Esekiel 24

Libui Lɛnwandi Lɛdi Lɛlɔ Kɔtɛ

1Na akwa yaalenwi kama ɔni na béƒie Ɔga Yekonia ku abu bakladi bésienku Babilon kalɔ lɛlɔ ni, Unwoti ɔ́tɛmiku-mi na kɔbuli leevudi limeyi leevudi lɛlɔ. Na ɔ́su-mi ɔnini,

2“Esekiel, ɔyawine ubi, nweni ɔmwi kɔbuli limeyi lɛmɛni se, ɔsika ɔƒɛni kani na Babilon ɔga úse kalɔ uukpóku Yerusalem na limeyi lɛmɛni lɛlɔ. 3Na asu mina batuɔkplune bani mɔɔta teenye-mi lɛlɔ anini, ‘Bidu ntu biwi lɛnwabui kemmo na biti bɛsia ogya lɛlɔ. 4Na biti baƒonu babuni ƒui ebuli ku anu bɛkya libui lɛmmɔ kemmo ubunku ekubi ani mbo lɛmwi na ese kpɛtɛ kpɛtɛ. 5Bɛtɛ ekyweni bɛkya ogya ɔmmɔ kemmo kaduɛ na ogya ɔmmɔ ɔbi lɛna lɛmmɔ lɛlɔ na bɛya na lɛbi kaduɛ.

6“ ‘Etemila amɛni kalɔ aatina ka Yerusalem ɔ́yii udu na anwu ɔdi ɔsa! Bekyuli badune béyi ɔma ɔmmɔ kemmo tɛɛ. Na ɔma ɔmmɔ ƒui use aani libui lɛkukudi lɛni nétili. Báda lɛna lɛmmɔ bédie unwi unwi na lɛ́sa na libui lɛmmɔ kemmo na ɔdi ɔsɔ ɔɔɔdaku-ni lɛla lɛni mɔɔlɛ́ku libui lɛmmɔ.

7“ ‘Yerusalem ɔma bekyuli bádu bekyuli bani nli ɔma ɔmmɔ kemmo na útabla aani beku lɛti bewi ubugya ɔni néwi kalɔ kakwiidi kammɔ lɛlɔ muedi. 8Nsu lɛ́nu ubugya ɔmmɔ na ɔɔva taasu-mi ɔnii ndie bana badune bammɔ kasi.

9“ ‘Ami Unwoti Katɔti ndubo ɔma unengudi ɔmmɔ kɔtu bɔni na bana kalala ala bɔbla ɔsu. Na ndubo egyuku bonwu bonwu lɛgyavonku bɔsala. 10Anwuɔsu boku ekyweni na emomo ebu na asala ogya. Na eƒula lɛnɔ lɛmmɔ ku ekubi na akya-nya ala na lɛbi lɛyɔ kaduɛ. 11Na eti libui likpludi lɛmmɔ asia ogya na lɛbi ligyie kaduɛ kalɛ na butili bɔmmɔ bɔlɛ-nwu lɛlɔ ƒui. 12Lɛ́ɛsia ulu bamba biala lɛlɔ na butili bɔmmɔ bútalɛ.

13“ ‘Ekpidi ku likyulikpi lɛ́bɔ Yerusalem lɛlɔ ɔni na líidie-mii ala amɛni lɛ́nɔ na ulu biala lɛlɔ na bɛnii bíni. Anwuɔsu likpidi lɛmmɔ kemmo na bɛdubo bɔkya wetédu ka lɛ́ya na mina kɔnyi ablala ébo-mii lɛlɔ kalɛ na ɔ́manku. 14Uwi ɔmmɔ ɔdubo ɔ́bla bi ɔ́bla dɛ! Na si úbo lɛnɔ ni, lɛɛɛdubo ɔdi biala kɔnyana kɔdi bɔnu iye lɛvumana mina kasusu lɛnɔ. Ɔdi biala ɔdubɔkɛ nwuna kɔtu bɔni na nwuna ablala kenye. Ami Unwoti Katɔti násu lɛla lɛmɛni.’ ”

Esekiel Ulekudi Úkpi

15Unwoti ɔ́su ɔnini, 16“Esekiel, ɔyawine ubi, ukyuli ɔni na aayɔ́ geen ni, ndubo-nwu ngba bɔƒɔ bɔsiku-nwu kudɔ. Nsu naaawia ka ewulo ku kɔnyana ala bɔka. 17Wulo kɔnyana na ƒula kayi kemmo kani na tabla tatina na bekyuli banu ɔmɛni bati na ƒula anumi lɛlɔ ka eewulo kɔnyana kɔdi. Tada ƒula lɛduni lɛni mma-a lili tamana iye edie ƒula lɛgbanvuo lɛni na akya na akɛ lɛgbakplu. Na teti lɛla lɛni lɛnɔ tebi ƒula anumi atina ka lɛla lɛdi lɛɛbla-a. Na tadi adila ani na kɔnyana bewulone lɛnɔ baadi aani kalɛ na ɔtɛ use na bekyuli baabla.”

18Limeyi linwi ni, nnye mɔɔtɛmiku bekyuli bammɔ ɔtanta ɔdi aani kalɛ kani na mɔɔyɔ́ bɔbla. Amu na limeyi lɛmmɔ useyi uwi ni, mina uleku úbile kenye. Na kadi kegye ni, lɛ́bla ala ani na Unwoti úbo-mi ɔda ɔnii mbla. 19Anwuɔsu ka bekyuli bammɔ bánu-mi lɛni ni, béye-mii banini, “Bi ɔsu na elewulo ƒ'ulekudi ɔni nékpi?”

20Amu na lídie kenye nnini, “Unwoti Katɔti ɔ́su ɔnii, 21‘Kakpakɔ kani lɛlɔ na bɛɛkun lɛmɛni na bɛɛkali ka bibo bɔnwuna na lɛla biala lɛɛɛdubo-mii bɔbla mmɔ ni, unye kagyumana ka ɔkyula kakpakɔ kammɔ na kayii udu. Na badu bina bebi bani na belie Yerusalem ɔmwi. 22Na mmɔ ni, bɛdubo lɛla lɛni na bɛ́nu ka mɔɔbla mɛni bɔbla amii lɛnɔ. Na bɛɛɛdubo lɛla lɛdi buti bubi bina anumi na bini na biladi adila ani na kɔnyana bewulone baadi lɛnɔ bɔdi. 23Na bɛɛɛdubo bina aduni bɔda bɔmami bina eli na biledie bina lɛgbanvuo lɛnɔ lɛgba na bɛsɔ bɛkɛ lɛgbakplu. Nsu bɛdubo bɔkɛ buteewulo kɔnyana na bina ekpidi ɔsu limeyi limodi. 24Mina ablala ndi bina bɔlɛ likposela ute-mii ka amii lɛnɔ bɛdubo ɔmɛni bɔbla lɛni kani. Na bɛdubo bɔnu bɔti ka Unwoti Katɔti náya na ala amɛni aalɛ́ lɛni.’ ”

25Amu na Unwoti ɔ́su-mi ɔnini, “Esekiel, kébu blii kani na ndubo kakpakɔ kani lɛlɔ na bekyuli bése kayi ka bebo bɔnwuna bɔkyula na liti bana bebi lɛnɔ libunku. 26Na limeyi lɛmmɔ kani lɛlɔ ni, ukyuli ɔdi adubo bukeli bɔsi ɔma unengudi ɔmmɔ kemmo bubo bubasu-ɔ ala ani nálɛ na mmɔ. 27Na mmɔ ni, adubo-ma bɔsɔ bɔkana bɔtɛmiku. Na enwini bɔlɛ likposela ete-ma na bati lɛnɔ ka ami ndi Unwoti.”

Currently Selected:

Esekiel 24: lef

Highlight

Copy

Compare