Yesaia 34
34
Unwoti Ɔ́tɛku Kadi Bekyuli Ƒui Litemi
1Bɛlɛ bibo,
amii kadi ƒui bekyuli,
na amii bayawine ku kalɔ lɛlɔ ala ediedi ƒui,
bɛni bide, na bise atu, na binu kenye kadi!
2Unwoti úti kɔnyi kpakplaa
ɔ́kya kadi bekyuli ƒui geen,
na ɔ́ɔdu-ma kɔtɔ ka bakyula-ma na bayii udu.
3Na baaadubo ɔdi bɔva,
mmomu bekpine bammɔ badubuwi mmɔ
na bebun beteenwenyi,
na bana ubugya ɔdubɔƒɔ abi lɛlɔ ƒui.
4Ayabi ƒui adubɔyii akya,
na kayaa kemodi kammɔ kakono
aani kalɛ na baakono ɔku.
Na ɔƒɛ ku kɔbuli kɔdubɔnu
aani kalɛ na evete ku egyiibi
aanú egyii lɛlɔ ƒui.
5Na si uwi ɔni na Unwoti úti nwuna kewii
na ɔ́bla lɛla lɛni na ɔɔyɔ́
ɔ́wɔlɔ ni,
ɔdubɔyu uduo Edom kadi bekyuli
bani na ɔ́ɔdu kɔtɔ úse ka ɔkyula lɛnɔ lɛlɔ.
6Na Unwoti kewii lɛlɔ ƒui kadubɔƒɔ ubugya
ku lɛmwi, na kalɛ na ɔ́tu-ma aani baƒonu
ku bese bammɔ útálɛ bana akabi lɛlɔ ɔsu.
Ɔsika Unwoti ɔdubo akpala bɔbla
na Bosra ɔma unengudi ɔmmɔ kemmo,
na ɔdu bekyuli pii geen na Edom.
7Edom bekyuli bese aani ɔmantɛ ku lɛku kemmo bakɔ bagyani
bani na bebo ɔkplu geen sɔsɔ,
nsu ama lɛnɔ badubo bukpi aani bakladi kani.
Na kalɔ kemodi kammɔ kadubɔƒɔ bekyuli ubugya
na bana lɛmwi lɛsala ku lɛti lɛmmɔ.
8Unwoti ɔlati ɔ́ɔƒuna uwi ku lɛkwa
lɛni na ɔdububo ubedie bekyuli kasi ute Sion.
9Na Edom ntukpa ƒui bɔdubunwini nnɔ tonwu
bɔni na beewi ulu lɛlɔ,
na kalɔ kammɔ lɛti lɛta linwini kɔnu aƒɛ.
Na kalɔ kammɔ kaƒɔ ogya na kataada.
10Na ogya ɔmmɔ ɔdubo butaada usien ku ɔƒɛ
na ulada uyɔ bɔlɛ uláya
uwi ɔdi.
Edom kalɔ kammɔ ƒui kadubɔkywi
na kɔsa kaladi lɛla lɛdi bɔbla
ɔ́si kaba útédu kaba.
Na ukyuli ɔdi ɔɔɔdubo bɔkana
na usie ulu ɔdi na ɔsia kalɔ kammɔ kemmo ɔlɛ.
11Bekuku ku basangbii ku lɛku kemmo bebuo bamba
badubuti mmɔ babla bana kuliekɔ.
Na Katɔti ɔdubɔkɔku kalɔ kammɔ ƒui ɔnu
ka bubile kani na ɔdi ka bebile-ka
na bayila bekyuli bammɔ
ƒui udu.
12Na bekyuli badubɔlɔ mmɔ bani
lɛga kadikɔ kani na
lɛƒua liiibo
na kalɔ kammɔ lɛlɔ badine lɛnɔ
beeebo kenyekɔ kadi.
13Baga kesii ku kɔgyumanakɔ kɔni na bátu bényene ƒui
kɔdubunwini liyu alakpi sɔɔn
ɔni na beƒukutu ku bekuku ndubo mmɔ bulie.
14Na kalɔ kakwiidi kemmo bebweyi
ku bebuoƒuala ndubo butaadi taasa na mmɔ.
Na alakpi akɔ bese badubo butaava taalɔ lɛlɔ.
Na usien bebweyi lɛnɔ badubɔƒɔ mmɔ ƒui.
15Bekuku badubo bana ayu bɔbla na mmɔ,
na bava bevuo banyuɛ bana bebi na bana avwi kalɔ.
Na basangbii badubo ɔƒɛɛlɛ butaakya
na kayaa mmɔ ɔdi biala ku ɔgyani.
16Na Unwoti bunweni kedee ɔku kemmo ni,
bénweni ka Unwoti ɔ́su ɔnini,
“Ami násala bebweyi bamɛni ƒui
ɔkɛnku mina Kɔyu ɔyikun lɛlɔ,
na bana akɔ ina unwi ɔɔɔdubo bɔyii,
na ɔdi lɛnɔ ulayila ɔgyani iye uledi.”
17Unwoti ɔlati nálɛ ugyii úse
úte bana keliekɔ na mmɔ,
na badubo bulie uwi ƒui ɔ́si kaba úsie kaba.
Currently Selected:
Yesaia 34: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
