Israelƒuɔ Bɔlɛ 6
6
1Amu na Unwoti ɔ́su Mose ɔnini, “Ɔƒɛni na adubo bɔnu lɛla lɛni na ndubo Ƒarao bɔbla. Ɔkɛnku mina ɔyikun kabla lɛlɔ ɔsu ni, ɔdubo Israelƒuɔ ulu budie. Na bɔbɔku na ɔdubo-ma bɔbɔku bɔlɛku nwuna kalɔ lɛlɔ.”
2Amu na Katɔti ɔ́sɔ ɔ́su Mose ɔnini, “Ami ndi Unwoti. 3Na lídie lɛlɔ lɛ́tina Abraham ku Isak ku Yakob ka ami ndi Katɔti Ɔyikune Ƒui. Na Unwoti lɛnyi lɛni na mɔɔdi ni, ńtedie-ni keyi ńtatina-ma tɔ? 4Na bunyimi bɔni na línyimiku-ma ka meti Kanaan kalɔ kesii kani na bélie dii aani baƒɔ mete-ma ni, lɛ́lɛ-mu ugyii. 5Na ɔƒɛni ni, línu Israelƒuɔ budumo na kalɛ na Egyipteƒuɔ baabla-ma kalala ɔsu. Na ɔmɛni ɔ́ya na línyimo mina bunyimi bɔni línyimi ku bina bati kuuku.
6“Anwuɔsu sie na atásu Israelƒuɔ anini, ‘Ami ndi Unwoti, na ndubo-mii budie bɔsiku lɛbibo ugyigba ɔni na Egyipteƒuɔ bétile-mii kalɔ. Na lɛya na bɛkɛ bɔnwuna na bɛsɔ bilabla-ma kabla lɛnɔ. Na ndubudie mina kɔnu na lɛbla ɔyikun ala ebendi na bana akɔ liti lɛtɛku-ma litemi. 7Na ndubuti-mii lɛbla aani ami ɔlati mina bekyuli geen na lɛbla bina Katɔti. Na ɔmɛni ɔdubɔya na bɛnu bɛti ka ami Unwoti bina Katɔti nédie-mii lɛ́lɛku lɛbibo kalɔ na Egyipte. 8Na ndubuti-mii lisienku kalɔ kani na lɛ́kɔliku mina kɔnu katɔ líse kenye ka meti mete Abraham ku Isak ku Yakob. Na ndubuti-ka lite-mii na biti-ka bɛbla bina kadikɔ. Ami ndi Unwoti.’ ”
9Na ka Mose úsie útásu Israelƒuɔ etemila amɛni ni, bátakpete-nwu. Ɔsika enu áƒɛ-ma na abi ani na beebó mmɔ ɔsu.
10Amu na Unwoti ɔ́su Mose ɔnini, 11“Sie na atásu Egyipteƒuɔ Ɔga Ƒarao na udie Israelƒuɔ ulu na balɛ nwuna kalɔ kemmo.”
12Nsu Mose ɔ́su Unwoti ɔnii, “Ka lísie Israelƒuɔ kudɔ na bátakpete-mi ni, Ƒarao ndubo ami ɔni mɔɔwalɛ mɛni bɔkpete?”
Mose Ku Aaron Bati Kuuku Anyi
13Amu na Unwoti ɔ́tɛmiku Mose ku Aaron ɔ́siku Israelƒuɔ ku Egyipteƒuɔ Ɔga Ƒarao lɛlɔ, na úbo-ma ɔda ɔnii, batákpanku Israelƒuɔ balɛku Egyipte kalɔ lɛlɔ.
14Na bana atɔƒi benengu anyi ndi ani ndubo mɛni.
Israel ubidi udeedi ɔni ndi Ruben bebi ndi Hanok ku Palu ku Hesron ku Karmi. Na ama ndi Ruben ɔtɔ bekyuli bammɔ.
15Na Simeon bebi ndi Yemuel ku Yamin ku Ohad ku Yakin ku Sohar ku Saul ɔni ndi Kanaanni uleku ɔdi ubidi. Na ama lɛnɔ ndi Simeon ɔtɔ bekyuli bammɔ.
16Na bamɛni ndi Lewi bebi anyi na kalɛ na bénweni-ma anyi bése kenye. Gerson ku Kahat ku Merari. Na Lewi úlie ngba akwa eti anyɔ ku avlaatɛ maatɛ (137).
17Na Gerson lɛnɔ bebi na adua ammɔ kenye ndi Libni ku Simei.
18Na Kahat bebi ndi Amram ku Isehar ku Hebron ku Usiel. Na Kahat úlie ngba akwa eti anyɔ ku avlaatɛ-ɛtɛ (133).
19Na Merari bebi ndi Mahli ku Musi.
Na Lewi adua anyi aani kalɛ na bénweni bése na adi mmɔ.
20Amram úti ɔti ɔnwani ulekubi ɔni baalɔ Yokebed na ɔ́wɔ Aaron ku Mose úte-nwu. Na Amram úlie ngba akwa eti anyɔ ku avlaatɛ-maatɛ (137).
21Na Isehar bebi ndi Kora ku Naƒeg ku Sikri.
22Na Usiel bebi ndi Misael ku Elsaƒan ku Sitri.
23Na Aaron úti Aminadab ubidi ulekubi ɔni baalɔ banii Elisaba ɔni ndi Nahson ɔnwani, na báwɔ Nadab ku Abihu ku Eleasar ku Itamar.
24Na Kora bebi ndi Asir ku Elkana ku Abiasaƒ. Na bamɛni ndi Kora adua ammɔ.
25Na Aaron ubidi Eleasar úti Putiel bebi belekubi bammɔ akɔ ɔdi. Na ɔ́wɔ Pinehas úte-nwu.
Na bammɔ ndi Lewi atɔƒi ammɔ bati na adua ammɔ kenye.
26Na Aaron ku Mose ndi bekyuli bani na Unwoti ɔ́su ɔnini, “Bisie na bitédie Israelƒuɔ bɛlɛku Egyipte kalɔ lɛlɔ na adua ammɔ kenye.” 27Ama kani nátɛmiku Egyipteƒuɔ Ɔga Ƒarao ɔ́siku Israelƒuɔ bɔkpanku bɔlɛku Egyipte kalɔ lɛlɔ.
Aaron Ɔ́tɛmi Na Mose Kenye
28Ɔƒɛni uwi ɔni na Unwoti ɔ́tɛmiku Mose na Egyipte ni, 29ɔ́su-nwu ɔnini, “Ami ndi Unwoti, anwuɔsu su Egyipteƒuɔ Ɔga Ƒarao lɛla biala na lɛ́su-ɔ.”
30Nsu Mose udie kenye ɔ́su Unwoti ɔnini, “Kalɛ na mɔɔtɛmi taawalɛ mɛni ni, dɛ na Ƒarao ɔdubo-mi kalɔ bunu?”
Currently Selected:
Israelƒuɔ Bɔlɛ 6: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
