Esekiel 32
32
Bédie Ɔkwanu Béte Egyipteƒuɔ
1Na akwa leevu-anyɔ kama uwi ɔni na béƒie Ɔga Yekonia ku abu bakladi bátɔlɔku bésienku Babilon kalɔ lɛlɔ aani batɔntɛne kalɛ ni, Unwoti ɔ́tɛmiku-mi na kɔbuli leevu-kunyɔdi kuna limeyi lideedi lɛlɔ ɔnini,
2“Esekiel, ɔyawine ubi, du Egyipteƒuɔ ɔga kɔtɔ na asu-nwu anii ami nnini, ‘Aabla ala aani gyata ɔni nkɛ mɔɔví kalɔ kammɔ lɛlɔ. Nsu buse kani na ese odenge na ketu kemmo ɔni muubwile aba ntu ku nwuna lɛgba na bɔɔbla avlɔvɔ taakɔliku katɔ. 3Egyipteƒuɔ ɔga, se kɔtu na enu lɛla lɛni na mɔɔsu-ɔ. Ami Unwoti Katɔti ndubo-ɔ buƒie bɔkya mina asawu kemmo na lɛya na baƒɔ lisu lɛdi bani-ɔ bebewi utuvi. 4Ndubo-mii bubo butáva kalɔ kekpludi lɛlɔ na baasɛ ku bebuo babaduli bina ɔlɔna bakun. 5Na lɛgyingya bina ɔlɔna ɔni ndubo buteebu mmɔ lɛkya abi ammɔ ƒui lɛlɔ ku kɔwɛ kɔmmɔ lɛnɔ kemmo. 6Na bina ubugya ɔdubo bɔgba butéyile ntukpa bɔmmɔ ƒui kemmo. 7Ndubo bɔya na liƒlukutu litile kayaa kammɔ ku ayabi ƒui anumi kalɛ na ɔƒɛ ku kɔbuli ƒui kɔsɔ kulekeye. 8Kayaa ƒui kadubo bɔbla tonwu tonwu. Na bina kalɔ kemodi kammɔ kabla suu. Ami Unwoti násu.
9“ ‘Na ɔƒɛ ɔdubo baƒɔ bani kɔku na bítenu kudii bɔda si lɛ́su-ma kalɛ na líti lɛ́kyula-mii. 10Badubo bɔyia geen si uwi ɔni na lɛ́di-mii lɛlɔ lɛ́wɔlɔ na muuƒwimi mina kewii taavinku kayaa taatina kalɛ na líti lɛ́du-mii. Na liƒu bonwu litaada-ma na lɛlɔ lɛnɔ litaatɔ-ma ka baaagyi lɛla lɛni ndubo-ma bɔlɛku ɔsu.
11“ ‘Babilon ɔga ɔdubo ubekpo awɔ Egyipteƒuɔ ɔga! 12Na bekpone bani mbo kalala betulo ƒui na kayawi kamɛni kemmo ndubo babadu ƒula bekpone na bayila-mii udu ƒui ku ala ani lɛlɔ na bɛɛkun lɛmɛnɛ mmɔ. 13Na lɛdu bina bebuo bani ƒui muunye ketudɔ mmɔ taadi di. Na bekyuli ku bebuo ƒui ɔdi ɔsɔ ɔɔɔdubo bubu na bataabla aba taakya ntu bɔmmɔ kemmo. 14Etudɔ mmɔ adubɔbla kpoo na ntu bɔmmɔ bɔtɛ kede kede.
15“ ‘Egyipte kalɔ kadubo bubie na kasɔ katɛ ukpludi ɔni na lɛla lɛdi lɛsɔ lilakya ngba na kana kemmo. Na awɔ ku ƒula bekyuli ƒui bɛdubɔnu bɛti ka ami ndi Unwoti.’
16“Ɔmɛni ndi bɔlɛ kpakplaa bɔni na muute-mii. Na amu ndi ɔkwanu ɔni na badubo budie bute bina bekpine. Ami Unwoti Katɔti násu.”
Egyipte Ngba Bɔ́wɔlɔ Ku Kɔnyana
17Kɔbuli kɔmmɔ kani limeyi lɛlɔndi ni, Unwoti ɔ́su-mi ɔnini,
18“Esekiel, ɔyawine ubi, teewulo kɔnyana na Egyipteƒuɔ ɔsu. Na adu-ma kukpi kɔtɔ na edie-ma atu na betéduo kekpine kesii kani na badubɔva ama lɛnɔ bebunku kadi bamba bekyuli bani lɛnɔ mbo ɔyikun ɔmmɔ udu. 19Na asu-ma anii, ‘Bɛkana na bɛdia bitulo bekyuli bamba, nsu amii lɛnɔ bɛdubo kekpine mmɔ buduo butébunku bani ƒui naaabu Unwoti mmɔ. 20Bilakana ɔmɛni bukeli! Ɔsika ukisine kewii kenye kagya-mii kukuuku ka katu bina ɔdi biala kadu. 21Bekpone bani na bebo kayi geen asa na bádu-ma na bakya kekpine mmɔ badubo-mii eduo bute na baƒɔ-mii ku ebiti.’
22-23“Asiriaƒuɔ kɔƒiɔtɔ kɔkya mmɔ. Ama nákya bekyuli liƒu dii, nsu bádu-ma na kekpokɔ na batɛ kekpine mmɔ na kɔƒiɔtɔ kalɔ kalɔ ƒui kesii kani mɔɔyila ukyuli ɔbu biala mmɔ.
24-25“Elamƒuɔ bekpone kɔƒiɔtɔ lɛnɔ kakya mmɔ. Bekpone bani kɔƒiɔtɔ na bánu mmɔ lɛti ɔ́ya na bágyini. Nka bekpone bamɛni nákya bekyuli bɔyia geen dii na bátataayia Unwoti lɛnɔ. Ɔƒɛni amu batɛ kekpine kpoo bebunku babambadi bani lɛnɔ na bádu na kekpokɔ na bana anumi éwi kalɔ na kɔƒa kuukpó-ma.
26“Bekpone bani nási Mesek ku Tubal kɔƒiɔtɔ lɛnɔ kɔkya mmɔ. Bekyuli bamɛni ƒui bátataabu Unwoti na bákya bekyuli liƒu geen lɛnɔ, nsu békpi na kekpokɔ. 27Na bátava-ma na bakɔliku-ma lɛnyi katɔ aani bekyuli bani nékpo na ɔma lili na báƒɔ lɛnyi kalɛ na báva-ma ku bana ekpola.
28“Badubo amii Egyipteƒuɔ lɛlɔ bɔdi buɛ buɛ na badubo amii lɛnɔ bava bubunku bekyuli bani nékpi na kekpokɔ na udu ɔmɛni kemmo.
29“Edomƒuɔ baga ku bana batɔnkune kɔƒiɔtɔ kɔkya mmɔ. Bekyuli bamɛni lɛnɔ bákɛ ɔyikun dii úbavi. Na ɔƒaani ni, batɛ kekpine bebunku bekpone babambadi bani lɛnɔ nátaabu Unwoti na békpi na kekpokɔ.
30“Batɔnkune bani nási kalɔ kammɔ katɔ kakɛ ku Sidonƒuɔ ƒui kɔƒiɔtɔ kɔkya mmɔ. Bana bekpone kpakplaa bani nákya bádi liƒu lɛla béte bana bekisine dii, nsu ɔƒɛni amu batɛ kekpine ku kɔƒa bebunku bani na bádu na kekpokɔ mmɔ.
31“Unwoti Katɔti ɔnii si bina Egyipteƒuɔ ɔga ɔ́nu kɔƒiɔtɔ kɔmɛni ni, kubiti kɔdubɔda anwu ku nwuna bekpone ka ɔɔɔdi ama lɛti muubó abi amɛni udu. 32Ami nátala-nwu nnii usie na utákya kayawi ƒui liƒu, nsu anwu ku nwuna bekpone ƒui badubo bukpi na bava ama lɛnɔ bebunku bani ƒui na balayia Unwoti na batɛ kekpine mmɔ. Ami Unwoti Katɔti násu.”
Currently Selected:
Esekiel 32: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
