Esekiel 25
25
Unwoti Ɔ́tɛku Amon Litemi
1Unwoti ɔ́su ɔnini,
2“Esekiel, ɔyawine ubi, du Amonƒuɔ kɔtɔ 3na asu-ma anini, ‘Lɛlɔ lɛ́yɔ-mii na bɛ́kɛ ebiti uwi ɔni na bábwɛ mina kakpakɔ ku uwi na bádi Israelƒuɔ lɛlɔ na béti-ma bátɔlɔku aani bekyuli beƒiedi kalɛ. 4Anwuɔsu ɔƒɛni ni, ndubo bɔya na adua bamba bekyuli bani nási ɔƒɛ katukɔ kalɔ kakwiidi kemmo bebo na badi-mii lɛlɔ. Na badubɔbla kuliekɔ na bina kalɔ kemmo na badi bina egyiibi na bani bina bebuo anyi ntu. 5Bina Rama ɔma unengudi ɔmmɔ ni, ɔdubo udu bɔyii na livo sɔɔn ndubo mmɔ bɔkwɛ bunwini bebuo ala betine adila kadikɔ. Na kalɔ kakladi ƒui kenwini baƒonu adila kadikɔ. Na bɛdubo bɔnu bɔti ka ami ndi Unwoti Katɔti. 6Biikisi Israelƒuɔ ɔni ɔsu na enukpɛ kani na bɛ́gya na bɛ́va ku lɛlɔyɔ na lɛla lɛni nálɛku-ma ɔsu. 7Anwuɔsu ndubo-mii buti bute bina bekisine bani ndubo-mii ala ƒui buƒie bɔƒɔ na bayila-mii udu ƒui. Na bina kadi bekyuli badubɔsa ɔni na bɛsɔ bɛɛɛdubo lɛla lɛdi budu na balɔ-mii banii kadi. Na bɛdubɔti ka ami Unwoti nábla ɔmɛni.’ ”
Unwoti Ɔ́tɛku Moab Litemi
8Unwoti Katɔti ɔ́su ɔnini, “Moab kadi bekyuli bákali ka Yudaƒuɔ bátavumana ku kadi bamba bekyuli. 9Anwuɔsu ndubɔya na bekpo Moabƒuɔ lɛma lɛni na nnye ɔmii lɛlɔ na bátu kɔgyumanakɔ bámana ƒui úbunku Bet Yesimot ku Baal-Meon ku Kiriataim. 10Ɔƒɛ katukɔ kalɔ kakwiidi kani bekyuli nékpo Amonƒuɔ ni, ama kani ndubo amii Moabƒuɔ lɛnɔ bukpo. Na bayiƒala amii lɛlɔ kede kede ƒui aani kalɛ na bekyuli báyiƒala Amonƒuɔ. 11Ndubɔya na bani Moabƒuɔ kɔtu geen na bekyuli bani nkya mmɔ bati ka ami ndi Unwoti.”
Unwoti Ɔ́tɛku Edomƒuɔ Litemi
12Amu na ɔmmɔ kama ni, Unwoti Katɔti ɔ́su ɔnini, “Edom kadi bekyuli báƒiɔ na bedie Yudaƒuɔ kasi kadi. 13Anwuɔsu ndubo Edom kɔtu bɔni na lɛdu bana bekyuli ku bebuo ƒui. Na ɔ́si Teman ɔma útédu Dedan ɔmii ɔni nwi mmɔ ƒui kadubɔbla kalɔ kekpludi kani kemmo na lɛla lɛdi lɛsɔ lilakya. 14Ndubo ami ɔlati mina kadi bekyuli bɔtala bɔkya-ma na betédie-ma kasi kalɛ na Edomƒuɔ banu mina kɔnyi kpakplaa ablala bati na bana akɔ. Na badubɔnu bati ka ami ndi Unwoti Katɔti si lɛ́ni-ma kɔtu lɛni.”
Unwoti Ɔ́ni Ƒilistiƒuɔ Kɔtu
15Unwoti ɔnini, “Ƒilistiƒuɔ balalane bamɛni béedie bana bekisine kasi básia kama kɔlɛ kɔlɛ na báwia ka bayila bana bekisine bammɔ udu kede kede. 16Na ɔƒaani ni, uwi údu ka ami lɛnɔ liti Ƒilistiƒuɔ aani mina bekisine kalɛ na lɛdu bana ɔdi biala na bana lɛma lɛni nwi ɛpu kɔtu mmɔ bene ƒui. 17Ndubo-ma kasi budie na mina kɔnyi kpakplaa kemmo na uwi ɔmmɔ na badubɔnu bɔti ka ami ndi Unwoti.”
Currently Selected:
Esekiel 25: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
