Esekiel 40

Esekiel Ɔ́nu Kakpakɔ Kani Mebo Na Yerusalem

1-2Akwa aavlanyɔ kama ɔni na béƒie Ɔga Yekonia ku abu bakladi bésienku Babilon kalɔ lɛlɔ aani batɔntɛne kalɛ ni, Unwoti ɔyikun ɔ́ƒɔ-mi lɛlɔ kemmo ƒui na kɔbuli kudeedi limeyi leevudi lɛlɔ. Na ɔdi akwa leevu-ene ɔni na béƒie Yerusalem báƒɔ. Unwoti údie kɔyu kemmo ala adi ɔ́tina-mi na uwi ɔni na ɔ́ya na béti-mi bésienku kɔbi kangyaa kɔdi lili na Yerusalem. Na ka línwini lɛ́nu kada kakɛ ni, lɛ́nu aani si ɔma ɔdi nwi na lɛtɔ lɛ́ƒɔ-nwu kemmo tɛɛ. 3Na mina ala bɔnu bɔmmɔ kemmo ni, Unwoti ɔ́ya na lɛ́ni líde suɛlɛ suɛlɛ geen na lɛ́nu ɔnana ɔdi na unye na uukeye aani lɛbuala ligyiedi lɛni na békuo na liikeye taatu anumi geen. Na unye ɔban kayakun kenwi kadi kenye na ɔda kadii ku ugyii ɔni na baakɔ́ku ala na kɔnu kɔni ku kɔni. 4Na ukyuli ɔmmɔ ɔ́su ɔnini, “Esekiel, ɔyawine ubi, sia anu kaduɛ na anu ala ani na ndubo-ɔ bɔtina mɛni, ɔsika anya ɔsu na béti-ɔ béboku mɛni. Se atu kaduɛ, ɔsika ala ani ƒui na ánu ni, adubo-nya bɔsɔku bɔsu Israelƒuɔ.”

Ɔban Kayakun Kani Nésie Ɔƒɛ Katukɔ Litemi

5Lɛla lideedi lɛni na lɛ́nu ndi kowodu kɔni nkɛ kama kakɛ na kɔ́ka kɔ́mana kakpakɔ kaduli geen kammɔ ƒui. Ɔnana ɔmmɔ úti nwuna ugyii lɛkɔkula lɛni nákuku lɛgba leevu na úgbigbli lɛgba leevu na ɔ́kɔku kowodu kɔmmɔ na kuna bɔkuku ubo lɛgba leevu na kuna bugbigbli lɛnɔ ubo lɛgba leevu. 6-7Ɔmmɔ kama úsie ɔban ɔni nkya ɔƒɛ katukɔ na ɔ́kɔ libili lɛdi útédu ulu ɔdi na ɔtɛ úsela anumi ƒui. Na ulu ɔmɛni kɔmii ku kɔdianu ni, bátu lɛtɔ ɛtɛ ɛtɛ lɛni kemmo na beenye taagyumana bényene. Na lɛtɔ lɛmmɔ bunene ku bɔbɛbɛ ƒui bubo lɛgba leevu leevu. Na awodu ani bugbigbli ntulo lɛgba maane líle lɛtɔ lɛmɛni lɛ́siku ɔkpanadi kudɔ. Ɔnana ɔmɛni ɔ́kɔku kalɛ na bagyumanane ɔtɔ udeedi ɔ́gyunku ɔban ɔmmɔ kenye na ubo lɛgba leevu. Na bɔgyunku bɔmmɔ búlieku kowodu kɔmadi kɔmmɔ bugbigbli bɔni ndi lɛgba leevu.

Amu na ulu ɔmmɔ kawɔlɔkɔ na kama kama ƒui ni, lɛ́nu ɔtɔ ɔdi kayakun ka kéti anumi kéboku kakpakɔ kammɔ ɔlati kaduli. Na bagyumane ɔtɔ ukplodi ku ɔtɔ kayakun kamɛni ntɛ bɔgyu lɛnɔ bɔdi lɛgba leevu 8-9na ulu ɔmɛni kawɔlɔkɔ mmɔ.

Ɔnana ɔmɛni ɔ́kɔku ɔtɔ ɔmmɔ lɛnɔ, na ɔ́si nwuna kayakun úsie kowodu kɔni na ɔvi unyɔdi ntɛ ɔdi lɛgba leevu-ɛtɛ. Na ɔ́si kayakun kammɔ útédu awodu anyɔ ani na nwuna lɛƒɛnyi inyɔ lɛmmɔ ɔdi lɛgba ɛtɛ ɛtɛ.

10Bagyumane lɛtɔ ɛtɛ ɛtɛ lɛni na linye ulu ɔmɛni lɛvi inyɔ bɔmmɔ bɔkɔku ku udu ɔdi unwi. Na awodu ani néle lɛtɔ lɛmmɔ lɛ́siku ɔkpanadi kudɔ lɛnɔ bɔdi bugbigbli bunwi pɛ.

11Kama ni, ɔnana ɔmɛni ɔ́kɔku ulu ɔmmɔ lɛnɔ lɛbɛbɛ na ubo lɛgba aavlanyɔ-inyɔ, nsu ɔban kɔyaku inyɔ kɔmmɔ ƒui bɔbɛbɛ bɔdi lɛgba leevu-ɛku kani. 12Na kɔgyumanakɔ lɛtɔ lɛni mbo lɛgba leevu leevu bɔbɛbɛ ku bune mmɔ anumi ni, awodu klukwii klukwii adi enye na ana bɔkuku ku bugbigbli bubo akɔkɔ kemmo bɔbɛbɛ ɛlɔ ɛlɔ. 13Ɔnana ɔmmɔ ɔ́kɔku ɔ́si bagyumanane ɔtɔ ɔmmɔ kowodu kɔmadi ɔ́via ulu úsie ɔtɔ ɔni na ulu ɔvi unyɔdi kowodu kɔmadi na ubo lɛgba aavlene-inyɔ. 14Na ɔtɔ ɔni na ulu ɔmmɔ kawɔlɔkɔ kammɔ ni, ɔ́kɔku anwu lɛnɔ na ubo lɛgba avlaatɛ-ine bɔbɛbɛ. 15Kawɔlɔkɔ ni, ɔ́kɔku ulu ɔmmɔ ƒui bune ɔ́si kowodu kɔmadi kɔmmɔ útédu ɔtɔ ɔni kayakun néti anumi kéboku kakpakɔ kaduli geen mmɔ, na ulu ɔmmɔ ubo lɛgba liti ku avlaatɛ-ɛlɔ. 16Bédie ƒansili na bagyumanane lɛtɔ lɛmmɔ awodu ƒui kemmo ku awodu ani nkya lɛtɔ lɛmmɔ ntɛ kemmo aani kalɛ na use na ɔtɔ ɔni nnye ulu ɔmmɔ kawɔlɔkɔ mmɔ kemmo kalɛ. Na bánwi ala na ebo udu kenye béti bákya awodu ani na ulu ɔmmɔ lɛvi inyɔ bɔmmɔ akya.

Búsie Kaduli Kedeedi Kemmo

17Ɔnana ɔmmɔ ɔ́tɔnku-mi na bɔ́sia ulu ɔmmɔ lɛlɔ bútéduo kakpakɔ kaduli geen kedeedi kemmo, na lɛ́nu ka bátu lɛtɔ avlaatɛ bámana kaduli kammɔ. Na bátu lɛtɔ lɛmɛni bámana kaduli kammɔ awodu ani náka ámana kudɔ kudɔ na kama kakɛ na lɛgba kasiakɔ kadi kakɛ lɛtɔ lɛmmɔ anumi ɔ́ka ɔmana kaduli kammɔ. 18Na mmɔ ndi ɔkwalɛ lɛgba kasiakɔ ka mmɔ kébo kánu ɔsu. Na nwuna bɔbɛbɛ ɔdi lɛgba liti ku avlaatɛ-ɛlɔ.

19Lɛ́nu kayakun kɔni na baasia teeduo kakpakɔ kaduli geen geen kemmo. Na lɛ́nu ka aku kɔ́kuku kutulo kɔyakun kɔni na baasia teeduo kaduli kedeedi kemmo. Ɔnana ɔmɛni ɔ́kɔku ɔ́si kaduli kedeedi kɔyakun kenye útédu kaduli kebliidi kayakun kenye na ubo lɛgba eti atɛ ku aavlanyɔ.

Bákɔku Kayakun Kani Nkya Katɔ Kakɛ

20Na ɔmmɔ kama ni, ɔnana ɔmmɔ ɔ́kɔku kayakun kani nkya katɔ kakɛ. 21Kayakun kamɛni lɛnɔ kebo bagyumane lɛtɔ ɛtɛ na ulu ɔni ntɛ úsela lɛlɔ. Lɛtɔ lɛmɛni bɔkɔku ku awodu ani nkya lɛtɔ lɛmmɔ ntɛ ku ɔban kayakun kani nkya ulu ɔmmɔ kawɔlɔkɔ ƒui lɛnɔ use aani kalɛ kani na use na ɔƒɛ katukɔ ɔban kayakun. Na ulu ɔni ntɛ úsie ɔban kayakun kani na katɔ kakɛ mmɔ lɛnɔ ɔdi lɛgba liti ku avlaatɛ bune ku lɛgba aavlene-inyɔ bɔbɛbɛ. 22Na lɛƒansili ku ɔban awodu ku ala ani na bánwi na ebo udu kenye béti bákya awodu ammɔ bɔdia ni, ese aani kalɛ na use na ɔƒɛ katukɔ ɔban kayakun mmɔ kemmo kalɛ. Kɔnyakɔ libili maatɛ na adubɔkɔ etédu ɔban ɔmɛni kenye na ɔtɔ ɔni kemmo na adubɔsia eduo unye kakpakɔ kaduli geen kammɔ. 23Na ulu ɔtɛ ɔ́si mmɔ úsie kakpakɔ kaduli geen geen kemmo kɔnakunwi aani kalɛ na ɔtɛ ɔ́si ɔƒɛ katukɔ ɔban kayakun úsie mmɔ. Ɔnana ɔmɛni ɔ́kɔku kayakun kani na anumi mɛni úti úsie kayakun kamaadi na lɛgba eti atɛ ku aavlanyɔ.

Búsie Kayakun Kadani

24Ɔnana ɔmmɔ ɔ́kpanku-mi na búsie na kayakun kani ka kada kakɛ. Na ɔ́kɔku awodu ku ɔtɔ ɔmmɔ kayakun úlieku kɔyakun kudeedi kɔni na ɔ́ka bɔkɔku pɛpɛɛpɛ. 25Na lɛƒansili lɛkya bagyumanane lɛtɔ lɛni ɔban ɔmɛni kemmo ku ɔtɔ ɔni kemmo na adubɔsia eduo ɔban ɔmɛni kayakun kemmo. Na ɔban ɔmɛni lɛnɔ bune bɔdi lɛgba liti ku avlaatɛ na bɔbɛbɛ bɔdi lɛgba aavlene-inyɔ. 26Kɔnyakɔ libili maatɛ na adubɔkɔ etédu ɔban ɔmɛni kenye na ɔtɔ ɔni kemmo na adubɔsia eduo unye ulu ɔmmɔ kawɔlɔkɔ lili ƒui. Na ɔtɔ anumi aatina kakpakɔ kaduli geen kammɔ. Na bánwi ala na ebo udu kenye béti bákya awodu ammɔ akya na ulu ɔmmɔ lɛlɔ. 27Na si ánu ávia kaduli kedeedi kamɛni úsie kakpakɔ kaduli geen kani nkya kemmo kada kakɛ ni, ɔban kayakun kadi kenye. Na ɔnana ɔmɛni ɔ́kɔku kuƒi kɔni nkya ɔban kayakun kani na anumi mɛni ku kani kemmo ntɛ na ubo lɛgba eti atɛ ku aavlanyɔ.

Kasiakɔ Katɛ Lɛban Lɛmmɔ Kenye Líduo Kakpakɔ Kaduli Geen

28Ɔmmɔ kama ni, bɔ́sia ɔban kayakun kani na kakpakɔ kada kakɛ mmɔ bútéduo kaduli kani na kemmo. Na ɔnana ɔmmɔ ɔ́kɔku ɔban kayakun kammɔ na kélie ku kɔni na kaduli kedeedi awodu kemmo. 29-30Na geen ni, lɛla biala na lɛkya ulu lɛlɔ lílieku ekpo edeedi adi. Na bagyumane lɛtɔ ku awodu ani nkya lɛtɔ lɛmmɔ ntɛ ku ɔtɔ ɔni nnye ulu ɔmmɔ kawɔlɔkɔ na adubɔvia-nwu eduo ɔban ɔmmɔ kemmo ku lɛƒansili ƒui lise aani lideedi lɛdi kalɛ. Na ɔban ɔmmɔ ɔlati bune bubo lɛgba liti ku avlaatɛ-ɛlɔ, na bɔbɛbɛ lɛnɔ bubo lɛgba aavlene-inyɔ. 31Na ɔtɔ ɔni kemmo na adubɔsia mɛni eduo ɔban ɔmmɔ kemmo anumi aatina kaduli kedeedi kammɔ na ala ani na bánwi aani ebo udu na béti bákya kasiakɔ kammɔ ulu akya. Na libili maane násia úsie ɔban ɔmmɔ kenye.

32Ka bɔ́si mmɔ ni, bɔ́sia ɔƒɛ katukɔ ɔban kemmo bútéduo kaduli kani na kemmo mmɔ kemmo na ɔnana ɔmɛni ɔ́kɔku mmɔ lɛnɔ. Na mɛni lɛnɔ úlieku kudeedi. 33Bagyumanane lɛtɔ ku awodu ani nkya lɛtɔ lɛmmɔ ntɛ ku ɔtɔ ɔni kemmo na adubɔsia eduo ƒui bɔkɔku bɔdi unwi aani budeedi kalɛ. Na lɛƒansili lɛkya lɛtɔ lɛmmɔ ƒui kemmo. Na ɔban ɔmmɔ bune bɔdi lɛgba liti ku avlaatɛ-ɛlɔ. Na nwuna bɔbɛbɛ bubo lɛgba aavlene-inyɔ. 34Na ɔtɔ ɔni kemmo na adubɔsia eduo mmɔ anumi aatina kaduli kedeedi kammɔ. Na bánwi ala na ebo udu kenye bákya awodu ani na ulu lɛlɔ. Na libili maatɛ násia úsie ɔban ɔmmɔ kenye.

35Ɔnana ɔmmɔ ɔ́kpanku-mi úsienku ɔban ɔni na katɔ kakɛ. Na ɔ́kɔku ɔban ɔmmɔ na bɔkɔku bunwi pɛ kani na ɔdi ku lɛkladi. 36Bagyumane lɛtɔ ku awodu ani nkya lɛtɔ lɛmmɔ ntɛ ku ɔtɔ ɔni kemmo na baasia teeduo mmɔ ƒui ni, lɛƒansili lɛkya ɔna ƒui lɛlɔ. Nwuna bune bɔdi lɛgba liti ku avlaatɛ-ɛlɔ. Na nwuna bɔbɛbɛ bɔdi lɛgba aavlene-inyɔ. 37Na ɔban ɔmɛni lɛnɔ aani lɛni nkya kaduli kani na kemmo mmɔ kalɛ ni, nwuna anumi aatina kaduli kedeedi na bánwi ala aani ebo udu bákya awodu ani na ulu lɛlɔ mmɔ akya. Libili maane nsia útédu ɔban ɔmmɔ kenye.

Lɛ́nu Ɔtɔ Ɔni Kemmo Na Baadú Bebuo Taakpa

38-39Na ɔtɔ ɔni kemmo na adubɔsia eduo ɔban ɔmmɔ kemmo na katɔ kakɛ mmɔ ni, lɛ́nu ka ala kasiakɔ ine bɔlɛ. Inyɔ na ɔƒɛnyi unwi na inyɔ lɛnɔ na ɔƒɛnyi ɔkladi. Na nwuna lɛlɔ na baadú bebuo bani na baakyula taabla akpala. Na ɔtɔ ɔmmɔ kamadɔ ni, ɔtɔ blii ɔdi unye ɔni kemmo na baakpila bebuo bamɛni asa na badu-ma bakyula ƒui bete Unwoti na ɔƒɔ-nwu anu iye bakpa babla ekpidi lili buvele akpala. 40Ala kɔsiakɔ ine bamba linye kaduli kedeedi kammɔ libili lɛni násia lísie ɔtɔ ɔni kemmo na baasia teeduo mmɔ. 41Anwuɔsu ala kɔsiakɔ kɔmmɔ ƒui kubo maane. Ine na keyi na ine lɛnɔ na ɔtɔ kemmo kesii kani na baadú bebuo mmɔ 42-43ku kesii kani na baasia-ni asa na beti bakyula na lɛkpabi lɛlɔ.

Na kɔsiakɔ kɔni nlɛ ɔtɔ kemmo kɔmadɔ ni, atabi ala kɔsiakɔ kɔdi kɔlɛ na kɔ́kuku aani animi ntɛ kukolo aavlanyɔ na bɔbɛbɛ ku bune ƒui bɔdi aani animi kukolo avlaatɛ avlaatɛ. Na ana lɛlɔ na baasia ala ani na beeti taadu bebuo. Na bébo ewele aani bune ndi animi kukolo ɛtɛ ɛtɛ bálɛ awodu ammɔ lɛlɔ bámana.

Ɔtɔ Ɔni Kemmo Na Bakpane Baakya

44Ɔnana ɔmmɔ ɔ́kpanku-mi na bútéduo kaduli kani nkya kemmo mmɔ kemmo. Mmɔ ni, lɛ́nu lɛtɔ inyɔ na unwi unye ɔban ɔni na kaduli kani na kemmo mmɔ katɔ kakɛ, na ɔkladi unye kaduli kani na kemmo mmɔ kada kakɛ. 45Amu na ɔ́su-mi ɔnini, “Ɔtɔ ɔni na aanu ka unye ɔban ɔni na katɔ kakɛ mmɔ kɔmadɔ ni, anwu ndi bakpane bani mɔɔbla kabla na kakpakɔ ɔdi. 46Na ɔni nnye ɔban ɔni kada kakɛ mmɔ kamadɔ ni, mmɔ ndi bekyuli bani muubunku kabla na lɛkpabi lɛlɔ lɛnɔ ɔdi. Na bana ƒui Sadok bebi ku bawɔ bani ndi Lewiƒuɔ bani kani na Unwoti úte kuƒi ka babla Unwoti bakpane.”

Lɛ́nu Kakpakɔ Kaduli Geen Ku Kakpakɔ Kammɔ

47Ɔmmɔ kama ni, ɔnana ɔmmɔ ɔ́kɔku kaduli kani kemmo mmɔ na kana bune bɔdi lɛgba eti atɛ ku aavlanyɔ na bɔbɛbɛ lɛnɔ lɛni kani. Na lɛ́nu lɛkpabi lɛdi na kakpakɔ kammɔ anumi.

48Búsie bútédu kakpakɔ lɛgbanya kemmo na ɔnana ɔmmɔ ɔ́kɔku kayakun kammɔ na nwuna bune bɔdi lɛgba aavlanyɔ-ine. Na bɔbɛbɛ bɔdi lɛgba maane. Na ɔ́si kayakun mmɔ úsie kowodu kɔmmɔ kudɔ ubo lɛgba ɛlɔ ɛlɔ ɔvi ɔni ku ɔni. 49Na lɛgbanya mmɔ geen anwu ubo lɛgba avlaatɛ-ine bune na bɔbɛbɛ bɔdi lɛgba aavlanyɔ. Na básia libili bétédu mmɔ. Na atabi akpa anyɔ enye libili lɛmɛni ɔdi biala ɔvi ɔni ku ɔni.

Currently Selected:

Esekiel 40: lef

Highlight

Copy

Compare