Yesaia 24
24
Unwoti Úbile Kalɔ Kammɔ
1Bɛnu, Katɔti ɔdubo kalɔ kammɔ ƒui bubile
na kana anumi kasɔ kaladia lɛla lɛla.
Na ɔdubɔbɔku bekyuli bammɔ ƒui ɔkya
kalɔ kammɔ ekpo ekpo.
2Na lɛla udu unwi ndubɔlɛku Katɔti bakpane
ku bekyuli bani na baatɔnku ƒui,
batɔlati ku bani mɔɔbla-ma kabla,
belekubi kabla bablane ku bana baduni,
ukyuli ɔni nti lɛla lɛdi uuyé ku ukyuli ɔni néye-ni,
ukyuli ɔni muuvó lɛla teete ukyuli
ku anwu ɔni névo-ni,
ukyuli ɔni bada kayu ku awɔ ɔni nda kayu kammɔ ƒui
lɛla linwi kani ndubo bana ƒui bɔlɛku.
3Kayawi kemodi kammɔ kadubo bubie ƒui kede kede
na lɛla lɛla lɛsɔ lilésie siin.
Lɛni na Unwoti Katɔti ɔ́su.
4Kalɔ kammɔ kadubɔkwii na lɛla biala lɛyɛyɛ,
na kɔnyana kuƒie lɛla biala na lɛyii udu.
5Bekyuli bébile kayawi kammɔ na keesé lɛlɔ.
Bátadi ɔda bubo bɔmmɔ lɛlɔ,
na báta bénye litemi lɛmmɔ lɛlɔ,
na bébile Katɔti bunyimi bɔni nnye nte uwi ƒui mmɔ.
6Ɔkɛnku ɔmmɔ ɔsu ni,
ewida ádi bekyuli ku kayawi ƒui lɛla biala lɛlɔ
na ɔdi biala ɔlɛka ubo abi na nwuna likpidi lili
na bekyuli bayawine
bákywi ƒui
na bana ɛlɛɛ kani nébu.
7Kɔbuli kɔni ebi muudie ntɛ kɔ́yɛyɛ
na bekyuli basɔ bebo ntɛ.
Ɔmmɔ ɔsu na bani na lɛlɔ
lɛɛyɔ́ ƒui
béduo kɔnyana na beedumo.
8Agyala kɔku kúkulo
na lɛlɔyɔ kudu kɔ́ba diin.
9Ntɛ kalɔ lɛnu lɛsɔ liiibo na beedie,
ɔsika butudi bɔni na banine baakya lɛlɔ ogya
bubo ɔdu butulo lɛla biala.
10Na bábwɛ ɔma ɔni kemmo
na ala bɔbla basa basa bɔ́ƒɔ-nwu mmɔ ƒui,
na bákalɛ kaduli biala kayakun
na bábala-ka bényene.
11Na kɔnyana keku ku kɔvanu kani nda
na ɔma kemmo lilu lɛlɔ ƒui
ka ntɛ bɔni na basɔ bani bataakɛ lɛlɔyɔ bɔsɔ buuubo ɔsu.
Na kayawi ebiti biala áyii ákya kede kede.
12Na lɛla biala líbie lɛ́yii udu
na ɔma umodi ɔmmɔ kemmo
na bétu kɔyakun kɔmmɔ ƒui
bégyingya na bébile
ala ƒui.
13Lɛni udu ndubɔƒɔ kayawi kemodi ku kadi ƒui bekyuli akɔ
aani kalɛ na edula udewi ɔɔví
na baƒiɛmi adingyii ammɔ ligyii kalɛ na ebi ani nábɛ
akya kɔgba akɔ lɛnɔ anu ewi kalɔ na bala.
14Na nkyuli ɛlɛɛ bani nébu mmɔ
báva momoomo ku lɛlɔyɔ básiku ɔƒɛ kanukɔ
na bédie Unwoti Katɔti lɛgadi ɔyikun keyi.
15Anwuɔsu bɛkɔliku Unwoti
lɛnyi katɔ,
na bimwi-nwu bɛsiku ɔƒɛ katukɔ
ku ɛpu ntuntɛ kɔlɔ ƒui.
Bibo Israel Unwoti Katɔti kudu.
16Binu bumwi lɛnu lɛni nda
ɔ́siku kayawi kawɔlɔkɔ ekpo ekpo ƒui,
úte Unwoti ɔni muukeye na use siin.
Nsu bɔbuɛ muute lɛlɔ,
ɔsika lɛlɔ kemmo kaanwá-mi ku kɔnyana,
na bani na bátaƒɔ bátadi bana taƒɔ tadi
ku ulikplu ala bɔbla ɔsu.
17Liƒu ala adubo-mii lɛlɔ bɔda bɔlɛ,
na bɛnu biduo libu kemmo
na kɔkpagyuɛ lɛnɔ kudie amii kalɔ lɛlɔ bekyuli ƒui.
18Na ukyuli ɔni menu liƒu lɛla lɛdi kɔku
na ɔnii uukeli ɔdubɔnu uduo ubu kemmo.
Na si ɔnii ɔɔkɔ́ ɔlɛ ubu ɔmmɔ kemmo lɛnɔ
kakpagyuɛ kadubo-nwu budie.
Kayaa kálɛmi kɔnakunwi
ku ntu yoo
aani kalɛ na baalɛmi ntu kayakun
na kalɔ kammɔ ɔka ɔni nkya-nwu kalɔ ɔ́kunku.
19Kayawi kammɔ kábwɛ na kéle ntɛ eku eku
na kégyingya kéwi kalɔ
na ɔni na bákunku-ka kpakplaa geen ɔsu.
20Kayawi kemodi kammɔ ƒui kágbanta késela
aani ntɛ ukpine.
Na use aani kabwa kani na ɔƒɛƒɛɛ ɔdanku ɔɔvínku,
na nwuna atuɔkplu ku litemi lɛlɔ tadi
únwini etila asia-nwu lɛlɔ, na ánya-nwu ámana
na ɔsɔ ɔɔɔdubo bɔkana bɔta.
21Na limeyi lɛmmɔ lɛlɔ ni,
Unwoti ɔdubɔni kayaa bayikune kɔtu
na katɔ mmɔ,
na ɔni kalɔ lɛlɔ baga lɛnɔ kɔtu na kalɔ lɛlɔ mɛni.
22Na badubuƒie batuɔkplune bammɔ ƒui
na bakya-ma ɔtɔ na bebo-ma lɛkpu bese na ubu kemmo
utédu ka bátɛku-ma litemi
na bani-ma kɔtu na emeyi pii adi kama.
23Na kadi ƒui Unwoti ɔdubɔdi lɛga
na Sion Kɔbi lɛlɔ ku Yerusalem ku bana benengu ƒui anumi
na udie nwuna lɛgadi
bukeye keyi.
Na nwuna bukeye bɔya na kɔbuli ku ɔƒɛ bukeye
bɔbla suu aani kalɛ na kɔƒa kuukpó ukyuli.
Currently Selected:
Yesaia 24: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
