Esekiel 22
22
Bádu Yerusalem Kɔtɔ
1Uwi ɔdi kama ƒui ni, Unwoti ɔ́su ɔnini,
2“Esekiel, ɔyawine ubi, enye kagyumana ka esie atádu Yerusalemƒuɔ kɔtɔ? Bekyuli badune sɔɔn néyi ɔma ɔmmɔ kemmo, anwuɔsu tényimene-ma bana likyulikpi ala ani na baabla 3na asu-ma anii ami násu nnini, ‘Yerusalem, awɔ nádu bekyuli pii na ákpa baƒiɔ. Kébu blii na badubo-ɔ kɔtu bɔni! 4Ekpidi ammɔ áya na áƒiɔ baadú-ɔ kɔtɔ. Na baƒiɔ bammɔ lɛnɔ báya na asɔ átamanku ka bada-a bakya-a lɛlɔ. Anwuɔsu na ɔlɛka bani-ɔ kɔtu na kawɔlɔkɔ kamɛni. Kadi bamba bekyuli badubo-ɔ bɔma na bataalɔ-ɔ anyikpi. 5Na ƒula liku bekyuli ku bani nási ɔlɔgyu ƒui badubuti ƒula ɔgbankpi benwini lɛmala na bataama-a.
6“ ‘Bina batɔnkune béti bana kenyekɔ ɔyikun ɔni na bebo baadú bekyuli. 7Bina akɔ ɔdi biala ulabu nwuna bawɔne. Na bɛɛnya bekyuli bani ndi baƒɔ lɛnɔ taakyaku bekpinebi ku bekpinele. 8Na kesii kani bene na nka bédie bése sɛsɛɛ ka use kedee ute-mi ni, biládi mmɔ lɛlɔ lɛni. Na mina Lɛnwunameyi lɛnɔ bɛɛbla-ni aani limeyi keeke bamba biala kalɛ. 9Bina badi baanyi ɔkɔ taada bana bakpana kenye kalɛ na badu-ma. Na badi lɛnɔ baakun lɛna lɛni na béti bákpa béte baƒiɔ na aƒiodu lidu lidu. Na badi lɛnɔ bana ɔlɔna ɔkwɛ adala ekpidi kama kani na basia baabla ƒui. 10Na badi baatɛnku bana bati ku beleku bani náƒɛ kɔnu. 11Na baatɛnku bana bakpana beleku na bani lɛnɔ baatɛnku bebi bele iye batibi muedi. 12Bina badi bɛɛƒɔ́ egulabi ka bɛdu ukyuli. Na biivó egulabi teete bina Israelƒuɔ banwani taaƒɔ́ kuvonsia bonwu na bɛɛsia ɔmmɔ lɛlɔ taawia lɛkɛ teese lɛlɔ. Na ɔni nébie utulo ƒui ndi ka bɛ́yiƒala ami Unwoti Katɔti.
13“ ‘Ndubo mina ɔvu ɔni na líkene buƒwimi bɔkya kayaa bɔtina kalɛ na líti kɔnyi lɛ́kya bina kalala ala ani na bɛɛbla ɔsu. 14Na si uwi ɔni na lɛ́wɔlɔ lɛla lɛni na mɔɔyɔ́ lɛbla ni, bina ɔtɔtɔ ɔni na bibo ƒui ɔdubɔyii ɔkya na bɛbla kpɛtɛ kpɛtɛ ɔni na kɔnu muedi bɛsɔ bilakana-ku katɔ bɔkɔliku. Ami Unwoti násu na nsɔ lɛɛɛdubo lɛla lɛdi bɔvumana. 15Ndubo-mii bugyingya bɔkya kadi bamba bekyuli kɔlɔ ƒui lɛlɔ na kalɔ lɛlɔ mɛni, lɛya na bɛda bina alaekpidi bɔbla ngba bɔni udu na bilie mmɔ bɛya. 16Bɛdubo udu bɔyii ƒui na bekyuli anumi. Na bɛdubɔnu bɔti ka ami Unwoti Katɔti nábla lɛla lɛmmɔ.’ ”
Ndubo Likpidi Biala Budie Yerusalem Lɛlɔ Na Ɔbla Sɛɛn
17Unwoti ɔnini,
18“Esekiel, ɔyawine ubi, mɔɔnu Israelƒuɔ aani bekyuli bani lɛlɔ neeebo kɔsia kɔdi aani abuala ekuku ani muubú teewi lɛyu kemmo si uwi ɔni bákya sika ɔƒualadi ogya kemmo na báƒɔ-nwu báwɔlɔ. 19Anwuɔsu ndubo-ma bɔkpanku bubasala na Yerusalem. 20-21Na ndubɔbla aani abuala lɛlɔ kabla ɔblane ɔni mɔɔla abuala ekuku ani na lɛyu kemmo na ntánwamana abuala ammɔ lise. Ndubo Israelƒuɔ bɔsala na liti mina kɔnyi kɔni nse aani ogya lɛnwamana-ma. Na badubo bɔyɛɛlɛ ƒui bewi kalɔ na Yerusalem ɔma unengudi ɔmmɔ kemmo 22aani sika ɔƒualadi na lɛyu kemmo. Na badubɔti ka ami Unwoti náni-ma kɔtu lɛni na mina kɔnyi kemmo.”
Ukyuli Biala Na Yerusalem Ɔ́ƒiɔ
23Unwoti ɔnini,
24“Esekiel, ɔyawine ubi, su Israelƒuɔ anii ekpidi bɔbla búyi bana kalɛ kemodi kammɔ, anwuɔsu ami Unwoti líti kɔnyi lɛ́kya-ma geen! 25Bana batɔnkune bese aani bagyata bani mɔɔkwanyi na baaduli ebuo ɔni béƒie teegyingya kɔkɛ kɔkɛ. Baadú bekyuli. Na beeyú ala ani na bánu ka áƒɔ kuye na bekyuli kudɔ. Na baadu beleku bagya na bana beleku baaƒɔ́ lɛlɔ teelie aani bekpinele.
26“Israel bakpane bédie mina ɔda bubo atu! Na ɔɔɔdi buni kani na béni na balábu mina ala ani na ese kedee mmomu béni na balátina bekyuli bammɔ kavumana kani na kakya ala ani na ese kedee mmɔ ku ala keeke ntɛ iye ala ani nse sɛɛn ku ani neeese sɛɛn ntɛ. Na baabla mina Lɛnwunameyi kalɛ kalɛ aani limeyi keeke biala kalɛ kani na ɔkɛnku ɔmmɔ ɔsu mina kadi bekyuli basɔ balabu-mi.
27“Israel kadi benengu bese aani beƒukutu bani anumi négyie na ebuo ɔni na beƒie lɛlɔ na baaduli-nwu teegyingya si báda-nwu. Na beelie ngba ngba bukpidi taakya bekyuli ɔlɛ na baadú-ma.
28“Na ɔmmɔ kama ni, Israelƒuɔ kenye bediene lɛnɔ beeti ala teebi bekyuli bamɛni ekpidi ani na bábla mɛni. Na baasu ɔkɔ ala ani na banii ami násu-ma. 29Na bekyuli bammɔ beeyu ama alati bana lɛlɔ na baanya bekyuli taakya. Na beedumi bawabane na baanya bawabane ku baƒɔ taakya taakɛ-ma lɛlɔ kɔsia.
30“Lɛ́sia anu nnii makɛ ukyuli ɔni medie ɔma unengudi ɔmɛni na ɔgyumana-nwu kalɛ na naaakyula-nwu na mina kɔnyi ɔsu. Nsu ńtakɛ ukyuli ɔdi. 31Anwuɔsu líti kɔnyi kpakplaa lɛ́kya Israelƒuɔ na ala ani na bábla ɔsu na ndubo-ma kɔtu bɔni geen na bati ka livo geen muuƒí-mi. Ami Unwoti násu.”
Currently Selected:
Esekiel 22: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
