Yesaia 14
14
1Unwoti ɔdubo Israelƒuɔ kɔnyana bɔnu,
na ɔsɔ ɔƒuna-ma,
na ɔsɔku-ma utésie bana keliekɔ
na bana kalɔ lɛlɔ.
Baƒɔ badubɔsalaku-ma
na bablaku Israelƒuɔ unwi.
2Na kadi bamba bekyuli
ndubo-ma butiku na beti-ma besienku bana kalɔ lɛlɔ.
Na Israelƒuɔ beti-ma benwini bana banana
ku beleku kabla bablane na Unwoti kalɔ kammɔ lɛlɔ.
Na kadi bani néƒie-ma bátɔlɔku
na bénye-ma lɛlɔ na baabla bana kabla ni,
Israelƒuɔ mmomu badubo bunwini bunye-ma lɛlɔ
na bataabla-ma kabla.
3Na limeyi lɛni na Unwoti ɔdubɔya na bɛlɛ bina lɛbibo ku lɛlɔ bukpoku ku kalɛ na benye-mii lɛlɔ na bɛɛbla bekyuli bamba kabla kemmo ni, 4bɛdubo ɔnu bɔnwi bɔsia Babel ɔga na bɛsu bɛnini,
“Báyila ɔyikune ɔmmɔ udu!
Na nwuna kɔnyi kpakplaa ku lɛlɔ bɔtina bɔmmɔ kenye kékulo!
5Unwoti ɔ́ƒɛ balalane ɔgagyii,
lɛlɔ badine bammɔ likposela,
6lɛni na bada baadú bekyuli ku kɔnyi,
na baláda baláya uwi ɔdi.
Na ɔmmɔ udu na béti baadi kɔlɔ ƒui lɛlɔ,
na balásɔ bana likyulikpi kama.
7Kayawi ƒui kábla buɛɛ
na ukyuli biala atu áyɔ
na békeyi lɛnu na benye beedie.
8Egyii enengudi gyɛnglɛɛ ammɔ muedi,
lɛlɔ lɛɛyɔ́-nya na Lebanon kalɔ banini,
‘Ɔni na bébo-ɔ kalɔ ɔƒɛni amu ni,
ala ɔnwine ɔdi ɔsɔ ulebo ulabada-bu uláva kalɔ.’ ”
9Kekpine muedi owogyo úwi,
na lɛlɔ badine bani lɛnɔ néesie kekpine mmɔ
báta babasiaku-ɔ ka bánu-ɔ ka ási adubo.
10Na baasu ku lɛdi linwi banini,
“Abu ku-ɔ búlie,
ɔsika kablakɔ kása awɔ lɛnɔ aani abu.”
11Ƒula kenyekɔ ku ɔyikun ɔ́sa,
ɔsika báva awɔ ku ƒula lɛbentaa ku lɛnu ƒui,
na atɛ beklubi lɛlɔ, na bani bewi-ɔ lɛlɔ.
12O ukyuli ɔni muukeye aani ɔtanta lɛyabi
na ese aani ɔtanta kadi bugye!
Nu kalɛ báya-a na ánu ási katɔ katɔ
kesii kani na élie ábayu kalɔ lɛlɔ mɛni,
Awɔ ɔni na nka ákɔ kayawi ƒui bekyuli ásɔ!
13Awɔ mɔɔsu na ƒula kayi kemmo anii,
“Ndubɔkɔ lisie katɔ katɔ
ntése mina liboku na mmɔ
na keliekɔ kammɔ kebo kavi Katɔti ayabi,
na ndubulie kɔbi kedee kɔmmɔ lɛlɔ katɔ ƒui,
ntaadi katɔ bayikune bani ƒui mɔɔsála mmɔ lɛlɔ.
14Na ndubɔkɔ lisie katɔ katɔ ƒui,
na ami ku Unwoti Ɔyikune Ƒui bɔdubɔbla likeke.”
15Nsu aanu-ɔ mɛni
na báayula kalɔ na ébeduo kekpine
na ubu kemmo mɛni.
16Na bekyuli ƒui bágyu anumi bálɛ-ɔ
baanu-ɔ kaduɛ, na béye banini,
“Awɔ ndi nkyuli ɔni nágyu kayawi éti
átaatanyi-ka dii mmɔ?
17Na awɔ nésusu kayawi kammɔ
na kénwini kalɔ kakwiidi,
na ábwɛ lɛma linengudi
na étete kuƒi ka bekyuli bani na éƒie
basɔ benwini besie bana lɛma?”
18Baga bani na békpi mmɔ ƒui
batɛ bana kɔƒiɔtɔ kemmo ku bana agala.
19Nsu aanu-ɔ na béƒwimi bábava mɛni
aani kalɛ na baavá kaƒɔ kebiledi,
na bekyuli bani na áya na bátu kuwii bádu
ubugya ɔ́ƒɔ-ɔ lɛlɔ ƒui.
20Na baaadubo-ɔ bɔva bubunku bakladi
kalɛ na báva ama,
ɔsika ébile ƒula kalɔ na ádu ƒula bekyuli.
Ukyuli ukpidi bebi ni,
basɔ baaadubo-ma anyi bɔkpali kudii.
21Bɛklibi kesii kadi
na bɛdu alaekpidi ɔblane ɔmɛni bebi,
na bana bati ekpidi ɔsu.
Na ɔdi ɔsɔ utakɔ utetédu ka ɔɔkɛ́ ɔyikun
na ɔsɔ utaadi kayawi lɛlɔ,
na ɔtu lɛma linengudi uyile kalɔ lɛlɔ.
22Unwoti Ɔyikune Ƒui ɔnini,
“Ndubunye litile Babelƒuɔ kuƒi,
na bana lɛnyi lɛmmɔ lɛyii udu.
Na bana ɛlɛɛ bani mebu ku bana bawɔ ƒui
ndubo-ma bɔkyula.
23Ndubɔya na mmɔ kenwini bekuku keliekɔ
ku ntu ku lɛba sɔɔn.
Ndubɔyila-ma ƒui
na lɛkpala-ma aani uƒiɔ kalɛ lɛkyula.”
Básu Kenye Kadi Na Asiria Lɛlɔ
24Unwoti Ɔyikune Ƒui úse kenye ɔnini,
“Kasusu biala na lɛ́bla líse ni,
ndubɔya na kebo-nwu kemmo lɛni kani
na mina bɔyɔ kenye.
25Ndubo Asiriaƒuɔ udu bɔyila na mina kalɔ,
na lɛkɔ-ma lɛbwɛ kpɛtɛ kpɛtɛ na mina kɔbi lɛlɔ,
ama bani nákɔ belie mina bekyuli lɛlɔ,
na lidie bana lɛbibo kɔgba kɔni nda Israelƒuɔ,
na bana etila atimi mina bekyuli lɛlɔ.”
26Unwoti ɔ́bla kasusu kadi úse
úte kayawi kemodi kammɔ ƒui,
ɔsika nwuna ɔyikun unengudi ɔmmɔ
ɔ́ƒɔ kayawi kammɔ kesii biala,
27na úudie kɔnu úse na kɔnyi kemmo
ka ɔni kayawi kɔtu na ɔdi uletile-nwu kuƒi.
Básu Kenye Kadi Na Ƒilistiƒuɔ Lɛlɔ
28Lɛkwa lɛni na Ɔga Ahas úkpi ni,
anwu na Unwoti úti kenye kamɛni úte-mi.
29Ɔƒɛni amii Ƒilistiƒuɔ ni, lɛlɔ litayɔ-mii tɔ bɛnii
bina ugyii ɔdadi ɔni ndi ɔga ɔmmɔ ɔ́ƒɛ.
Ɔsika kɔlakpi kukpidi ubi ni,
use aani kugyii ugyiitu ukpidi bɔta.
Kuna ebi adi avan ɔni mɔɔtu ku ugyulo ukpidi.
30Ndubute bawabane geen ƒui na badi
aani baƒonu ɔdane buni kalɛ
na bani mɔɔyaki ƒui batɛ ku banwuna.
Nsu amii ni, ndubɔya na kɔka kɔdu-mii ƒui
na bɛyii udu ku ligyiitu.
31O amii Ƒilistiƒuɔ! Biteewulo na biteedumo,
na bina lɛma linengudi lɛmmɔ kemmo
ku bina lɛma ɔban kenye,
na bɛyu biwi kalɔ ku bɔyia,
na bɛnu bina bekisine uyɔ
ka ɔ́si katɔ kakɛ ɔ́yu ɔdubo,
na bɛnu bekpone bammɔ
kalɛ na básala lɛlɔ badubo gbini gbini.
32Bi kenye na bɔdubudie bute bekisine bammɔ
si banii bana batu badi bébeye lɛla lɛdi?
Bɔdubɔsu-ma bɔnini,
“Unwoti úse katamikukɔ úse Sion,
na nwuna bekyuli bani ƒui na baanya taakya
badubɔkɛ katamikukɔ.”
Currently Selected:
Yesaia 14: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
