Esekiel 2

Unwoti Ɔ́ƒuna Esekiel

1Na lɛdi lɛmmɔ lɛ́kpali-mi lɛnini, “Esekiel, ɔyawine ubi, ta nye na ese atu na enu.” 2Ka ɔ́su lɛni ɔ́wɔlɔ ni, nwuna Kɔyu kɔ́ƒɔ-mi lɛlɔ kemmo na kɔ́tala-mi kúnyene mina lɛgba lɛlɔ na línu ka kɔɔtɛmiku-mi.

3Na ɔ́su-mi ɔnini, “Esekiel, mɔɔtala-a na Israelƒuɔ kadi bekyuli kudɔ. Kadi batuɔkplune bani na ama ku bana bati kuuku bani náta bénye-mi lɛlɔ na béni banii belénwini kayi úbedu ku ɔmwi kadi kamɛni lɛlɔ. 4Bebo atuɔkplu na kayi kebo-ma ɔkplu. Nsu ami Unwoti Katɔti lɛ́ƒuna-a ka esie atásu-ma lɛla lɛni na masu-ɔ. 5Na si batuɔkplune bammɔ bénu iye bétenu ni, badubɔnu bati ka kenye udiene ɔdi úbo úbatɛmi úte-ma. 6Tayia-ma iye lɛla lɛni na badubo-ɔ bɔsu. Ɔdubo-ɔ bɔbla aani si lɛnyɛ livongu kemmo na báyula-a bákya iye batamlukpa akɔ na atɛ. Nsu se kayi ina ka batuɔkplune na badi. 7Ɔdi ka asu-ma mina kenye si ina baayɔ́ ka benu iye balayɔ ɔsika batuɔkplune na badi. 8Nsu awɔ ɔyawine ubi ni, tata tenye-mi lɛlɔ aani batuɔkplune bɔmmɔ kalɛ. Mmomu nu-mi litemi biala na masu-ɔ. Na ɔƒaani ni, Esekiel, bimi kenye na aƒɔ lɛla lɛni na mete-ɔ mɛni ákun.”

9Mmɔ mmɔ ni, lɛ́nu ka kɔnu kɔdi kúnene kɔ́kywɛ-mi anumi na ɔda ebuo ɔku kakunkɛ kadi. 10Kɔnu kɔmmɔ kúbimi kakunkɛ kammɔ na kana kemmo ku kama ƒui kadanku kɔnyana ku buwulo ku kayi bɔkpulu etemila sɔɔn.

Currently Selected:

Esekiel 2: lef

Highlight

Copy

Compare