Yesaia 13
13
Básu Kenye Kadi Bése Na Babel Lɛlɔ
1Amos ubidi Yesaia ɔ́nu budie taatina bɔdi na Babel kalɔ bɔkyula lɛlɔ.
2Unwoti ɔnini, “Tálɛ aƒlaga ɔdi na kɔbi goolo kɔdi ɔtantɛ
kesii kani badubɔnu-nwaa,
na akpali-ma emene momoomo
na ebo-ma kɔnu anii
bavi ɔma ɔban ɔmmɔ kenye
na beduo bayikune bammɔ lɛlɔ na mmɔ.
3Ami nébo ɔda líte bani na lɛ́ƒuna líse sɛsɛɛ,
bekpone bani lɛ́tala ka babla mina kɔnyi kabla,
ama ndi bekyuli bani mɔɔyɔ́ ka bakɔliku-mi katɔ.
4“Binu kɔku kɔni nda na abi lɛlɔ
aani bekyuli lisu bonwu lɛdi!
Na binu kalɛ na kadi ƒui bekyuli lɛga kɔdikɔ
bála lɛlɔ bébo baasála na beedie adi.
Kadi bekyuli ƒui Unwoti mɔɔsála-ma
ka bebo babasala babla bekpone lisu linwi.
5Bási ɔgyu bun bun
nsu badi Unwoti ekpola,
na badanku nwuna kɔnyi
kɔni na ɔdubuti ɔkyula kalɔ kana ƒui.
6“Biwulo momoomo ku kɔnyana,
ɔsika Unwoti Ɔyikune Ƒui limeyi
lɛni na ɔdubo bekyuli bɔkyula
lɛsia ulu líibo líbedu
suɛlɛ suɛlɛ.
7Ɔmmɔ ɔsu enu adubɔƒɛ
ukyuli biala
na ɔtɔtɔ buɛ ɔ́gyu bana ƒui
8na liƒu bonwu lɛdubuƒie-ma.
Ɔsika badubuduo kɔnyana ku ɔlɛ bunu kemmo
aani uleku ɔni ntɛ kɔwɔ uukpóku lɛlɔ.
Na ɔdubɔbwɛ ogya uwi-ma anumi,
na bana ƒui benye bataanu lɛlɔ kalɛ kadi.
9“Bɛnu! Unwoti limeyi lɛmmɔ lɛsia ulu,
nwuna kɔnyi limeyi likpidi lɛmmɔ
ku ɔdu kati kati ka ubakyula kayawi
ku kana alaekpidi bablane bammɔ
ɔni na kalɔ kammɔ kasɔ kalabla keliekɔ kabuni.
10Na kayaa ayabi lidu ƒui asɔ elekeye.
Na ɔƒɛ ɔni nátu ɔdubo lɛnɔ adubɔbla suu.
Lɛni kani na kɔbuli lɛnɔ kɔsɔ kɔɔɔdubo bukeye.
11Ndubɔni bayawine kɔtu
na bana likyulikpi ɔsu,
na lɛni balalane kɔtu na bana ekpidi ɔsu.
Na bani mɔɔnu lɛlɔ katɔ katɔ ni,
ndubɔya na bana lɛla tabu kenye kekulo,
na liboku bani mɔɔtalaku lɛlɔ katɔ kalɔ.
12Ndubɔya na bekyuli basa na kebu ɛlɛɛ geen
utulo kalɛ na Oƒir sika ugyiedi ɔbuni ƒui use ɛlɛɛ.
13Anwuɔsu ndubɔya na katɔ ku kalɔ ƒui
kakunku geen na kana kenyekɔ,
na ami Unwoti Ɔyikune Ƒui kɔnyi ɔsu.
14“Kalɛ na akwa uukeli ɔgbini si ɔsiaku-nwu
iye baƒonu bani neeebo ɔdane baagyingya ni,
ukyuli biala ɔdubo bunwini
na ukeli usie nwuna ɔma na nwuna badi kudɔ.
15Na bani ƒui béƒie badubɔtu-ma baƒuaala,
na batɛ kuwii kenye.
16Bana anumi lɛlɔ na badubɔƒiɛmi bana bebi
atakpɛ lɛlɔ babwɛ kpɛtɛ kpɛtɛ.
Na badubɔla-ma ɔtɔ kemmo ala ƒui batɔlɔku.
Na beƒie bana beleku batɛnku-ma ɔkplu kemmo.
17“Ndubo Medes kadi bekyuli budie bɔkya-mii
Na bilátɔlɔ-ma ku sika ugyiedi iye ɔƒualadi
ɔni na baaadaku lɛda.
18Na bekpone bani ndubo-mii bukpo
badubo bina bakloƒu atula bubo bɔdu.
Na balanu bebi bani naaagyi lɛla lɛdi muedi kɔnyana.”
19Babel lɛgakadikɔ,
lɛkɛ lɛni muukeye ƒui kesekɔ,
kesii kani lɛlɔ lɛmɛnɛ baakun,
Unwoti ɔdubo-nwu bunwini bubi
na ɔyila-nwu udu aani Sodom ku Gomora.
20Ɔsɔ ɔɔɔdubo bekyuli keliekɔ bunwini
úsela kaba kaba kemmo ƒui.
Belusiene ɔdi kevo kasɔ kelenye mmɔ,
na baƒonu ɔdane ɔdi
ɔsɔ ulawia nwuna bebuo katɛnkɔ na mmɔ.
21Bakumbuo kani ndubɔƒɔ mmɔ belie
ku bekuku ku baasɛ bonwu lidu.
22Na bebuoƒuala ndubo adi buteebo
na bana ala abuni kesekɔ,
na beƒukutu bataatɛ bana kuliekɔ kɔbuni
kɔni baaƒɔ́ baƒɔ.
Na uwi ɔmmɔ úude geen,
na ɔsɔ ulésie kama lɛnɔ.
Currently Selected:
Yesaia 13: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
