Esekiel 16

Yerusalem Ɔɔɔsiaku-mi Kama Siin

1Unwoti ɔnini,

2“Esekiel, ɔyawine ubi, nyimene Yerusalemƒuɔ bana ekpidi ani na baabla na eesé-mi lɛlɔ mmɔ. 3Na asu-ma anii ami Unwoti Katɔti mɔɔsu nnini,

“ ‘Yerusalem, ɔmii ɔni kemmo na Kanaanƒuɔ bélie ni, mmɔ na báwɔ-ɔ. Na Amorini na ƒ'ɔti ɔdi, na ƒ'ini ɔdi Hitini. 4Uwi ɔni na báwɔ-ɔ ni, ukyuli ɔdi útekulo ƒula lɛkun kabuli útada-a útamami ƒ'ini lɛlɔ iye ɔkpila-a ntu bɔdi. Na ɔdi lɛnɔ úteti mma iye nnɔ útesusu-ɔ ɔlɔna na uti-ɔ ɔkya adi bonwu ani nábɛla-a kɔyɔ kemmo. 5Na ukyuli ɔdi útatina-a bɔyɔ bɔni udu náya na ɔbla ala amɛni ɔdi ute-ɔ. Na ɔdi muedi útanu ƒula kɔnyana na unuku-ɔ ɔlɛ ɔdi. Mmomu béni-ɔ na bébo-ɔ bátákya alakpi akɔ na báyiƒala-a.

6“ ‘Lɛ́nu uwi ɔni na atɛ ƒula ubugya kemmo eebó teeminime na ńtakana na linye lɛnu na ekpi. 7Lɛ́nu-ɔ lɛlɔ aani kalɛ na baanu kugyii blii kɔdi lɛlɔ na kɔɔlɛ́ lili. Na ébenwini ugblebi ɔkɔdi ɔni nákɔ anyii na ubo lili linwini gyɔlɔɔ, nsu kasɔngya kani na amu akɛ aaví.

8“ ‘Na uwi ɔni na lɛsɔ lɛnu-ɔ na ɔmmɔ kama ni, na éedu kalɛ na ati ɔnana. Ɔmmɔ ɔsu líti mina awu gyɔlɔɔ ɔmmɔ kakɛ kadi líbi-ɔ lɛlɔ na lɛ́bɛla-a kasɔngya líti lɛ́tina-a ka ndubo-ɔ bɔgyumana. Na líse-ɔ kenye kpakplaa na búnyimi ka enwini Unwoti Katɔti ami ɔdi na ntaanu-ɔ lɛlɔ.

9“ ‘Lɛ́ƒɔ ubugya ɔmmɔ lídie-ɔ lɛlɔ na líti nnɔmii lɛ́wɛɛ-ɔ. 10Líte-ɔ adi abuni ku lɛwu lɛbuni lɛni náƒɔ kuye litulo ku lɛgbanvuo lɛni na béti ebuo ɔku ɔbuni ƒui bábla. 11Na líte-ɔ limɔ asɛɛ abuni lidu lidu. 12Na líte-ɔ asikpɛɛ abuni ani na akya enwu ku atu ku kagabwa kabuni geen. 13Na ƒula asɛɛ ebi adi sika ugyiedi ku ɔƒualadi sɔɔn. Na linwo lɛbunidi ƒui na béti bédi ƒula adala na béti adi kpɛtɛ kpɛtɛ ani muukeye na adia geen bekpo-nya atu. Ɔlaaƒɔ ɔbuni ƒui na béti béƒi ƒula bodobodo. Na uwɔ ku nnɔ ala na aadi na aadia bɔnu geen aani uleku ɔga. 14Na ukyuli biala na ulie kalɔ kamɛni lɛlɔ ɔgyi ɔmɛni. Na ami Unwoti Katɔti nébunku-ɔ na énwini ugblebi ɔkɔdi ɔbuni ɔmɛni udu.

15“ ‘Amu na ebo ábanu áti ka aadia bɔnu na akana na akɛ ɔnana biala na aayɔ́, anwuɔsu na éti lɛlɔ éte ulusiene biala nási ɔɔví. 16Átu kuliekɔ kɔni nse-ɔ kedee éte lɛlɔ na éti ƒula adi abuni ammɔ ákya-nya akya. Na mmɔ na eeti ƒula bayɔne bani muubo-ɔ kudɔ teeduoku na biisié taatáyɔ lɛlɔ. Na ala amɛni udu átalɛ ka alɛ lɛni kudii! 17Sika ugyiedi ku ɔƒualadi asɛɛ ebi ani na líte-ɔ na éti ávɔ baƒiɔ ése éte lɛlɔ na aakpá na ɔdi likpidi na aabla taaƒiɔ-mi. 18Na adala ani na líte-ɔ ni, anya na ada aakya-ma. Na nnɔ ku oloƒui ɔni na líte-ɔ ni, anya na eeti teete-nya. 19Líte-ɔ ɔlaaƒɔ ɔbuni ku nnɔ ku uwɔ, nsu ala amɛni ƒui na eeti taakpa teete baƒiɔ bammɔ taakya-ma ebiti. Ami Unwoti Katɔti nnye mɔɔnu uwi ɔni na aabla ala amɛni ƒui.

20“ ‘Nsu ásɔ ábla lɛla lɛni na líbie litulo amɛni ƒui. Na éti ƒula kɔƒɔ bebi muedi ákpa éte baƒiɔ bamɛni! 21Ádu mina bebi kalɛ na eti-ma abla akpala. 22Ɔƒɛni amu asɔ eeebo kɔnu na likpidi bɔbla lɛlɔ kani na enye na éti lɛlɔ énwini ɔyalɛ. Na asɔ alabla kasusu taasiku uwi ɔni na adi ɔnamu na atɛ ubugya kemmo ku kasɔngya eebó teeminime.

23“ ‘Na ɔƒaani ni, ami Unwoti Katɔti mɔɔsu-ɔ nnii awɔ ɔdi ɔ́sa, áyii udu! Na ɔɔɔdi ekpidi amɛni kani na ábla, 24mmomu ásɔ átu bamba ákya lɛblɔnu lɛmmɔ ƒui ɔkɔkɔ biala lɛlɔ. 25Na mmɔ na aabla kɔƒa ala na ɔni na awɔ ku ukyuli biala nási ɔɔví bɛɛtɛnku lɛlɔ. Na aabla ɔmɛni kɔlɛ kɔlɛ limeyi ndi limeyi! 26Na kalɛ na akya-mi kɔnyi ɔsu ni, éti lɛlɔ éte Egyipteƒuɔ bani nnye kagyumana ka awɔ ku-ma bɛtɛ. 27Ɔmmɔ ɔsu na lɛ́ni-ɔ kɔtu na ɔni na lɛ́ya na Ƒilistiƒuɔ bekisine badivone bammɔ bébeƒie ƒula kalɛkɛ kadi báƒɔ. Nsu ama muedi ni, bina ala adi bene bɔbla bɔdi lɛla lɛni muusé-ma lɛlɔ. 28Bina bɔtɛ taavi bɔmɛni bútedu-mii ɔkwɛ, anwuɔsu bɛ́sɔ bɛ́ta bɛsiaku Asiriaƒuɔ na bísie bɛɛtɛ-ma kudɔ. Nsu ɔmmɔ lɛnɔ útemo-mii. 29Anwuɔsu ɔƒaamu bɛnii Babilonƒuɔ. Nsu beyedine bammɔ lɛnɔ bana ablala átakana na edu-mii ɔkwɛ.

30“ ‘Ami Unwoti Katɔti mɔɔsu ka biisé lɛlɔ geen ɔni bɛɛkana na bɛɛsia ulu biala lɛlɔ na bɛkɛ lɛla lɛni na bɛɛwia. 31Amii ku bana bɛ́tɛ ɔblɔnu ɔkɔkɔ biala lɛlɔ. Nsu ka bɛ́wɔlɔ ni, bíni egulabi adi bɔƒɔ. Na ɔmmɔ úbie utulo ɔyalɛ ɔni mɔɔtɛ banana kudɔ taaƒɔ egulabi adi!

32“ ‘Bítavumana ku uleku ɔni mɔɔlɛ́ ɔgyani kama taatátɛ baƒɔ kudɔ utulo ɔni na ɔtɛ ɔgyani kama. 33Bayalɛ ni, bɔtɛ na baatɛ banana kudɔ taaƒɔ́-ma egulabi adi. Nsu amii ni, amii mmomu muuti bina ala taatálɔ banana na bɔbɛ kemmo na beebo taabatɛnku-mii. 34Biiise aani bayalɛ bamba. Ɔsika ɔɔɔdi banana bammɔ muubo teebeye-mii banii amii ku-ma bɛɛtɛ. Amii mmomu mɔɔƒɔ-ma kayu kadi ka bebo babatɛnku-mii!

Ɔlɛka Bani Yerusalem Kɔtu

35“ ‘Yerusalem, ɔyalɛ ubendi, se kɔtu na enu. 36Awɔ nábi asiaku ƒula bayɔne na áda kɔdi édie na bátɛnku-ɔ. Na ákpa baƒiɔ bani muusé lɛlɔ na ádu ƒula kɔƒɔ bebi muedi éte-ma. 37Anwuɔsu ami Unwoti Katɔti ndubo ƒula bayɔne bammɔ bɔsala bani na aayɔ́ ku bani na ekisi ƒui na babasala asa na lidie-ɔ kasɔngya na bana anumi na benye bataanu-ɔ kasɔngya kammɔ. 38Ndubo-ɔ kɔtɔ bɔdu aani uleku ɔni na ulasiaku ɔgyani kama siin na ɔdi ukyuli ɔdune. Na ndubɔdu-ɔ kukpi kɔtɔ na mina kɔnyi kemmo! 39Na liti-ɔ lite ƒula bayɔne na ama ndubo ekpo ani na átu na bítaatɛnku lɛlɔ mmɔ bubo bɔbwɛ. Na beti ƒula adala ku asɛɛ ebi abuni ammɔ na bada-a bava kasɔngya ku enukplu. 40Ƒula bayɔne ku kasalakɔ bekyuli bani ndubuti kɔnyi bakya-a mmɔ ndubo-ɔ atabi bubo bɔdu na bebeyi ƒula ɔlɔna ukpine ɔmmɔ bewi kɔkɛ kɔkɛ 41na bakyula ƒula kaduli ƒui. Beleku bamba badubunye banu lɛla likpidi lɛni ndubɔlɛku-ɔ mɛni. Na muusé kenye ka ndubutile-ɔ kuƒi ka asɔ abla ɔyalɛ na asɔ ataaƒɔ ƒula bayɔne kayu kadi anii babatɛnku-ɔ. 42Uwi ɔmmɔ asa na mina kayi kadubɔyɔ na lɛda kɔnyi ku kogyulo bukpo lɛya.

43“ ‘Ákya-mi kɔnyi geen na ala ani na ábla na eesé lɛlɔ mɛni ɔsu ku kalɛ na áyiƒala kalɛ na lɛ́nu-ɔ lɛlɔ uwi ɔni na ɔdi ɔnamu. Ɔmmɔ kama asa na ébenwini ɔyalɛ na ƒula ala bɔbla kemmo. Ɔlɛka akɛ ƒula kɔtu bɔni! Ami Unwoti Katɔti násu.

44“ ‘Ɔmmɔ ɔsu ni, lɛsugba lɛmɛni ndubɔkya bekyuli kenye na awɔ Yerusalem lɛlɔ banini, “Kalɛ na ubi uni use ni, lɛni kani na ubidi ulekubi lɛnɔ ɔdubuse.” 45Ƒ'ini ɔni nékisi ɔgyani ku anwu ɔlati kaƒɔ bebi ni, anwu nálɛ. Na átavumanaku ƒula banwani belekubi bani lɛnɔ nékisi bana bagya ku bana bebi. Amorini na ƒ'ɔti ɔ́di na ƒ'ini lɛnɔ Hitini na ɔ́di. 46Ƒula ɔnwani ulekubi unengudi ndi Samaria ɔma unengudi ɔni na ƒula katɔ kakɛ ka akpaklɔ lɛma lɛni náka lɛ́mana-nwu. Na ƒula ɔnwani ulekubi ɔnamudi ndi Sodom ɔma unengudi ɔni nkya úsie kada kakɛ ku akpaklɔ lɛma lɛmmɔ ƒui. 47Bana ngba uliedu kama na ásia ku bana kalala ɔdi ala bɔbla kama, anwuɔsu na uwi útetu asa na ƒula bubie búbetulo na eesé lɛlɔ geen teetulo-ma muedi. 48Ɔni na ami Unwoti Katɔti nli ngba uwi ƒui mɛni ni, mɔɔsu ka Sodom ku lɛma lɛni na nwuna amadɔ mmɔ muedi bana ekpidi étedu awɔ ɔdi ɔmɛni udu.

49“ ‘Bátaatalaku lɛlɔ katɔ na bébile lɛlɔ. Na ala ƒui ása-ma, nsu ina amu béni na bétebunku bawabane ku bani na balakana na bebunku lɛlɔ na ulu ɔdi lɛlɔ. 50Bákali ka bádia betulo ukyuli biala na baabla ala ani na nkisi. Anwuɔsu na lɛ́yila-ma udu.

51“ ‘Amii Yerusalemƒuɔ bɛ́bla ekpidi ani na etulo Samariaƒuɔ adi kunyɔ. Na bina alaekpidi ani udu na bɛ́bla ni, ɔ́ya na mɔɔnu Samaria ku Sodom aani si lɛla lɛdi lɛɛɛda-ma na bátabla ekpidi adi munu munu. 52Anwuɔsu bana kɔtu bɔni bɔdubo-ma bɔbla ƒaa ƒaa butulo amii adi ƒui. Kɔƒa kɔdubo-mii bukpo na anumi ewi-mii kalɔ, ɔsika bina ablala eesé lɛlɔ geen.

Kɔƒa Kɔdubo Yerusalem Bukpo

53“ ‘Limeyi lɛdi lɛdubo lɛni na ndubute Sodom ku Samaria ku bana lɛma lɛni na amadɔ kusɛ kusɛ. Na awɔ Yerusalem lɛnɔ ndubute-ɔ kusɛ kusɛ. 54Na kɔƒa kɔdubo-ɔ bukpo na ala ani na ábla ɔsu. Na Sodom ku Samaria lɛnɔ ni, bana kayi kadubɔyɔ na banu ka bátabla alaekpidi ani udu na awɔ Yerusalem ábla. 55Si uwi ɔni limeyi lɛmmɔ lídu ni, awɔ ku Sodom ku Samaria ƒui ni, ala adubɔsɔ adianku-mii ku akpaklɔ lɛma lɛni na amadɔ ƒui na bɛsɔ binwini bibese kalɛ na bíse kukuuku. 56Yerusalem átalaku lɛlɔ katɔ kakaaka ɔni na átaapii Sodom muedi. 57Nsu ɔƒaani ni, ukyuli biala ɔ́nu ɔ́ti kalɛ udu na ebo kalala. Siria ku Ƒilistia ku ƒula liku bekyuli ƒui balálɔ-ɔ lɛnyi lɛbuni lɛdi. 58Anwuɔsu na ala ekpidi bonwu ku ekisila ani na ébile ƒui ɔlɛka aƒɔ-nya kayu. Ami Unwoti násu.

59“ ‘Yerusalem, ámanku kɔtu bɔni, ɔsika ébila mina linyese ku ala ani na línyimiku-ɔ. 60Nsu mina anumi asia lɛla lɛni na línyimiku-ɔ uwi ɔni na átabi tɔ lɛlɔ mmɔ. Anwuɔsu ndubo-ɔ kenye kadi buse kani ndubuse kete uwi ƒui. 61Na si ákali ánu ala ani na ábla ábavi ni, na kɔƒa kukpo-ɔ. Na ɔni ntulo ƒui ndi si uwi ɔni na lɛ́sɔku ƒula banwani bani ndi Sodom ku Samaria líboku-ɔ aani ƒula bebi kalɛ ina ka ɔmmɔ ɔɔɔdi lɛla lɛni na línyimiku-ɔ. 62Ndubɔsia linyese lɛmɛni anu geen, ɔsika kese-mi kedee, na adubɔnu ati ka ami ndi Unwoti. 63Ndubuti lɛla biala lɛkyiɛ-ɔ, nsu adubɔkali ala ani na ábla anu na kɔƒa kukpo-ɔ kɔvili ka asu lɛla lɛdi muedi. Ami Unwoti násu.’ ”

Currently Selected:

Esekiel 16: lef

Highlight

Copy

Compare