Yesaia 23

Yesaia Ɔ́su Lɛla Lɛni Na Ɔ́nu Na Tiro Lɛlɔ

1Unwoti údie lɛla lɛdi ɔ́tina na Tiro lɛlɔ.

Amii Tarsis beyedine bani mɔɔsia ntu anumi ku lɛkɔlɔ

na bɛɛdi kuye teesie Tiro, biteewulo kɔnyana, ɔsika bákyula Tiro,

na ɔtɔ iye kabɛkɔ iye lɛkɔlɔ kalɛlɛkɔ kadi

kasɔ keeebo.

Beyedine bammɔ bénu kenye kamɛni

uwi ɔni na báyu bébedu ntuntɛ kalɔ kani baalɔ Kipro.

2Bɛbla kpoo ku kɔnyana, amii bani nli ɛpu kalɔ ƒiaa lɛlɔ,

ku amii Sidon beyedine lɛnɔ ƒui, na lɛla lɛni nébo ɔsu.

Bina batalane bávia ɛpu anumi ekpo ekpo

3na bakɛ ntukpa lidu lidu lɛlɔ.

Bésie bétédu Sihor ku Nil ntukpa bonwu lɛlɔ,

na beeyé edula lidu lidu ebi teeboku-mii.

Na Tiro mmɔ kénwini kuye kadikɔ bonwu

kéte bayawine ƒui.

4Kɔƒa kukpo-mii, amii Sidon beyedine

bani náƒɔ ɛpu ɔmmɔ ƒui anumi bilie-nwu lɛlɔ kpi,

nsu kɔsia kɔdi kútalɛ-nwu kemmo,

ɔsika ɛpu ɔmmɔ ɔlati mɔɔsu taatina ɔnini,

“Nse aani ukyuli ɔni na kawɔƒɔ kátadu-nwu kudii iye útawɔ kudii.

Na ńtada bakloƒu iye begblebi lɛnɔ dii.”

5Na si kenye kamɛni kétédu Egyipte

ka lɛni nébo Tiro lɛlɔ ni, kɔnyana kɔdubo-ma buƒie.

6Bikeli beteesie Tarsis,

na amii ntuntɛ kalɔ bekyuli beteewulo!

7Lɛlɔyɔ ku emeyi bɔdi ɔma ɔkukudi ɔmmɔ na ɔdi mɛni?

Ɔma ɔni bekyuli návi bésie ɔgyu geen náyii udu lɛni?

8Ɔyikune ɔmani kakwɛ ku kasusu náya

na ɔmɛni úbo Tiro lɛlɔ?

Ɔma ɔni kemmo na nka adubɔkɛ lɛla lɛla

na ukyuli ɔɔwia náta únwini lɛni?

Ɔma ɔni beyedine na bekyuli baabu

aani bekyuli batɔnkune ku lɛlɔ badine na ɔdi mɛni?

9Unwoti Katɔti Ɔyikune Ƒui nábla lɛla lɛmɛni udu,

kalɛ na ala ani lɛlɔ lɛmɛne bekyuli baakun

ka eekeye ayii udu.

Na bani na báƒɔ lɛnyi na kalɔ lɛnɔ mɛni uboku-ma kalɔ.

10Amii Tarsis kadi bekyuli bɛtuma bina kalɔ

kalɛ biala na bɛdubɔkana ina Nil bune,

ɔsika ásɔ eeebo beyedine lɛkɔlɔ kalɛlɛkɔ.

11Katɔti údie kɔnu na ɔ́tina nwuna ɔyikun

ɔni mɔɔdi ɛpu lɛlɔ, na ɔɔkunku kayawi lɛga kɔdikɔ ƒui.

Úbo ɔda ɔnii bekisine babwɛ Tiro

ɔma kɔgyumanakɔ kpakplaa ƒui.

12Na ɔ́sɔ ɔ́su ɔnini, “Ƒula lɛlɔyɔ ku emeyi bɔdi kenye kékulo.

Awɔ Sidon ɔma ɔbuni ɔni nse aani adagyaa,

ɔƒɛni amu áyii udu!

“Bɛta na bɛvia bisie Kipro,

nsu mmɔ muedi bɛɛɛdubo bɔkɛ bɔnwuna bɔdi.”

13Amii binwini bɛnu Babel.

Mmɔ kasɔ kaaadi keliekɔ buni kadi

Asiriaƒuɔ békpo-ma,

na mmɔ kénwini bakumbweyi keliekɔ.

Bátu kunyekɔ bámana awodu ammɔ

na bénye báƒɛ bana kɔgyumanakɔ kɔmmɔ ku awodu ammɔ ƒui,

na báyila lɛla biala udu na mmɔ.

14Na amii Tarsis lɛkɔlɔ beyedine biteewulo keku ku kɔnyana,

ɔsika bábwɛ bina kɔgyumanakɔ kpakplaa kɔmmɔ

na kɔ́yii udu!

15Na uwi ɔni kemmo na ala amɛni adubɔlɛ lɛni ni, bekyuli badubɔyiƒala Tiro akwa liti ku aavlanyɔ uwi ɔni na ɔga ɔkana na ulie ngba ɔdi lɛga. Nsu na akwa liti ku aavlanyɔ amɛni kama ni, bekyuli badubudie ɔnu bɔsia Tiro aani ɔyalɛ kalɛ.

16Na batu kɔgya banini,

“Ɔyalɛ ɔni nákɔ ligblebi dii,

sɔ ti ƒula ɔbentaa

na asɔ atu ƒula lɛnu mini mini lɛmmɔ avi ɔma,

na bekyuli kayi kasɔ kenwini kasia-a lɛlɔ

aani kalɛ na úse kuuku.”

17Na akwa liti ku aavlanyɔ ammɔ kama ni, Katɔti ɔdubɔbla ku Tiro lɛla lɛni na ɔɔyɔ́ na ɔya na basɔ benwini besie bana kabla kuuku kudɔ, na badi ku kayawi bekyuli ƒui kuye. 18Nsu na kawɔlɔkɔ ni, kɔsia kɔni na Tiro kadi bekyuli bamɛni bákɛ na bana kuye bɔdi kemmo ni, belému-nya belése lɛlɔ kani. Mmomu badubudie-ku bese sɛsɛɛ bete Unwoti na beti babla kabla na beye adala ku adila abuni bete bekyuli bani mɔɔbla Katɔti kabla.

Currently Selected:

Yesaia 23: lef

Highlight

Copy

Compare