Esekiel 1

Esekiel Ɔ́nu Kalɛ Na Unwoti Uukeye

1-3Ami ndi Esekiel, Busi ubidi, na ndi ɔkpane.

Uwi ɔni na béƒie Ɔga Yekonia bátɔlɔku bésienku Babilon aani bana ɔtɔntɛne kalɛ úbunku abu bakladi, ɔbla akwa alɔ kama ni, lɛ́kya kesii kadi na kede ketu kani baalɔ banii Keba. Na ami ku bani na béti bátɔlɔku mmɔ nkya mmɔ. Amu na kɔbuli kunedi limeyi lɛlɔndi lɛlɔ na lɛkwa leevu-lɛtɛdi kemmo ni, kayaa kálɛmi kɔnakunwi. Na Unwoti úti nwuna enu ɔ́sia-mi lɛlɔ na údie kɔyu kemmo ala adi ɔ́tina-mi.

4Amu na lɛ́nu ka ɔƒɛƒɛɛ kpakplaa ɔdi úse kalɔ úkpo kpakplaa ɔ́si katɔ kakɛ ɔdubo. Na kayaa kaabwɛ ogya taasi liƒlukutu bonwu lɛdi kemmo na kayaa kana ƒui keekeye na ɔɔtu anumi. Na liƒlukutu lɛmmɔ ntɛ kesii kani na ogya ɔmɛni ɔɔbwɛ taasi ni, use aani lɛbuala lɛni na békuo-ni suɛlɛ suɛlɛ na uukeye geen. 5Na ntɛ mmɔ na lɛ́nu aani si bebuo ine badi ku ngba ku ngba benye. Na bana bɔnu bɔɔtina lɛnɔ aani bekyuli 6si ɔɔɔdi ɔni na bana ƒui ɔdi biala ubo anumi akpa ene ku avwi ene ɔsu. 7Bana lɛgba líne na línye ligeen, nsu bana kɔnitɔ kuse aani ɔmantɛ bakɔ lɛgbanvuo na liikeye aani abuala egyiedi. 8Na bana avwi amɛni ɔdi biala kemmo ni, bebo anumi aani bekyuli anumi kalɛ. 9Bebweyi ine bamɛni bénwini kama bákya lɛlɔ na bana avwi eli eetúku lɛlɔ. Na bana ƒui beesié taamana lɛƒɛnyi ƒui lɛlɔ, nsu alanu ka beenwíni lɛlɔ lɛnɔ.

10Kebweyi biala kebo ukyuli ɔyawine anumi na lɛtɔtɔ, na ubo gyata anumi na kɔdianu kakɛ, na ubo akɔ anumi na kɔmiinu, na ubo kɔdigbo aasɛ anumi na kama. 11Na ɔdi biala úbimi nwuna avwi anyɔ úwi na eetúku bakladi adi. Na ɔ́ƒɛ anyɔ akladi ɔ́mana lɛlɔ.

12Na kesii biala na bebweyi bamɛni bésela ni, beesié taasala na belenwini bana lɛlɔ, ɔsika ɔdi biala ɔɔnu nwuna anumi ligeen. 13Bebweyi bamɛni baatina liwulu ogya ɔdi aani ogya agyabi. Na lɛla lɛdi lɛkya-ma ntɛ na lɛɛda teesie taasɔ aani ukpo. Na uwi biala na ukpo ɔmɛni údie ogya unyemi ni, na lɛla lɛdi lɛbwɛ ogya aani kalɛ na kayaa kaabwɛ ogya. 14Na bebweyi bamɛni alati busie bɔɔbabla aani kalɛ na lɛgyakpabi liitulo taalɛ ogya kemmo.

15Mmɔ na lɛ́nu lɛ́ti ka na bebweyi bamɛni ɔdi biala lɛgba kalɔ na kɔmadɔ ni, lɛla lɛdi lɛtɛ aani kɛɛkɛ libi. 16Na use aani liseebi lɛni náƒɔ kuye geen na libo evete awɔdi bukeye na baalɔ-ni Krisolit. Na kɛɛkɛ ebi amɛni bubomo ku udu bɔdi unwi na kɛɛkɛ libi libliidi bamba lɛdi lɛnɔ lɛkya ɔdi biala ntɛ. 17Anwuɔsu baakana na besie kesii biala ɔni na belénwini lɛlɔ. 18Abuala ani nkya ebi amɛni ntɛ na ana lɛlɔ na ebi ammɔ ada ni, ébomo na ebo anumi kemmo ku kama. 19-21Bebweyi bamɛni ndanku ebi amɛni si bakɛ. Na si uwi ɔni na bebweyi bamɛni bédi bénye ni, na ebi ammɔ lɛnɔ édi énye. Na si ina buveyi na bada ni, ebi amɛni lɛnɔ akɛnku-ma na kayaa mmɔ.

22-23Na bebweyi bamɛni eli ni, lɛ́nu ka lɛla lɛdi libi aani ligegu na nwuna kemmo keekeye aani ntu bɔni nába búnwini atabi. Na bebweyi bamɛni bénene bana avwi anyɔ anyɔ bákywɛ lɛlɔ na lɛƒɛnyi ƒui lɛlɔ asa na ɔdi biala avwi anyɔ akladi ebi-nwu ɔlɔna lɛlɔ. 24Si uwi ɔni na bebweyi bamɛni beeveyi ni, bana avwi aabla kɔku bonwu aani kalɛ na ɛpu ɔɔbla kɔku iye aani bekpone lisu bonwu lɛdi iye aani Unwoti Ɔyikune Ƒui muudie lɛdi. Na si uwi ɔni na bédi bénye na báda buveyi báya ni, na baƒɛ bana avwi bébi bana ɔlɔna lɛlɔ.

25Na uwi ɔni na basɔ belebo bana avwi ni, línu kɔku kɔdi lɛ́siku lɛla lɛni mbi-ma eli aani ligegu mmɔ katɔ. 26Na ɔmmɔ kama lɛ́nu lɛla lɛdi aani lɛgaboku lɛni nse aani liseebi buni lɛni náƒɔ kuye na liikeye aani ɛpu ntu na baalɔ-ni Saƒira, na lɛ́nu aani si ukyuli na ɔdi nli-ni lɛlɔ. 27Na ɔ́si ukyuli ɔmmɔ kavobi úti ɔ́kɔ úsie-nwu lili kakɛ keekeye aani lɛbuala lɛni na bákya ogya lɛyu kemmo na lígyie muaa. Na ɔ́si kavobi mmɔ ɔ́yu ubo nwuna lɛgba kakɛ ni, ɔɔda aani ogya unyemi. Na ogya bukeye bonwu bɔ́ka bɔ́mana ukyuli umodi ɔmmɔ ƒui 28na uudie kunweni lidu lidu aani kalɛ na kɔdigye kɔɔlɛ́ na ɔƒɛƒɛɛ ɔdi bukpo kama.

Na lɛ́nu lɛ́ti ka Unwoti bukeye ɔsu na mɔɔnu mmɔ nwaa ƒui lɛni! Ɔmmɔ ɔsu líboku lɛlɔ kalɔ buɛɛ lɛ́yu líbi anumi kalɔ. Na kɔnakunwi ni, línu ka lɛdi lɛdi lɛɛtɛmiku-mi.

Currently Selected:

Esekiel 1: lef

Highlight

Copy

Compare