Yesaia 25
25
Bemwi Unwoti
1O Unwoti, awɔ ndi mina Katɔti,
ndubumwi-ɔ na lɛkɔliku ƒula lɛnyi katɔ,
ɔsika ádi ƒula etemila lɛlɔ
na ábla ala ebendi geen ani ndi ulu
ɔni na áta ése ɔ́si kukuuku.
2Na awɔ nábwɛ ɔma unengudi
ɔni na bátu awodu
bámana mmɔ
na ásala-nwu lisu álɛ
aani kebu.
Ɔma ɔni na kemmo na báƒɔ béyi-nwu mmɔ ni,
awɔ nábwɛ-nwu
na ɔsɔ ɔɔɔdi ɔma
na ɔdi ɔnu ɔti ka ɔ́kya dii.
Na basɔ balakana-nwu bɔsɔku bɔtu lɛnɔ kudii.
3Ɔmmɔ ɔsu kadi kani bekyuli mbo ɔyikun
badubuti ɔbu bete-ɔ.
Na bani lɛnɔ mɔɔdi bekyuli lɛlɔ
na baanya-ma taakya badubo-ɔ lili kalɔ butaakya
na ƒula ɔyikun bonwu ɔsu.
4Katamikukɔ kpakplaa na adi ete bawabane
ku bani mɔɔyaki ala na baanya-ma taakya.
Na adi kabɛkɔ ku ɔyuli ete-ma si kadi kaabi
éte bani na ala eekpóku-ma geen.
Ɔsika balalane bammɔ kɔnyi kuse
aani kalɛ na ɔƒɛƒɛɛ kpakplaa uuƒwimi ala
taatáƒiɛni kowodu lɛlɔ.
5Na úlie ku kɔnwinimi kalɔ kakwiidi lɛlɔ liwulu.
Na baƒɔ bani ndi Israelƒuɔ bekisine mmɔ ni,
aabala-ma bɔkwanyi ku lɛsɛ lɛni na baakya
aani kalɛ na liƒlukutu ɔyuli ɔɔyala liwulu biala kenye
na babla kpoo.
6Na Sion Kɔbi kɔmɛni lɛlɔ ni,
Unwoti Ɔyikune Ƒui ɔdubɔlɔ bekyuli ƒui limeyi buni kadikɔ.
Na use adila abuni geen ute-ma
ku lɛna ku ntɛ bɔbuni ƒui geen.
7Na kɔbi kɔmɛni lɛlɔ ni,
na ala ani béti bákwa bekyuli ƒui lɛlɔ
aani ukpine kɔvadi bébo báda-ma lɛlɔ ni,
Unwoti ɔdubo-nya bɔmami budie
ku aduni ani nda-ma lɛlɔ ƒui.
8Ɔdubɔyila kukpi aani kalɛ na beebweli lɛla lɛdi
na kɔsɔ kulakya lɛnɔ kudii.
Unwoti Katɔti ɔdubuni imii udie ukyuli biala anumi
na kɔƒa kɔni muukpó nwuna bekyuli
kɔdubukeli ƒui kede kede
na kayawi kemodi kammɔ kemmo,
ɔsika Unwoti ɔlati násu
ɔmɛni úse.
9Na limeyi lɛmmɔ lɛlɔ na bekyuli ƒui badubɔsu banini,
“Sɔsɔ geen ni, bula Unwoti Katɔti ɔmmɔ na ɔdi mɛni.
Anwu na bunye bɔɔnu ulu teete ka ubaƒɔ-bu.
Bɛɛnu Unwoti ɔmmɔ, bɛya na lɛlɔ litaayɔ-bu
na bɔkɛ ebiti geen na kalɛ na úbo ubaƒɔ ɔsu.”
10Unwoti ɔlati kɔnu kɔdubɔgyumana kɔbi kɔmɛni.
Nsu badubɔnya Moab kadi bekyuli ama bakya
aani kalɛ na bebuo baanya keti taakya libi akɔ.
11Na beteebo enu ka balɛ mmɔ
aani kalɛ na ukyuli ɔni muubumo ketu uubó enu.
Nsu ina bi na bana enu aata
ala lɛlɔ
na bebo kɔkwɛ muedi ni,
Unwoti ɔdubo-ma bɔyila na bana lɛlɔtina
ku ulikplu ala bɔbla ɔsu.
12Na ɔdubɔƒɔ bana awodu
ani na bátu bámana bana kalɔ
na atɛ kalɔ na utu-nya
ɔ́bwɛ kpɛtɛ kpɛtɛ
unwini ɔtumu.
Currently Selected:
Yesaia 25: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
