Yesaia 33
33
1Bɔbuɛ ute awɔ ala ubilene,
nsu ɔdi útebile-ɔ lɛla lɛdi kudii!
Bɔbuɛ ute awɔ ɔni mɔɔví bekyuli kalɔ,
nsu ɔdi útavi-ɔ kalɔ kudii!
Si uwi ɔni na áda bekyuli ala bubile áya ni,
badububile awɔ adi lɛnɔ.
Na si uwi ɔni na áda bekyuli kalɔ bɔvi áya ni,
badubɔvi-ɔ kalɔ awɔ lɛnɔ.
2Unwoti, buvele na bɔda-a, tina-bu ƒula lɛƒɔndia!
Ƒula lɛlɔ na bɔsia anu.
Ya na bɔkɛ ɔyikun ɔtanta biala,
na ebo na ebedie-bu
si uwi ɔni na búduo ɔgbankpi kemmo.
3Kadi bekyuli beegyingya
si édie lɛdi na átina kalɛ na ébomo.
4Buukpóku bula bekisine aani baalɔlɔ,
na buuƒie bana ala ƒui taaƒɔ.
5Awɔ Unwoti eli katɔ na etulo ukyuli biala.
Áya na litemi lɛlɔ bɔdi ulu lɛlɔ
ku ala bɔbla siin bɔ́ƒɔ Yerusalem.
6Awɔ ndi kowodu kalɔ ɔka
ɔni lɛlɔ na bunye ɔmwi.
Ɔsika aaƒɔ́-bu ngba uwi biala
na eete-bu lɛnunda ku lɛlati.
Na lɛla bamba biala lɛ́sɔ
lítaƒɔ-bu kuye
lítetulo ka butaadi ƒula
litemi lɛlɔ.
7Bɛnu! Bukeli na bula bekpone
benengudi ƒui
bakɛ beekeli na lɛblɔnu
ƒui lɛlɔ
taakpali banii bebebunku-ma.
Na bula batu bani nésie betéwi kenye ntu
na beboku keyi buɛɛ bénwini bébo ɔma ku keku.
8Ɔdi ɔsɔ ulakana ulu bɔyu busie kesii kadi
anwuɔsu alanu ukyuli ɔdi na ulu ɔdi lɛlɔ.
Bébile ala ani na búnyimi búse.
Na si ina ɔdi anii ataadi linyese lɛdi lɛlɔ muedi
ukyuli ɔdi ɔsɔ ulábu-ɔ.
9Mmo bɔ́kywi bunye na lɛla lɛla liiibo-mu kemmo.
Na Lebanon lɛku lɛ́yɛyɛ linye aani ukyuli
ɔni na kɔƒa kúƒie.
Na Saron Ɔkwalɛ únwini kalɔ kakwiidi.
Na Basan ku Karmel aku ƒui éwiile evete.
10Nsu Unwoti ɔnini,
“Ɔƒɛni na ndubo lɛla lɛdi bɔbla
na bekyuli banu
na bemwi-mi geen.
11Bina ablala ƒui ese aani keti
kani na amii alati bina ɔƒɛƒɛɛ ɔni na bɛɛnwuna
na bɛdubuti bɛkya ablala ammɔ ogya.
12Bɛdubo bɔkywi bunwini ntɔ
aani liyu alakpi
na bákya ogya.
13“Amii bani nde ku bani nási ɔlɔgyu ƒui,
bɛlɛ bibo na bibanu lɛla lɛni na lɛ́bla,
na bɛnu ɔyikun bonwu ɔni na mbo!”
14Liƒu líƒie alaekpidi bablane benengudi
bani nkya Sion Kɔbi lɛlɔ
na lɛlɔ lɛɛtɔ́-ma kpakpaakpa na béye banini,
“Dɛ na bɔdubɔkana kesii kani na ogya
ɔni mɔɔkywí teebile ala uwi ƒui
na uléni mɛni bulie?”
15Nsu bekyuli bani nli ngba siin
na baasu litemi geen
lɛmmɔ ni,
badubo bana lɛyuƒɔla bɔƒɔ
ku bani na balayɔ ka baƒɔ
egulabi adi na bɔbɛ kemmo
iye benye ukyuli ɔdi lɛlɔ
na beƒie-nwu lɛla lɛdi baƒɔ
ku bani nkisi ka bewi ukyuli ubugya kalɔ
na balayɔ lɛsɛ ku udunkpi bamba ƒui lɛnɔ ni,
16badubulie bekpone kagyumakɔ
kpakplaa kemmo
na lɛtakpɛ lili
na bakɛ adila badi kaduɛ na bani lɛnɔ kaduɛ.
17Amii alati bɛdubɔnu Ɔga ɔni muukeye mmɔ,
ku kalɛ na nwuna lɛga kadikɔ
kadubo bɔbɛbɛ busie amadɔ ku ɔgyu kakaaka.
18Mmɔ na amii alati bɛdubuye bɛnini,
“Wɛ na benengu bani muunye-bu lɛlɔ
na baayila-bu banii
buteete kuyii bonwu bonwu mmɔ bávi?”
19Na bɛsɔ bɛɛɛdubo baƒɔ bani mɔɔtalaku lɛlɔ katɔ,
bani lɛdi na bilenu na bilatɛmi mmɔ bɔnu na bina akɔ.
20Bɛkɔliku anumi bɛnu Sion Kɔbi
kesii kani na bɔɔdi bula
emeyi buni.
Bɛdubɔnu kalɛ na Yerusalem unye kalɔ kpi
aani kevo kani na bédi kpakplaa
na nwuna kɔbuli kpakplaa
kɔda ewele
na alɛ kalɔ na lɛla lɛdi lilakana-ka bɔgyu.
21Bula Unwoti Ɔyikune ɔni
muukeye ɔdubɔsiaku-bu,
na ntukpa bɔni nábɛbɛ na bɔ́gyu
bɔdubɔka bɔmana-bu,
na bekisine lɛkɔlɔ libendi lɛdi
lilakana-mu lɛlɔ bɔsia bɔvi.
22Unwoti ndubɔtɛ bula litemi
ute-bu, na ɔdi-bu lɛlɔ.
Unwoti ndi bula ɔga ɔni ndubɔda-bu,
na lɛla lɛdi lilékpoku-bu.
23Nsu ƒula kadi bekyuli ni,
bese aani ɔkɔlɔ ubendi ɔni na nwuna lɛta
ku adi ƒui adaku bugyingya
na bátakɔliku adi ani mɔɔƒɔ́ ɔƒɛƒɛɛ
na uutiku ɔkɔlɔ ɔmmɔ.
Limeyi lɛdubo ɔni na bina bekyuli
bani náƒɛ bewi kalɔ muedi
badubɔkɛ kekpo ala ani na beƒie
báƒɔ bekisine kudɔ mmɔ adi.
24Unwoti ɔdubuti bina ekpidi ɔkyiɛ-mii,
na ɔdi ulasu ɔnii uuƒi.
Currently Selected:
Yesaia 33: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
