Esekiel 39
39
Bádi Ɔga Gog Lɛlɔ
1Unwoti ɔnini, “Esekiel, ɔyawine ubi, du Ɔga Gog kukpi kɔtɔ na asu-nwu anini,
“ ‘Awɔ mɔɔdi Mesek ku Tubal lɛlɔ, nsu ami Unwoti ndi-ɔ ukisine! 2Ndubo-mii bɔtɔnku kama kama na lɛkpɛ-mii lɛsiku katɔ mmɔ liboku Israel abi kudɔ. 3Ndubo ƒula kataminta bubo bɔlɛku-ɔ kɔmiinu kɔnu kemmo na libo atula ammɔ lɛnɔ lɛlɛku ƒula kɔdianu kɔnu kemmo. 4Na awɔ ku ƒula bekpone ƒui bɛdubo bukpi na abi ammɔ lɛlɔ. Na baasɛ bakun bina bekpine 5bani ndubo bukpi buwi alakpi akɔ kesi kesii mmɔ. Ami Unwoti násu.
6“ ‘Ndubɔya na batu ogya bakya Magog ku kadi bani nli ɛpu kɔtu na baakali ka beli ƒaa na lɛla lɛdi lɛɛɛda-ma mmɔ. Na badubɔti ka ami ndi Unwoti.
7“ ‘Mina kadi bekyuli badubo-mi bɔti na basɔ balakya-mi lɛnyi kɔƒa. Na badubɔti ka ami ndi Israelƒuɔ Ukyuli Kedee. 8Limeyi lɛsia ulu lɛdubo lɛni na ala amɛni adubo bɔlɛ kalɛ kani na líse kenye.
9“ ‘Na si limeyi lɛmmɔ lídu ni, Israelƒuɔ badubo bana bekisine bani nebekpi-ma kudɔ mmɔ ekpola bɔla na bana lɛma lɛni kemmo na beli mmɔ. Na kɔtaminta ku atula lidu ku kekpo agyumanala ani bada mmɔ ku bana ligyii buti butaakya ogya. Na ɔmmɔ ɔdubɔbla bana ekyweni akwa maatɛ sɔɔn. 10Ekpola amɛni na badubo butaakyula na egyii ani na ɔlɛka bada iye ekyweni ani na bawia bavi kenye. Lɛni na Israelƒuɔ badubo bekyuli bani néyu-ma na bédumi-ma bábla-ma kalala udu biala kasi budie. Ami Unwoti násu.
Báva Ɔga Gog
11“ ‘Si báyila Ɔga Gog udu báwɔlɔ ni, ndubɔya na bava-nwu na nwuna bekpone akɔ na Israel mmɔ na kesii kani baalɔ banii Belusiene Kɔwɛ si éti ésela Ɛpugyie ɔƒɛ katukɔ kakɛ. Na bekyuli kavakɔ kammɔ kadubo bubomo ɔni na kadubutile ukyuli biala masu ɔnii ɔɔsia mmɔ ɔvi ulu. Anwuɔsu na badubɔlɔ mmɔ ɔmmɔ kama banii Gog ku nwuna bekpone kɔwɛ.
12“ ‘Abuli maatɛ na Israelƒuɔ badubo buti bɔva bekpine bammɔ na babla bana kalɔ kammɔ sɛɛn. 13Na kalɔ kammɔ ukyuli biala ɔdubo bubunku na bekyuli bammɔ bɔva kemmo. Na limeyi lɛni na badubɔnu mina bukeye ni, ɔdubɔbla limeyi lɛni na ɔdi biala ɔdubɔkɛ ɔbu.
14“ ‘Si abuli maatɛ ammɔ ávi áwɔlɔ ni, mina kadi bekyuli bammɔ badubo bekyuli badi bɔƒuna na bavi banu si bekpine badi básɔ bébu bakya kesii kadi na bátava ama. Na badubɔbla ɔmɛni abuli maatɛ bamba kalɛ na bati nwaa ka ukpine ɔdi útaƒɔ lɛlɔ ɔɔɔtɛ kesii kadi na ubile ekisila adi na kalɔ kammɔ kalabla sɛɛn. 15Na kesii biala na bánu ukyuli likubi ni, badubɔbla likposela bese mmɔ. Na ɔmmɔ kama na beyitaƒu bebeti-nwu batáva na Belusiene Kɔwɛ kemmo mmɔ 16na ude kesii kani na badubo lɛnyi bɔsia banii Gog Bekpone Ɔma. Na kalɔ kammɔ kadubɔsɔ kabla sɛɛn na ɔmmɔ kama.’ ”
17“Esekiel, ɔyawine ubi, ndubo limeyi bɔdi na Israel abi lɛlɔ na lɛbla akpala na mmɔ. Anwuɔsu ya na baasɛ ku bebuo ku alakpi akɔ bebuo na basi lɛƒɛnyi ƒui bebo na babakun akpala lɛna na bani ubugya lɛnɔ. 18Badubo bekpone ku baƒɔ lɛlɔ badine lɛna bɔkun. Bekyuli bammɔ na ndubo bɔdu bɔbla akpala aani kalɛ na baadú baƒonu ku bese ku ɔmantɛ bakɔ taabla akpala. 19Mɔɔwia ka baasɛ bammɔ bakun lɛna bemo na bani ubugya lɛnɔ na udu-ma ɔkwɛ aani kalɛ na baaní ntɛ teekpi. 20Badubo babadi mina kadikɔ na bakun bapɔnkɔ lɛna ku bekpone lidu lidu lɛna beyile eƒi. Ami Unwoti násu.”
Israel Ɔdubɔsɔ Unwini Ubenye Nwuna Kenyekɔ Kuuku
21Unwoti ɔnini, “Si lɛ́ni kalɔ lɛlɔ kadi bekyuli kɔtu ni, badubɔnu kalɛ na muukeye. 22Na ɔ́si uwi ɔmmɔ lɛlɔ lɛnɔ ni, Israelƒuɔ badubɔnu bɔti ka ami ndi Unwoti, bana Katɔti. 23Na baƒɔ lɛnɔ badubɔnu bati ka bunye na bénye Israelƒuɔ lɛlɔ na bábɔku-ma bálɛku bana kalɔ lɛlɔ ka bábla ekpidi báƒiɔ-mi ɔsu. Línwini kama lɛ́kya-ma na bana bekisine békpoku-ma na bádu-ma. 24Ulikplu ku bubie lidu lidu lɛ́ƒɔ-ma keliela kemmo, anwuɔsu na bámanku ka lɛni-ma kɔtu.
25“Ɔƒaani ni, ndubo Israelƒuɔ kɔnyana bɔnu na lɛkpanku-ma lɛsiku baƒɔ lɛma lɛni kemmo na bákya mmɔ lɛsɔku liboku bana kalɔ lɛlɔ. Ɔsika Yakob bebi ku bawɔ na badi, anwuɔsu ndubute-ma kusɛ kusɛ na lɛtina-ma ka nse kedee. 26Na badubo bulie ku keyi buɛɛ na ama alati kalɔ lɛlɔ. Na kɔƒa kukpo-ma si bényimo alaekpidi ani na bábla bábavi na bákya-mi kɔƒa. 27Kadi bamba bekyuli bani ndi baƒɔ badubunye banu kalɛ na ndubɔƒɔ Israelƒuɔ lɛlɛku bana bekisine enu kemmo lɛsɔku liboku bana ɔma. Na kadi bammɔ bekyuli badubɔnu ka nse kedee.
28“Mina bekyuli badubɔnu bati ka ami Unwoti, bana Katɔti, nábɔku-ma lɛ́lɛku bana kalɔ lɛlɔ aani batɔntɛne kalɛ. Na ɔƒaani ndubɔsɔku-ma liboku ama alati bana kalɔ lɛlɔ. 29Nsɔ lɛɛɛdubo kama bunwini bɔkya mina kadi bekyuli Israelƒuɔ kudii, na mina Kɔyu kɔdubo bulieku-ma. Ami Unwoti násu.”
Currently Selected:
Esekiel 39: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
