Esekiel 17

Kɔdigbo Baasɛ Inyɔ Ku Kɔdingyii Kabuli Kadi Lɛlɔ Kɔtɛ

1Unwoti ɔnini,

2“Esekiel, ɔyawine ubi, ti litemi lɛmɛni tásu Israel kadi bekyuli 3kalɛ na benu lɛla lɛni na mɔɔsu kalɔ. Kɔdigbo aasɛ ɔdi na avwi ebo-nwu ɔkplu geen na nwuna kɔgya kɔɔdia bɔnu ni, úveyi limeyi lɛdi úsie Lebanon. Na ɔ́ƒɛ kugyii kpakplaa kɔdi kagba katɔdi. 4Na úti-ka úsienku kalɔ kadi lɛlɔ bekyuli mɔɔdi kuye mmɔ na ɔ́da-ka ɔ́va bana ɔma unengudi unwi kemmo.

5“Aasɛ ɔmɛni úti kugyii kebi kadi na kuna kugyii kɔɔbla ntu pii ɔ́siku Israel kalɔ lɛlɔ na úti-ka útáva kalɔ kabuni kadi lɛlɔ na ketu kadi kɔtu. 6Kebi kamɛni kákwɛ na kábla kugyii kabuli na kébimi na kéde kégyingya kéwi kalɔ lɛlɔ. Kubo evete pii ku ligyiitu kpakplaa na kuna kɔgba kɔ́kɔ kúsie kɔdigbo aasɛ ɔmmɔ kudɔ.

7“Na ɔmmɔ kama ni, kɔdigbo aasɛ ɔbambadi ɔdi ɔkya na nwuna avwi ebo ɔkplu geen na nwuna lɛgya lɛnɔ lítigbli. Anwuɔsu kugyii kabuli kamɛni kénwiniku lɛlɔ ku ligyiitu ƒui lísienku kási ɔmii ɔni kemmo na báva-nwu úsienku aasɛ ɔmɛni kudɔ ku kasusu ka ɔdubɔkɛ ntu bɔsiku-nwu kudɔ utulo kesii kani na báva-nwu mmɔ. 8Nsu nka kesii kani na unye mmɔ kadi kalɔ kabuni kani na kebo lɛmwi ku ntu pii na ɔkana na udie evete kaduɛ na ɔnwu ebi bonwu bonwu.

9“Na ɔƒɛni ni, Esekiel, su-mi ƒula kasusu. Aabu ka kugyii kabuli kamɛni kadubo ngba bulie? Munuu kɔdigbo aasɛ udeedi ɔmmɔ ɔdubo-ku bɔgyu budie mmɔ na ude ebi ammɔ udie-ku lɛlɔ na evete ani ƒui na ɔdaku budie mmɔ ayɛyɛ? Ɔsika kɔdigbo aasɛ ɔmmɔ ɔdubɔkana na ɔdu-ku kpɛtɛ kpɛtɛ ɔni na ɔɔɔdi bekpone pii badi na ɔdubo busie butétiku. 10Kugyii kabuli kammɔ kebo ɔkplu na kálɛ lili kaduɛ, nsu uwi ɔni na ɔƒɛƒɛɛ ɔni mɔɔkula ala ɔdubuse kalɔ uteekpo ɔ́si kakɔ kakwiidi lɛlɔ kani ni, ɔdubo bɔyɛyɛ na ukpi.”

Unwoti Údie Litemi Lɛmmɔ Kalɔ

11Unwoti ɔnini, 12“Esekiel, ye Israelƒuɔ lɛsɛ bakyane bammɔ si bagyi lɛla lɛni na litemi lɛmɛni lɛdanku. Su-ma anii Babilon ɔga úbo Yerusalem na úbeƒie Yuda ɔga ɔ́tɔlɔku ku nwuna benengu lɛnɔ aani batɔntɛne kalɛ. 13Na ɔ́ƒuna ukyuli ɔdi ɔ́siku Yuda ɔga kaduli bekyuli akɔ na bényi lɛla lɛdi anwu ku-nwu 14kalɛ na Yudaƒuɔ bakladi ƒui bataabu ukyuli ɔmɛni kani na ama alati beeebo kalɔ kammɔ lɛlɔ ɔyikun ɔni na bataadi-ka lɛlɔ.

15“Nsu ukyuli ɔni na bése lɛga mɛni ɔ́ta únye Babilon lɛlɔ na ɔ́tala nwuna benengu bamba ɔnii besie Egyipte kalɔ lɛlɔ na betétiku bapɔnkɔ ku bekpone basiku mmɔ beboku. Aabu anii ɔga ɔmɛni kasusu kani na ɔ́bla mɛni kadubo-nwu bɔsia na ɔkana na ɔbwɛ lɛla lɛni na bényimiku Babilon mɛni bubile? Munuu kɔtu na badubo-nwu bɔni na lɛla lɛni na ɔ́bla ɔsu?

16“Ɔni na ami ndi Unwoti Katɔti ɔni na uli ngba uwi ƒui mɛni ni, muusé kenye ka Yuda ɔga ɔdubo bukpi na Babilon kalɔ lɛlɔ. Ɔsika úbile lɛla lɛni na anwu ku Babilonƒuɔ ɔga ɔni náƒuna-nwu úse mmɔ bényimi. 17Na Egyipteƒuɔ ɔga ku nwuna bekpone kpakplaa bani na Yudaƒuɔ bamɛni bététiku muedi baaadubo kɔsia kɔdi bɔlɛ bute Yudaƒuɔ si uwi ɔni na Babilonƒuɔ bábasi libili bámana Yuda lɛma linengudi ka benye bekpo lɛma linengudi lɛmmɔ na badu bekyuli bammɔ. 18Yudaƒuɔ ɔga útadi nwuna linyese lɛlɔ na útabu lɛla lɛni na únyimiku Babilonƒuɔ. Anwuɔsu badubo-nwu kɔtu bɔni!

19“Úse kenye na mina lɛnyi kemmo na ɔ́kpali-mi lɛnɔ ɔ́su ka ɔdubɔdi-ka lɛlɔ. Nsu úbile linyese lɛmmɔ na útadi-ka lɛlɔ. Na ɔ́kpali-mi lɛnyi keeke na úwi-mi anumi kalɔ. Anwuɔsu ɔlɛka bani-nwu kɔtu na lɛla lɛni na ɔ́bla ɔsu. 20Ndubo-nwu kakpagyuɛ kadi bɔkywɛɛ na lidie-nwu. Na ndubɔni-nwu lisienku Babilon na bani-nwu kɔtu, ɔsika ɔ́lɛmi kama na útasiaku-mi kama siin. 21Badubo nwuna bekpone babuni ƒui bɔdu na kekpokɔ na babɔku bani nébu ƒui begyingya bakya lɛƒɛnyi ƒui lɛlɔ. Ami Unwoti násu.

22“Limeyi lɛdi ni, ami Unwoti ndubo kugyii kpakplaa kɔni kagba mɔɔlɛ́ ɔwɔdi bukulo na liti-ku lɛlɛ Israel Kɔbi kɔni nákuku kutulo ƒui lili. Na kɔdubunye mmɔ kɔbi lɛlɔ kunwini kugyii bonwu kpakplaa na kɔnwu ebi bonwu bonwu lɛnɔ. 23Baasɛ lidu ƒui badubɔkɛ kabɛkɔ na kugyii kɔmmɔ kemmo. Na badubɔkya-ku kɔgba akɔ bakɛ bɔnwuna ku ɔyuli. 24Na lɛku kemmo kugyii biala kɔdubɔti ka ami Unwoti ndubɔkana na liboku egyii kangyaa ƒui kalɔ na lɛya na ani na átakuku alɛ lili. Na mɔɔyá na egyii ɔwɔdi eenwíni akwiidi Na mɔɔyá na ani na ákwii lɛnɔ eenwíni awɔdi. Ami Unwoti násu na ndubo mina litemi lɛlɔ bɔdi.”

Currently Selected:

Esekiel 17: lef

Highlight

Copy

Compare