Esekiel 30
30
Egyipte Kalɔ Kadubunwini Kalɔ Kakwiidi Kekpludi
1Unwoti ɔnini,
2“Esekiel, ɔyawine ubi, su Egyipteƒuɔ anii ami nnini, ‘Biteewulo kɔnyana ka bɛsɔ biiibo lɛnunsia lɛdi ɔsu, 3ɔsika bɛdubo bina kɔtu bɔni bɔƒɔ uwi klukui kemmo! Na uwi ɔmmɔ ɔdubɔbla lɛdisa bonwu ku udu bɔyii ute kadi bekyuli ƒui. 4Na bekyuli badubo bina Egyipte kalɔ kammɔ alati bukpoku na Kus ɔdubo abi bubo. Na badubo-mii bɔdi na kekpokɔ. Na badubudie ala abuni ƒui balɛku bina kalɔ kemmo na kasɔ kewi ukpludi na kebie lɛnɔ. 5Na bekpone bani na bɛ́ƒɔ bɛ́siku Kus ku Libia ku Lidia ku Arabia kalɔ lɛlɔ na kayu kenye ku Israel badi ƒui badubo bukpi na kekpo kammɔ. 6Badubo bina kadi bamba bekpone bani nnye nte-mii bɔdu na bina ɔyikun ɔni na bibo ƒui kenye kekulo na bɛyii udu. Na bekyuli badubo bukpi ɔ́si Migdol na katɔ kakɛ útédu Aswan na kada kakɛ ami Unwoti násu.
7“ ‘Bina Egyipte kalɔ ndubo bunwini ɔmii ɔni na bekyuli badubuni bese ƒui na kalɔ lɛlɔ na lɛma linengudi lɛmmɔ ƒui lɛsɔ liwi ukpludi ɔni na lɛla lɛla lɛsɔ lilakya-ni kemmo. 8Ndubo ogya bɔtu bɔkya bina kalɔ kemodi kammɔ ƒui na ukyuli biala ɔni menye ɔnii uukpó ute kalɔ kammɔ ɔdubo bukpi. Na bɛdubo bɔnu bɔti ka ami ndi Unwoti.
9“ ‘Na limeyi lɛni kani lɛlɔ na ndubo Egyipte kalɔ bɔkyula ni, limeyi lɛmmɔ kani lɛlɔ na ndubɔtala ukyuli lɛkya Kus kalɔ lɛlɔ bekyuli na batákɔ lɛsa bete-ma ka ama lɛnɔ bana bɔkywi bɔsia ulu bɔdubo. Baakali ka ama belie-nwu ƒaa, nsu liƒu ala adubɔlɛku-ma.
10“ ‘Bina Egyipteƒuɔ bekpone bebo ɔkplu geen, nsu ndubo Babilon Ɔga Nebukadnesar bɔtala bɔkya-mii na ubo ubadi-mii lɛlɔ ƒui kede kede. 11Anwu ku nwuna bekpone balalane badubo bebekpo-mii na bayila-mii udu na beƒie-mii ala ƒui baƒɔ na bina bekyuli bekpi bewi lisu na kesi kesii.
12“ ‘Ndubo bɔya na Nil Ketu bonwu kammɔ kakwii na liti kalɔ kammɔ liye lite bekyuli bekpidi badi. Na ndubɔya na bekyuli basi kaƒɔ bebo bababla na kalɔ kemodi kammɔ kenwini kalɔ kakwiidi kani kemmo na lɛla lɛdi lɛsɔ liladia. Ami Unwoti násu.’ ”
Egyipteƒuɔ Lɛma Linengudi Lɛni Lɛlɔ Na Baakun Lɛmɛnɛ Lɛdubo Bubie
13“ ‘Baƒiɔ ku ala ani ƒui amii Egyipteƒuɔ bɛ́bla bíse bíte lɛlɔ bɛɛkpá na Memƒis ɔma unengudi ɔmmɔ kemmo ni, badubo-nya bubo bɔbwɛ. Na bana akɔ ɔdi ɔsɔ ulebu na utaadi kalɔ kammɔ lɛlɔ. Na liƒu bonwu lɛdubɔƒɔ kalɔ kammɔ kemmo. 14Na Patros ɔma unengudi ɔmmɔ ɔdubo bubie na ɔsɔ uwi ukpludi. Na badubo Soan ɔma ɔmmɔ ƒui bɔkyula buwi kalɔ. Na bina ɔma unengudi Tebes lɛnɔ badubo-nwu bɔbwɛ! 15Mine kɔnyi ablala kpakplaa adubo bɔlɛku Pelusum ɔma unengudi ɔni na bátu awodu bámana mmɔ. Na badubo bekpone bani ƒui nnye Tebes mmɔ baagyumana bɔdu.
16“ ‘Ndubo ogya bɔtu bɔkya Egyipte kalɔ kemodi kammɔ ƒui! Na Pelusum ɔma unengudi ɔmmɔ ɔdubo buteedumo ku kɔnyana. Tebes ɔdubo bubuli na liƒu bonwu liƒie Memƒis kadi bekyuli na bataabla gyuma gyuma uwi biala. 17Bekpone bakɔdi bani ƒui nkya Heliopoli ku Bubastis ƒui badubo bukpi na kekpokɔ na beƒie bekyuli bakladi batɔlɔku aani batɔntɛne. 18Ɔyikun ɔni na bina kalɔ kebo ni, anwuɔsu na bɛɛkun lɛmɛnɛ na bɛɛkɔliku lɛlɔ katɔ lɛni. Nsu si uwi ɔni na líbile-nwu bubile na líkulo bina lɛmɛnɛ bɔkun kenye ni, Taƒanes ɔma unengudi ɔmmɔ ƒui ɔdubo bɔbla suu. Na liƒlukutu suu lɛdi lɛdubɔƒɔ kalɔ kammɔ ƒui lɛlɔ ku kɔnyana uwi ɔni na bákpanku-mii baalɛ́ku aani bekyuli beƒiedi kalɛ. 19Na si uwi ɔni na lɛ́wɔlɔ Egyipteƒuɔ kɔtu kɔmɛni udu bɔni bɔwɔlɔ lɛni ni, bɛdubɔnu bɔti ka ami ndi Unwoti.’ ”
Ɔyiku Ɔ́lɛ Egyipteƒuɔ Ɔga Lɛkɔkɔ
20Na akwa leevu-unwi kama uwi ɔni na béƒie Ɔga Yekonia ku abu bakladi bátɔlɔku bésienku Babilon kalɔ lɛlɔ aani batɔntɛne kalɛ ni, Unwoti ɔ́tɛmiku-mi na kɔbuli kudeedi limeyi maatɛdi lɛlɔ ɔnini, 21“Esekiel, ɔyawine ubi, ami Unwoti lɛ́di Egyipteƒuɔ ɔga lɛlɔ! Lɛ́ƒɛ-nwu kɔnu ɔni na ukyuli biala útenyimi-ku iye bakya-nwu kɔnu kɔmmɔ lɛdiku lɛdi kalɛ na kuyile-nwu bɔsa na kɔsɔ kɔyu-nwu ɔkplu na ɔkana kewii kadi bɔda. 22Anwuɔsu su-nwu anii línwini-nwu ukisine unengudi ƒui. Na ndubo-nwu enu ananyɔ ammɔ kɔbuni ku kukpidi ƒui bɔƒɛ! Na nwuna kewii kadubo bɔlɛ-nwu enu bubo kalɔ úsela uwi ƒui. 23Na ndubo Egyipteƒuɔ bugyingya bɔkya kayawi kemodi lɛlɔ.
24-25“ ‘Na ndubo Babilonƒuɔ ɔga ɔyikun bɔkya bubu na liti mina kewii lite-nwu na uti-ka ukpo Egyipteƒuɔ. Na lɛya na Egyipteƒuɔ ɔga ɔyikun ɔyii udu na uteedumo na lɛlɛ lɛni na ɔ́ƒɔ ɔsu. Na ɔdubunu ɔlɛ geen útédu ka ukpi na Babilonƒuɔ ɔga anumi. Na kalɔ lɛlɔ bekyuli ƒui badubɔnu ka ami ndi Unwoti. 26Ndubo Egyipteƒuɔ lɛlɔ bunye na bakya bekyuli bamba kalɔ aani bekyuli beƒiedi na baƒɔ kalɔ lɛlɔ na banu bati ka ami Unwoti náni-ma kɔtu.’ ”
Currently Selected:
Esekiel 30: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
