Esekiel 31
31
Badubo Egyipteƒuɔ Ɔga Bɔda Bɔva Kalɔ Aani Kugyii Kpakplaa
1Na akwa leevu-unwi kama uwi ɔni na béƒie Ɔga Yekonia ku abu bakladi bátɔlɔku bésienku Babilon kalɔ lɛlɔ aani batɔntɛne kalɛ ni, Unwoti ɔ́tɛmiku-mi na kɔbuli kɔtɛdi limeyi lideedi lɛlɔ ɔnini,
2“Esekiel, ɔyawine ubi, su Egyipteƒuɔ ɔga ku nwuna bekyuli anini, ‘Bibo ɔyikun bitulo ukyuli bamba biala ka kalɔ lɛlɔ. Na ɔƒaani ni, bise atu na binu. 3Dii uwi ɔdi návi kemmo ni, kugyii kpakplaa kɔdi kúnye Lebanon kalɔ. Na kubo kɔgba kunengudi kpakplaa kɔni nálɛ kúsie kayaa ƒui. 4Na kugyii kɔmɛni kubo ntu pii geen ɔni náya na kɔɔlɛ́ lili kaduɛ. Na ntukpa bɔni amadɔ muute lɛku kemmo egyii akladi anya ntu asa na aalɛ́ lili. 5Nsu kugyii kunengudi kɔmɛni aku kɔ́lɛ lili kangyaa ƒui kutulo akladi na kuna kɔgba kúbo na kúne lɛnɔ. 6Baasɛ bábla ayu bákya-ku kɔgba akɔ. Na bebuo bamba lɛnɔ beebo taabawɔ kuna kalɔ. Na kadi bekyuli beelie kuna ɔyuli kalɔ. 7Kuna kɔgba kɔɔdia bɔnu geen na kuna ligyiitu lɛnɔ líduo lísie kalɔ kemmo ɔgyu na kɔɔkɛ́ ntu kaduɛ na lɛti lɛti lɛmmɔ kemmo. 8Na egyii kpakplaa ani ƒui nákya mina ɔban kemmo na Eden muedi kɔdi kuládia bɔnu lɛni. Na kugyii kɔdi udu uuubo na kuna kɔgba kúne aani kugyii kɔmɛni ɔdi. 9Ami Unwoti nábla na kugyii kɔmɛni kɔdia bɔnu lɛni. Na ami kani mɔɔyá na kuna kɔgba kɔɔlɛ́ lili lɛni na egyii bamba ani na ɔban ɔmmɔ kemmo aakɔ́ku-ku kalɛ na anya lɛnɔ alɛ kugyii kɔmɛni.
10“ ‘Na awɔ Egyipte ɔga, se kɔtu na enu lɛla lɛni na ami Unwoti Katɔti mɔɔsu-ɔ. Kugyii kɔmmɔ kɔ́kuku ɔni na kuna kɔgba kúsie kayaa geen, anwuɔsu kɔɔkun lɛmɛnɛ na kɔɔtina lɛlɔ. 11Anwuɔsu ami Unwoti Katɔti ndubo kugyii kɔmmɔ buni na liti-ku lɛkya ɔƒɔ lɛlɔ ɔdine ɔdi kalɔ na ɔni-ku kɔtu na kuna kalala ala bɔbla ɔsu. 12Baƒɔ balalane badubo-ku bɔda bɔva kalɔ na kɔsɔ kɔtɛ kesii kani na kɔ́yu mmɔ kani. Na kuna kugyigba eku ku ntɛ bɔni náƒɛ-ku kɔdubo bugyingya buwi kɔbi kɔmmɔ ƒui lɛlɔ ku kɔwɛ kɔmmɔ kemmo. Na bekyuli bani ƒui na nka belie-ku ɔyuli kalɔ badubo bɔtɔlɔ busie kesii bamba. 13Na baasɛ badubɔbla kɔkyakɔ na ugyiigba ɔmmɔ kemmo, na bebuo bamba bataanya taavi-ku kɔgba akɔ. 14Na kugyii kɔdi kɔsɔ kɔɔɔdubo lili bɔlɛ na kɔkuku aani kugyii kɔmɛni udu kudii ina bi ntu nkya-ku. Kugyii biala kɔdubo bukpi aani kalɛ kani na ukyuli uukpi na kuduo kalɔ kemmo na kekpine.
15“ ‘Limeyi lɛni na Asiria úbo kalɔ lɛni ni, ami Unwoti Katɔti lɛ́su ntukpa bunengudi ku bubliidi ƒui na béwulo-nwu. Anwuɔsu ntukpa ku abiɔ ani nkya kalɔ kemmo ƒui áda bɔgba áya. Na Lebanon abi lɛlɔ ƒui ábla suu na átina kalɛ na kɔnyana kɔda-ma. Na lɛku kemmo egyii ƒui éwiile evete. 16Kugyii kɔmɛni kɔ́ƒɛ kúwi kalɔ na kúduo kekpine. Na bekyuli ƒui bánu na lɛlɔ lɛ́tɔ-ma. Na ɔban kemmo egyii ku Lebanon egyii aƒunadi abuni ani nkya kekpine mmɔ ánu ɔmɛni na lɛlɔ lɛ́yɔ-nya na kugyii kɔmɛni bukpi ɔsu. 17Na bekyuli bani ƒui nákɛ katamikukɔ na kuna kalɔ lɛnɔ béduo kekpine na bátáblaku-ma unwi na mmɔ.
18“ ‘Ala amɛni ƒui adubo awɔ Egyipte ɔga ku ƒula bekyuli bɔbla! Bise aani egyii amɛni, na bɛ́kuku na bibo ɔkplu lɛnɔ geen na kalɔ lɛlɔ. Nsu ɔƒaani ni, badubo-mii bɔda bɔva kalɔ aani kalɛ kani na ɔ́lɛku ɔban kemmo egyii ammɔ na ékpi. Na bɛdubo kekpine buduo na bitáblaku bani nkya kekpine mmɔ unwi. Ama bábla ulikplu na bátayia Unwoti na batábu lɛla lɛdi lɛnɔ. Anwuɔsu békpi kukpi buɛ kɔmmɔ udu. Ami Unwoti Katɔti násu.’ ”
Currently Selected:
Esekiel 31: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
