Esekiel 18

Bekyuli Bani Muulie Taabla Ekpidi Badubo Bukpi

1Unwoti ɔnini, 2“Esekiel, muunú Israelƒuɔ lɛsugba kukuuku lɛdi lɛni na ɔdi biala ɔɔsu ɔnini, ‘Ebi ekpidi ani na bawɔne bádi ni, nyana ɔdu mɔɔƒɔ́ lɛlɔ taakya bana bebi nnye kemmo.’

3“Nsu su-ma ɔƒaani anii ami ndi Unwoti Katɔti na ɔni na ami nli ngba uwi ƒui mɛni ni, lɛsugba lɛmmɔ kenye kadubo bukulo na basɔ baaadubo-ni butaasu na Israel. 4Ɔsika ngba bɔni na bawɔne ku bebi bammɔ ƒui belie ni, ami na belie-mu bete. Na bani nábla likpidi lɛdi kani ndubo bukpi.

5“Ɔƒɛni kalɛ ukyuli ɔbuni ɔdi ɔkya ɔni na use siin

na lɛbuni kani na ɔɔbla.

6Na úni ka ɔkun lɛna lɛni na

béti bákpa

béte kadi bamba baƒiɔ

na ɔƒiɔtɔ kesii

kani na Israelƒuɔ báƒɔ-ma

bábakya mmɔ kemmo.

Na úni lɛnɔ ka ɔkpa Israel

baƒiɔ badi.

Na ulesie bekyuli bamba beleku kudɔ

iye beleku bani nánu kɔbuli lɛnɔ kudɔ.

7Na ulanya ukyuli taakya iye uyu ɔdi lɛnɔ.

Na lɛla biala na ukyuli ɔdi úti úse lɛlɔ kama

úte-nwu asa na úvo lɛla lɛdi ni,

ɔɔsɔku-ni teete-nwu.

Na uleyu bekyuli.

Na uute bawabane adila.

Na bani nkɛ ku kasɔngya ni, uute-ma adala.

8Ulevo ala teete bekyuli

na ɔƒɔ-ma lɛla lɛdi uye,

iye ɔƒɔ kuvonsia

kunengudi kɔdi.

Na ulayɔ ka ɔbla ukyuli ɔdi

likpidi lɛdi.

Na si litemi líbo badi ntɛ ni,

ɔɔtɛ-ma ntɛ litemi ulu siin lɛlɔ.

9Na ulalɛ mina ɔda bubo

ku etemila kama.

Mmomu ɔɔsia-mu kama siin.

Ukyuli ɔmɛni udu ɔdi

ukyuli ɔbuni.

Na muusé kenye ka

ɔdubulie ngba.

10“Nsu ɔƒɛni kalɛ ukyuli ɔmɛni ubo ubi ukpidi ɔni mɔɔdú bekyuli na ɔɔbla ekpidi bamba, 11ina ka ɔti útabla ala ammɔ udu kudii.

“Na ɔkɛ aƒiodu ɔɔkun lɛna,

na ɔɔtɛnku bekyuli beleku.

12Na ɔɔnya bawabane taakya,

na uuyú bekyuli.

Ɔƒɛni lɛnɔ ni, ala ani na bekyuli

béti bése lɛlɔ kama

béte-nwu ni,

ulásɔku teete-ma.

Na ɔɔkpá baƒiɔ,

na ɔɔbla ala ani muusé lɛlɔ.

13Na uuvó ala teete bekyuli

na ɔɔƒɔ́-ma ala teeye

na ɔɔƒɔ́ kuvonsia pii lɛnɔ.

Ukyuli ukpidi ɔni na use lɛni ni, ulakana na welie ngba bukpi kani na ɔdubo bukpi na anwu ɔlati ɔdubuti nwuna etila.

14“Nsu ɔƒɛni kalɛ ukyuli ukpidi ɔdi lɛnɔ ubo ubi ɔni mɔɔnu ka ɔti ɔɔbla udu ɔmɛni na anwu úni na ulabla lɛni.

15“Ɔɔɔkɛ ulakun lɛna

taavi na aƒiodu.

Na ulakpa Israel baƒiɔ badi lɛnɔ.

Na ulatɛnku bekyuli bamba beleku.

16Ulanya bekyuli taakya.

Na ulaƒɔ lɛla lɛdi teese kama

si bévo-nwu lɛla lɛdi.

Uleyu bekyuli.

Uute bawabane adila.

Na bani nkɛ ku kasɔngya ni,

uute-ma adala.

17Na ulevo ala teete bekyuli

na ɔƒɔ-ma ala uye,

iye ɔƒɔ-ma kuvonsia

kunengudi kɔdi.

Ɔɔdi mina litemi ku ɔda bubo

lɛlɔ siin.

Ukyuli ɔmɛni udu ulekpi na ɔti likpidi ɔsu, mmomu ɔdubulie ngba. 18Nsu ɔti ɔmmɔ ndubo bukpi na bekyuli bɔnya taakya ku kuyu ku likyulikpi ala bɔbla ɔsu.

19“Ngyi ka lɛla lɛni ɔsu na balani ubi kɔtu na ɔti alaekpidi lili ɔdi lɛla lɛni ndubo-ɔ bɔbla kalɛ kadi. Na ani ndi ka ubi ɔmmɔ ɔɔbla lɛla lɛni ndi ulu na ɔɔdi mina ɔda bubo lɛlɔ. 20Bekyuli bani muulie taabla likpidi kani na badubo bɔdu. Bebi baaadubo abi adi bubo na bana bawɔne ablala ɔsu. Na lɛni kani na bawɔne lɛnɔ baaadubo abi bubo na bana bebi ablala kenye. Mmomu bekyuli bani nábla likpidi kani na badubo bɔdu. Bebi baaadubo abi bubo na bana bati ekpidi ɔsu. Na bawɔne lɛnɔ baaadubo abi bubo na bana bebi ekpidi ɔsu. Na badubo kayu kabuni bɔƒɔ bute bekyuli babuni na ala ani na bábla ɔsu.

21“Na si bekyuli bekpidi báda bana ekpidi bɔbla báya na bése kalɔ baabla lɛbuni na baadi mina ɔda bubo lɛlɔ ni, baaadubo-ma bɔdu. 22Badubuti bana ekpidi ƒui bakyiɛ-ma na belie ngba, ɔsika bábla lɛbuni. 23Ami Unwoti Katɔti naaayɔ ka lɛnu ka ukyuli ukpidi ukpi. Mmomu ɔɔda-mi kubiti ka lɛnu ka únwini kama ɔ́kya nwuna ekpidi bɔbla na ulie ngba.

24“Nsu si bekyuli bekpidi bése kalɔ ku ngba bukpidi bulie na baabla ala ani muusé lɛlɔ ni, ɔmmɔ ɔdubɔya na belie ngba? Oowo! Mmomu bana lɛbuni lɛni na bábla bávi ƒui lɛdubo bɔyii na bayiƒala-nya. Na ɔmmɔ ɔsu badubo-ma bɔdu na bana ekpidi ɔsu.

25“Amii Israelƒuɔ bɛɛdú-mi kɔtɔ ka naaatɛ litemi ulu siin lɛlɔ! Nsu ni, binu, ɔɔɔdi lɛni na use! 26Si bekyuli babuni bese likpidi bɔbla kalɔ ni, ɔlɛka badu-ma, ɔsika bábla likpidi. 27Na si alaekpidi bablane bése kalɔ ku lɛbuni bɔbla ni, badubudie lɛlɔ kɔtu bɔni kemmo. 28Badubo bana alaekpidi ani na bábla bávi bɔkali bɔnu na bada-nya bɔbla baya kalɛ na baládu-ma. 29Nsu ɔmɛni ƒui kama bɛmu binye bɛɛsu bɛnii naaatɛ litemi ulu siin lɛlɔ. Nsu ami mmomu nábla likpidi na bina ablala eeese siin!

30“Ndubo ɔdi biala litemi bɔtɛku na lɛla lɛni na ɔ́bla kenye. Anwuɔsu bɛda likpidi bɔbla bɛya. Si ɔɔɔdi lɛni ni, ɔ́bla bi ndubo-mii kɔtɔ bɔni. 31Bini bina alaekpidi lilu lɛni ƒui lɛlɔ na bɛsia na bise kalɔ bitaabla kasusu kabuni na bɛsiaku-mi kama siin! Munuu bɔyɔ geen na bɛɛyɔ́ ka badu-mii na bina ekpidi bɔbla ɔsu? 32Ami Unwoti Katɔti naaayɔ ka lɛmmɔ udu lɛlɛku bina akɔ ɔdi. Anwuɔsu bɛda ekpidi bɔbla bɛya na bilie ngba!”

Currently Selected:

Esekiel 18: lef

Highlight

Copy

Compare