui na úƒie-ni ɔ́ƒɔ. 2Ɔmmɔ kama ni, Asiria ɔga ɔ́tala nwuna bekpone unengu ɔ́kya Ɔga Hesekia na Yerusalem, na ɔdanku bekpone pii badi na bási Lakis ɔma kemmo. Ɔnii utásu Hesekia na ute lili ka ɔ́di-nwu lɛlɔ. Amu ka bakɛ ulu ni, batásia ulu ɔdi na ude adi bablane badi kabla kablakɔ na bébedu kesii kani na békulo ketu kadi ntu kasiakɔ na kási katɔ kakɛ bábla lɛba bonwu lɛdi na ude kemo kadi. 3Mmɔ ni, ɔga kesii kabla bablane benengu ɛtɛ bábasiaku ukpone unengu ɔmmɔ. Na unwi ndi Hilkia ubidi Eliakim, ɔni ndi aban unengu kenye unyene, ku nwuna ubunkune ɔni ndi Sebna. Na ɔtɛdi ndi Asaƒ ubidi Yoa, ɔku unwenine unengudi na ɔga kesii mmɔ.
4Amu na ukpone unengu ɔmmɔ ɔ́su-ma ɔnini, “Asiria ɔga ɔyikune nátala-mi ɔnii mbeye Hesekia nnini,
“ ‘Bi ndi lɛla lɛni lɛlɔ na ƒula anu asia ɔsu na eesé lɛlɔ kayi lɛni? 5Kekpo ɔyikun ku kɔkwɛ ni, ɔɔɔdi banii kenye kani na kadi. Na ɔma na aanu ɔsu na aawia ata enye Asiria ɔga ɔyikune lɛlɔ? 6Nu! Mɔɔsu-ɔ ka Egyipteƒuɔ lɛlɔ na ékpo kama. Nsu mɔɔyá-a na ati ka ugyii kakɛ kani ndubo bɔƒɛ bɔtu-ɔ kɔnu si éti ƒula unu ƒui ásia-nwu lɛlɔ na ɔdi! Ɔyikun ɔmmɔ udu na Ƒarao Egyipteƒuɔ ɔga ubo ute bani ƒui néti bana anu básia-nwu lɛlɔ. 7Na si bɔsu na ada-mi lɛnɔ anii, “Bula Unwoti Katɔti lɛlɔ na búkpo kama” ni, ɔɔɔdi Unwoti ɔmɛni na Hesekia ɔ́ya báƒɛ nwuna akpabi. Na ɔ́su Israelƒuɔ ku Yudaƒuɔ ka bataakpa Unwoti ɔmmɔ na lɛkpabi lɛni nlɛ Yerusalem lɛlɔ kani?
8“ ‘Bo na awɔ ku mina unengu Asiriaƒuɔ ɔga binyimi lɛla lɛdi. Na ndubute-ɔ bapɔnkɔ mpim inyɔ si adubɔkɛ bekyuli bani melie-ma lɛlɔ. 9Na mɔɔsu-ɔ ka alakana Asiriani ukpone ɔnamudi ƒui muedi lɛlɔ bɔdi ina ka éti anu ásia Egyipteƒuɔ bapɔnkɔ beliene ku bana bapɔnkɔ kɛɛkɛ lɛlɔ. 10Munuu aakali ka bɔta kani na lɛ́ta mbekpoku-mii keeke ɔni na ɔɔɔdi Unwoti násu-mi lɛla lɛdi? Mɔɔsu-mii nwa ka ni, Unwoti ɔlati násu-mi ka mbekpoku kalɔ kamɛni ƒui na lɛyila-mii udu.’ ”
11Amu na Eliakim ku Sebna ku Yoa básu bekpone unengu ɔmmɔ banini, “Awɔ ku ƒula bekpone bammɔ bɛtɛmiku-bu na Asiria lɛdi kemmo na bɔdubunu kalɔ. Na bitatɛmi Yuda lɛdi bitete-bu. Ɔsika bekyuli bani ƒui bákɔ bénye awodu amɛni lɛlɔ ni, bákya beenú ɔdi.”
12Amu na bekpone benengu bammɔ bédie kenye banini, “Bɛɛkali ka ami ku ɔga ɔmmɔ kani na bula ɔga ɔ́tala-bu ɔ́kya ka búbasu-mii etemila amɛni? Oowo! Bekyuli bani na bákɔ benye awodu lɛlɔ lɛnɔ badubunu ɔdi. Ɔsika ama lɛnɔ badubɔdi bana kuvodɔ na bani bana kɔnɔ aani bina kalɛ.”
13Amu na unengu ɔmmɔ ɔ́ta únye na údie lɛdi momoomo na Yudaƒuɔ lɛdi kemmo, lɛni baalɔ Hebri, na ɔ́su ɔ́nini, 14“Binu ɔga ɔyikune kenye. Asiriaƒuɔ ɔga ɔnini, 15‘Bitaya na Hesekia ɔ́tɔlɔ-mii ɔɔɔdubo bɔkana na ɔƒɔ-mii ɔlɛku mina enu kemmo. Na bitaya na Hesekia ɔdɔdɔ-mii na uƒu-mii kasusu na biti bina anu bɛsia bɛnii, “Unwoti ɔdubudie-bu na ulu biala lɛlɔ na ɔɔɔdubo ɔma unengudi ɔmɛni bɔnyonu bɔkya Asiriaƒɔ ɔga enu kemmo.” ’
16“Bitenu lɛla lɛni na Hesekia ɔ́su mmɔ. Mmomu bɔsu na Asiriaƒuɔ ɔga ɔyikune ɔda ɔnini, ‘Bɛbabla na bibo bibablaku-mi unwi na buwi kenye ntu. Na bɛdubɔkɛ bɔnwuna na ɔdi biala ɔdi nwuna kemo edula ku egyiibi, na udu ntu na nwuna libiɔ kemmo ɔni, 17uti utédu ka bula ɔga ɔmmɔ ɔ́wia-mii kɔkyakɔ kɔni nse aani amii alati kɔdi. Na kesii kani bɛdubɔkɛ edula ku ntɛ bɔbuni na bɛkɛ adila ku adingyii abuni ku nnɔ egyii ku uwɔ.’
18“Bitenu Hesekia litemi ɔsika bɔkpanku na ɔda-mii utáyila si ɔɔsu ɔnii, ‘Unwoti ɔdubo-mii budie.’ Bíinu dii ka kalɔ kadi baƒiɔ báaƒɔ bana bekyuli básiku Asiriaƒuɔ ɔga enu kemmo? 19Wɛ na Hamat ku Arpad ku Seƒarwaim baƒiɔ bakya? Na wɛ na Hamat ku Arpad baƒiɔ bakya? Na wɛ lɛnɔ na Seƒarwaim ku Hera ku Iwa baƒiɔ bakya? Na ɔdi úukpo ɔ́ƒɔ Samaria ɔ́lɛku-mi enu dii? 20Na kalɔ kamani geen baƒiɔ néekpo bɔƒɔ bana kalɔ bekyuli básiku-mi enu kemmo? Na dɛ na Unwoti anwu ɔdubɔkana na ɔƒɔ Yerusalem na mina enu kemmo?”
21Nsu bekyuli bammɔ ƒui bábla kpoo aani kalɛ na Ɔga Hesekia ɔ́su-ma úse ɔnini, “Bitedie-nwu lɛla biala kenye.”
22Ɔmmɔ kama Hilkia ubidi Eliakim ɔni ndi ɔga kesii lɛlɔ ɔnune ku ɔku unwenine Sebna ku Asaƒ ubidi Yoa ekposela ala unwenine báni bana lɛwu bábwɛ na bénwini bésie Ɔga Hesekia kudɔ na bátásɔku ala ani na básu-ma ƒui básu-nwu.
Currently Selected:
Yesaia 36: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
