Esekiel 23

Ekpidi Bɔbla Bɔ́ƒɔ Banwani Beleku Inyɔ Badi Lɛlɔ Kemmo Geen

1Unwoti ɔnini,

2“Esekiel, ɔyawine ubi, se atu na enu banwani beleku inyɔ badi lɛlɔ litemi. 3Uwi ɔni na bétedu tɔ begblebi na bákya Egyipte kalɔ lɛlɔ ni, bénwini bayalɛ. 4Unengudi baalɔ Ohola na unye ute Samaria na ɔnamudi baalɔ Oholibama na anwu lɛnɔ unye ute Yerusalem. Beleku inyɔ bamɛni ƒui bébenwini mina beleku na báwɔ bebi béte-mi.

5“Na ina ka Ohola ɔdi mina uleku muedi ni, ɔmu ɔkya ɔɔdi kɔsɔnɔ taabla nwuna lɛyalɛ ala. Na ɔkɛ ɔsiaku nwuna Asiriaƒuɔ basɔnɔ kama. 6Na ɔda lɛlɔ uute bekpone bani na bakya lɛwu lɛni náƒɔ kuye geen mmɔ ku bekpone bani na benye kunyekɔ kunengudi na baadia bɔnu mmɔ ku bani muusé lɛgba mmɔ lɛnɔ. 7Ɔ́tɛ bekpone bani náƒɔ lɛnyi mmɔ ƒui kudɔ na ɔsia ɔɔkpá bana baƒiɔ bani muusé lɛlɔ mmɔ lɛnɔ. 8Ɔ́si ɔni kani na úse lɛla lɛmɛni kalɔ na Egyipte ni, anwu kani na ɔmu unye-nwu lɛlɔ mɛni na útada útaya tɔ kudii. Banana bátɛnku-nwu kalɛ kalɛ, nsu ɔmmɔ ƒui útedu-nwu ɔkwɛ na ɔmu unye ɔɔnu ulu teete bamamba uwi ndi uwi. 9Anwuɔsu lídie Ohola atu líte nwuna Asiriaƒuɔ bayɔne bani na ɔɔyɔ́ geen mmɔ. 10Na bédie-nwu lɛlɔ ala na béƒie-nwu bebi na bádu anwu ɔlati. Na beleku bani nkya kesii biala bátɛmi Ohola lɛlɔ ala ani nálɛ mɛni.

11“Oholiba ɔ́nu ala amɛni ƒui, nsu ɔƒɛni mmomu na nwuna ekpidi bɔbla bɔ́kɔ katɔ búbu na banana kudɔ bɔtɛ bɔɔda-nwu ɔkwɛ teetulo ɔnwani Ohola ɔdi ɔni na ɔ́bla muedi ƒui. 12Anwu lɛnɔ ɔkɛ ɔsiaku Asiriaƒuɔ bekpone bani mbo kunyekɔ kunengudi geen na baadia bɔnu mmɔ bani mɔɔkya bekpone lɛwu ku bani muulie bapɔnkɔ lɛlɔ teekpo mmɔ. 13Na alaekpidi bonwu bonwu ani udu na ɔnwani ɔ́bla kani lɛlɔ na anwu lɛnɔ unye.

14“Nsu si aani geen ni, anwu adi muedi asɔ etulo ɔnwani Ohola adi. Oholiba ɔ́nu Babilonƒuɔ banana bani na bébeyi kowodu na báta-ma bákya awodu ammɔ kemmo na béti kɔba kugyiedi bákwa-ma 15Adi ada-ma kuvobi na aduni bonwu bonwu ada-ma eli, na ɔmmɔ únyimene-nwu Babilonƒuɔ bekpone bani muulie bapɔnkɔ lɛlɔ mmɔ. 16Uwi ɔni kani na ɔ́nu-ma mmɔ kani na use-nwu aani ɔlɛka anwu ku-ma batɛ. Anwuɔsu ɔ́tala batu badi ɔnii batálɔ-ma beboku-nwu. 17Banana badi bási Babilon bébo na bábatɛnku-nwu kɔlɛ kɔlɔ útédu ka bana lɛlɔ lɛ́bɔ-nwu muedi. 18Ɔ́ya na bana ɔdia biala ɔ́nu-nwu kasɔngya na ɔɔɔdaku-ni si baanu aani ɔyalɛ muedi. Ɔmɛni ɔsu na lídie-nwu atu aani kalɛ na lɛ́bla ɔnwani unengudi.

19“Oholiba ekpidi bɔbla bútawɔ mmɔ. Mmomu búbie búbu na ɔɔbla aani kalɛ na útaabla na Egyipte kalɔ lɛlɔ. 20Ɔ́yɔ ka uteesie Egyipteƒuɔ kudɔ bani mbo beleku bɔyɔ ɔkwɛ geen aani bebuo ala betine mmɔ. 21Na ɔ́yɔ lɛnɔ ka nka ɔsɔ unwini ugblebi uwi ɔni na ɔ́kya útaabla nwuna lɛyalɛ kpakplaa ammɔ na útaada banana ɔkwɛ geen mmɔ.”

Unwoti Ɔdubo Oholiba Kɔtu Bɔni

22Unwoti Katɔti ɔnini,

“Oholiba, ina ka asɔ alayɔ ka ataakya ƒula bayɔne lɛlɔ ni, ami ndubo bɔya na bata benye-ɔ lɛlɔ na benye bamana-a aani bekisine kalɛ. 23Ndubo bakutine bakloƒu bani ndi bapɔnkɔ beliene bani mɔɔdia bɔnu na bebo kunyekɔ kɔni náƒɔ kuye geen bɔsala bɔsiku Babilon ku Asiria ku Kaldea kɔdua bekyuli bani nási Pekod ku Soa ku Koa. 24Bana bekpone yuu bammɔ badubɔsi kalɔ kammɔ katɔ kakɛ ku bana bapɔnkɔ kɛɛkɛ lidu ku ekpola. Na badubɔkya bana kekpo adala ku kɔbwa kɔni mɔɔgyumana-ma na babaka bamana-a na batɛku-ɔ litemi na badu-ɔ kɔtɔ ɔkɛnku bana ɔda bubo lɛlɔ. 25Lɛ́kɛ kɔnyi na bina lɛlɔ geen, anwuɔsu ndubo bɔya na babla-mii kalala na bekulo bina enwu ku atu. Na badubo ƒula bebi bɔdu na badu ƒula kaduli bekyuli bani ƒui nébu belie ngba. 26Ƒula adala ku sika ugyiedi asɛɛ ƒui badubo-nya bɔni budie-ɔ lɛlɔ. 27Na bina ulikplu ku lɛyalɛ ala bɔbla bɔni kalɔ na bíse na Egyipte mmɔ ƒui ni, ndubukulo-mu kenye. Na bɛsɔ biláyɔ ka biti ala ammɔ lɛlɔ kasusu muedi na biteenyimo emeyi ammɔ muedi.

28“Ami Unwoti Katɔti nnye kagyumana ka lidie-mii lite bina bekisine bani na biikisi kpakplaa na bana ala eesé-mii lɛlɔ mmɔ. 29Ala ani ƒui na bɛ́bla bíse lɛnɔ ni, badubo-nya buƒie bɔƒɔ kalala kemmo batɔlɔku na bɛsɔ bɛkɛ kasɔngya. Na mmɔ na ukyuli biala ɔdubo-mii bɔnu bɔti bayalɛ bani udu geen na bɛdi bɔti. Na bina ekpidi bonwu ani na bɛɛbla ndubo-mii budie bute lɛni, 30na ala amɛni udu alɛku-mii. Amii alati nálɛ ugyii ka bitaatɛ ku banana bani na badi baƒɔ na bitaakpa bana baƒiɔ. 31Ƒula ablala aaadia eeetulo ƒ'ɔnwani ulekubi ɔdi, anwuɔsu ndubo bɔya na mina kɔnyi kubo-ɔ lɛlɔ aani kalɛ na beeyile lɛla lɛdi ɔɔƒɛɛ kemmo teete ukyuli banii ɔni.

32“Lɛni na ami Unwoti Katɔti lɛ́ya na mina kɔnyi kúbo ƒ'ɔnwani ulekubi lɛlɔ aani lɛla lɛdi kalaku keyile na ɔ́ni. Na si lɛ́ya-a na áni na ɔɔƒɛɛ ɔmmɔ udu kemmo ni, bekyuli badubo-ɔ buteedumi taama. 33Na lɛla lɛni na adubo bɔni na mmɔ ɔdubɔya na ekpi-mu aani ntɛ na ayii udu ƒui kede kede na asɔ aláti ƒula lili ku lɛgba na liƒu ku udu bɔyii ala ani na ɔɔƒɛɛ ɔmmɔ ɔdanku ɔsu. 34Nsu ɔlɛka ani-mu lɛnɔ utédu eku muedi na ɔdi ulébu! Na adubo ɔɔƒɛɛ ɔmmɔ bubo bɔbwɛ na eti kɔƒɛɛkɛ kɔmmɔ eteekulo lɛlɔ na kɔnyana kemmo. Ami Unwoti násu.

35“Buse geen na ése éni-mi ƒui kede kede, anwuɔsu na ami lɛnɔ líse kenye ka adubɔkɛ ƒula lɛtuni na ala ani na ábla aani ɔyalɛ na eesé lɛlɔ mmɔ ɔsu.”

Bádu Banwu Beleku Inyɔ Kɔtɔ

36Unwoti ɔnini,

“Esekiel, ɔyawine ubi, uwi údu ka aya na Ohola ku Oholiba bati ka báƒiɔ na enyimene-ma bana ngba bukpidi bɔni na belie! 37Bálɛ-mi kama na baakpá baƒiɔ. Na bádu bekyuli na uwi ɔni na béti bana bebi bani na báwɔ béte-mi bákpa béte baƒiɔ bammɔ ɔsu. 38-39Ɔmmɔ kama básɔ bénwini bébeduo mina kakpakɔ limeyi lɛmmɔ kani lɛlɔ na bébile-ka likisi na kásɔ kátamanku ka bákpa-mi na mmɔ. Na béni na basɔ baládi mina Lɛnwunameyi lɛmmɔ lɛnɔ.

40“Bátala batu na bététiku banana básiku kɔƒɔ ɔlɔgyu béboku. Na ka bánu banana bammɔ kani na báta bákpi ntu na bákya ala anumi ku sika asɛɛ. 41Na bésie belie eboku mɔmɔɔmɔ kemmo na béti ugyulo nnɔmii ƒɛƒɛɛ ku oloƒui ɔni na nka ɔdi ami ɔdi básia ala kasiakɔ na bana anumi. 42Na lɛsɛ lɛ́ƒɔ-ma lɛtɔ kemmo ku ntɛ ekpila bɔbla bɔni na bekyuli bani na bététiku básiku kalɔ kakwiidi lɛlɔ mmɔ baabla. Na banana bamɛni beete beleku bammɔ asɛɛ abuni ani na baakya ɔkwɛ ku baga kɔbwa kɔni mɔɔdia bɔnu geen. 43Na mɔɔnu ka beleku bammɔ baada banana bammɔ ɔkwɛ geen ka ama ku-ma batɛ. 44Na sɔsɔ ni, banana bammɔ báyɔ Ohola ku Oholiba banwani beleku inyɔ bekpidi bamɛni básia kama kɔlɛ kɔlɛ. 45Nsu ni, banana babuni badubo banwa inyɔ bammɔ kɔtɔ bɔdu ka badi bekyuli badune ku bekyuli bani mɔɔlɛ bana bagya kama, ɔsika ɔkɔ uuubo-nwu kemmo ka báƒiɔ sɔsɔ.

46“Anwuɔsu ami Unwoti Katɔti mɔɔsu banwa beleku inyɔ bamɛni nnii ndubo bekyuli lisu lɛdi bɔsala ku kɔnyi na bebedumi-ma na beƒie-ma ala baƒɔ. 47Badubo-ma atabi bubo bɔdu na bebeyi-mii kɔkɛ. Na badubo bina bebi bɔdu na bakyula bina lɛtɔ ƒui bewi kalɔ. 48Na ndubɔya na lɛsɔnɔdi likpidi lɛmmɔ udu kenye kekulo na kalɔ kammɔ ƒui lɛlɔ. Na beleku bammɔ ƒui batɛya lɛla lɛdi basiku ɔmɛni kemmo na basɔ balabla udu ɔni na bɛ́bla mɛni. 49Badubo-mii kɔtu bɔni geen na bina lɛsɔnɔdi ɔsu ku kalɛ na bɛɛkpá baƒiɔ ɔsu. Na bɛdubɔnu bɔti ka ami ndi Unwoti Katɔti.”

Currently Selected:

Esekiel 23: lef

Highlight

Copy

Compare