Israelƒuɔ Bɔlɛ 7

1Amu na Unwoti ɔ́su Mose ɔnini, “Nu, lɛ́bla-a aani Katɔti líte Ɔga Ƒarao. Na lɛ́bla ƒula ɔnwani Aaron aani ƒula kenye udiene. 2Na ɔlɛka asu-ma lɛla biala na líbo-ɔ ɔda nnii su-ma. Na ɔlɛka ƒ'ɔnwani Aaron lɛnɔ ɔsu Ɔga Ƒarao na udie Israelƒuɔ ulu na balɛ nwuna kalɔ kemmo. 3Nsu ndubɔya na Ƒarao kayi kayu ɔkplu, na ina bi akɔla ala budie taatina ku ala ebendi na lídie lɛ́tina-nwu kɔlɛ kɔlɛ na Egyipte kalɔ lɛlɔ ni, 4ɔɔɔdubo-ɔ litemi bunu. Mmɔ na ndubɔda Egyipteƒuɔ ƒui kpakplaa, na lɛbla ala enengudi na liti lɛtɛku-ma litemi. Na ɔmmɔ lɛlɔ na ndubɔsia na lidie mina kadi bekyuli Israelƒuɔ ati ati na bana bule bɔmmɔ kenye lɛlɛku Egyipte kalɔ lɛlɔ. 5Na mmɔ na Egyipteƒuɔ badubɔnu bati ka ami ndi Unwoti si uwi ɔni na lídie mina kɔnu lɛ́bla ɔyikun ala na bana akɔ, na lídie Israelƒuɔ lɛ́lɛku kalɔ kammɔ lɛlɔ.”

6Na Mose ku Aaron bábla básiaku Unwoti lɛla lɛni na úbo-ma ɔda lɛlɔ pɛpɛɛpɛ. 7Na uwi ɔni na Mose ku Aaron bétemi béte Ƒarao ni, na Mose ɔ́ɔƒɔ akwa liti ku avlaatɛ. Na Aaron lɛnɔ ɔ́ɔƒɔ akwa liti ku avlaatɛ-ɛtɛ.

Aaron Ugyii Ɔdadi Únwini Kɔlakpi

8Amu na Unwoti ɔ́su Mose ku Aaron ɔnini, 9“Si Ƒarao ɔ́su-mii ɔnini, ‘Bɛbla akɔla budie taatina bɔdi’ ni, na asu Aaron na uti nwuna ugyii ɔdadi mmɔ ɔva Ƒarao anumi. Na ugyii ɔmmɔ ɔdubunwini kɔlakpi.”

10Anwuɔsu Mose ku Aaron bésie Ƒarao kudɔ na bábla kalɛ kani na Katɔti úbo-ma ɔda. Na Aaron ɔ́da ugyii ɔmmɔ ɔ́va kalɔ na Ƒarao ku nwuna benengu anumi. Na ugyii ɔmmɔ únwini kɔlakpi kɔnakunwi. 11Mmɔ na Ƒarao lɛnɔ ɔ́lɔ nwuna banundane ku bani muubó like ku bani mɔɔbla akɔla lidu budie taatina na bébo. Na ama lɛnɔ bábla lɛni kani. 12Na ama lɛnɔ báda bana ligyii lɛni na bada báva kalɔ na ligyii lɛmmɔ línwini balakpi. Nsu Aaron ugyii ɔni nénwini kɔlakpi mmɔ úbweli bana balakpi bammɔ ƒui. 13Nsu ɔmɛni kama ƒui Ƒarao kɔtu kɔ́mu kɔ́yu ɔkplu na ulenu Mose ku Aaron litemi aani kalɛ kani na Unwoti ɔ́su Mose ku Aaron úse.

Ubugya Ɔgbankpi Úbo Egyipte Kalɔ Lɛlɔ

14Amu na Unwoti ɔ́su Mose ɔnini, “Ƒarao ubo atuɔkplu na ulenu kalɔ na bekyuli bammɔ batɔlɔ. 15Ɔmɛni ɔsu, sie na atásiaku Ƒarao ɔtanta uwi ɔni na ɔ́ta úsela Nil Ketu kemmo. Na si ésela ni, na eti ƒula ugyii ɔdadi ɔni nénwini kɔlakpi mmɔ ada. Na enye agya Ƒarao na ketudɔ mmɔ. 16Na si úbo ni, na asu-nwu anini, ‘Unwoti ɔni Ndi Hebriƒuɔ Katɔti ɔ́tala-mi ɔ́kya-a ɔnii, “Ya mina bekyuli beteesie ketele kemmo na batákpa-mi na mmɔ.” Nsu úti úbedu ɔƒɛni ni, elenu kalɔ. 17Anwuɔsu Unwoti ɔnini, “Ɔkɛnku ɔmɛni lɛlɔ ɔsu ni, adubo bɔnu bɔti ka Ami ndi Unwoti sɔsɔ.” Na ugyii ɔni nkya-mii kɔnu mɛni, ndubuti bɔƒiɛmi Nil Ketu ntu bɔmɛni anumi na ketu kammɔ kenwini ubugya. 18Kɔkpaku kɔni ƒui nkya ntu bɔmmɔ kemmo kɔdubukpi. Na ntu bɔmmɔ bɔdubo buteenwenyi ɔni na Egyipteƒuɔ balakana ketu kammɔ ntu bɔni.’ ”

19Amu na Unwoti ɔ́su Mose ɔnini, “Su Aaron na uti ugyii ɔdadi ɔmmɔ na unene ɔtina etukpa ku abiɔ ku lɛba lɛni ƒui nkya Egyipte kalɔ lɛlɔ. Na ntu bɔmmɔ ƒui bɔdubunwini ubugya. Na ndubɔya na ubugya ɔ́ƒɔ kesii biala. Na ntu bɔni buwi ebui ku atabi kutubui kemmo muedi bɔdubunwini ubugya.”

20Mose ku Aaron bábla kalɛ na Unwoti ɔ́su-ma pɛpɛɛpɛ. Mose únene nwuna ugyii ɔdadi ɔmmɔ, na úti ɔ́ƒiɛmi Nil ntu anumi na Ƒarao ku nwuna benengu anumi. Na ntu bɔmmɔ búnwini ubugya. 21Na kɔkpaku kɔni ƒui nkya Nil ntu kemmo kúkpi. Na ɔmɛni ɔ́ya ntu bɔmmɔ buunwenyi kpatii ɔni na Egyipteƒuɔ balakana ntu bɔmmɔ bɔni. Na ubugya ɔ́ƒɔ Egyipte kalɔ kammɔ lɛlɔ ƒui.

22Amu na Ƒarao akɔla ala bediene lɛnɔ bábla lɛni kani ɔkɛnku bana lɛkwɛ likpidi akɔla ala budie taatina lɛlɔ. Na Ƒarao úsie anumi ɔɔyu kayi ɔkplu teebu aani kalɛ na Unwoti ɔ́su na ulenu-ma litemi. 23Mmomu bunwini na Ƒarao únwini úsie nwuna kaduli ɔni na útakpete ala ani nálɛ na ketu kenye mmɔ. 24Na ɔmɛni ɔ́ya na Egyipteƒuɔ béku abiɔ béyile Nil amadɔ, ɔsika Nil ntu bɔmmɔ buládia-ma bɔni.

Bapɔtɔlɔ Báƒɔ Egyipte Kalɔ Lɛlɔ

25Emeyi maatɛ ávi ɔ́si uwi ɔni na Unwoti úti ugyii ɔ́ƒiɛmi Nil ntu bɔmmɔ anumi.

Currently Selected:

Israelƒuɔ Bɔlɛ 7: lef

Highlight

Copy

Compare