Israelƒuɔ Bɔlɛ 40
40
Bátu Unwoti Adi Kevo Kammɔ Báwɔlɔ
1Amu na Unwoti ɔ́su Mose ɔnini, 2“Lɛ Adi Kevo kani ndi Kevo Kasakɔ kammɔ na kɔbuli kudeedi kuna limeyi lideedi lɛlɔ. 3Na eti Bunyimi Adaka ɔmmɔ alɛ-nwu kemmo na eti kakpakɔ bule kɔdi kɔni mɔɔbala adaka ɔmmɔ anumi aƒala. 4Na alɛ ala kasiakɔ kammɔ na eti ala ani na ɔlɛka beti basia-nwu lɛlɔ asia. Na eti asogya kasiakɔ ugyii ɔmmɔ alɛ na eti lɛsogya lɛmmɔ ƒui asia-nwu lɛlɔ. 5Na eti oloƒui bɔkyula sika ugyiedi lɛbi lɛmmɔ alɛ Bunyimi Adaka ɔmmɔ anumi na eti kɔdi aƒala kevo kammɔ kayakun.
6“Na eti lɛkpabi lɛni lɛlɔ badubo butaakyula akpala alɛ Unwoti Adi Kevo kani ndi Kevo Kasakɔ ɔmmɔ kayakun. 7Na eti lɛkyami lɛni kemmo badubo enu butaaƒɔ alɛ ɔtɔ ɔmmɔ ku lɛkpabi lɛmmɔ ntɛ na edu ntu eyile-nwu kemmo. 8Na alɛ kevo kaduli kammɔ ɔban eku amana na eti kayakun kɔdi aƒala kayakun kammɔ.
9“Si áwɔlɔ ala ammɔ ƒui bɔbla ni, na eti nnɔmii kedee na akuna ewi kevo kammɔ ku ala ani ƒui nkya-ka kemmo na abla-nya sɛsɛɛ na adubuse kedee. 10Na akuna nnɔmii bɔmmɔ bɔdi ewi lɛkpabi lɛni lɛlɔ badubo akpala butaabla lɛlɔ ku akyami ani ndubuse mmɔ ƒui lɛlɔ na ala ammɔ ƒui adubo bɔbla kedee ƒui. 11Na akuna nnɔmii bɔmmɔ bɔdi ewi lɛkyami lɛni kemmo badubo enu butaaƒɔ ku nwuna ɔka ɔmmɔ na abla-nwu sɛsɛɛ.
12“Na akpanku Aaron ku nwuna bebi bananabi eboku kevo kammɔ kenye na akpila-ma ntu. 13Na ɔmmɔ kama na eti ɔkpane awu kedee ɔmmɔ akya Aaron na awɛɛ-nwu nnɔmii kedee bɔmmɔ ese-nwu likpo. Kalɛ wakana na wabla ɔkpane wete-mi. 14Na akpanku Aaron bebi lɛnɔ eboku na akya-ma bana lɛwu lɛmmɔ. 15Na awɛɛ-ma nnɔmii ese-ma likpo aani kalɛ kani na áwɛɛ bana ɔti kalɛ ama lɛnɔ babla bakpane bete-mi. Na likpose nnɔmii bɔwɛɛ bɔmɛni bɔdubo bɔbla lɛla lɛni ndubo buse bute bakpane ƒui usela uwi ƒui.” 16Na Mose ɔ́bla ɔsiaku kalɛ kani na Unwoti úbo-nwu ɔda.
17Anwuɔsu bálɛ kevo kammɔ na lɛkwa linyɔdi kɔbuli kudeedi limeyi lideedi lɛlɔ ka bálɛ Egyipte kalɔ lɛlɔ. 18Na kevo kammɔ bɔlɛ kemmo ni, Mose ɔ́ya na bése aka ammɔ ƒui na bálɛ lɛban eku ammɔ ku akpa ammɔ ku lɛtagyii lɛmmɔ ƒui. 19Na ɔ́ya na báni kevo kɔdi kɔmmɔ bébi-nwu lili na ɔ́ya na béti kɔdi kɔtɔdi bébi kɔmmɔ katɔ aani kalɛ kani na Unwoti úbo-nwu ɔda.
20Na uti atabi anyɔ ani na ɔda bubo etemila ásia-nwu lɛlɔ mmɔ ɔ́kya Bunyimi Adaka ɔmmɔ kemmo. Na úti ligyii ɔ́kya eƒi ammɔ kemmo ɔ́danku adaka ɔmmɔ atu. Na úti likpidi kɔtu bɔni budie libila úbi adaka ɔmmɔ katɔ. 21Amu na ɔ́ya na béti adaka ɔmmɔ bése Adi Kevo kammɔ kemmo na béti kakpakɔ bule kɔdi báƒala. Na ɔ́bɛla Bunyimi Adaka ɔmmɔ aani kalɛ na Unwoti úbo-nwu ɔda.
22Amu na ɔ́ya na béti ala kasiakɔ kammɔ béduoku ɔtɔ kemmo bétése kasakɔ kevo kani ndi Unwoti Adi Kevo mmɔ kemmo na katɔ kakɛ na kakpakɔ bule kɔdi kɔmmɔ anumi kakɛ. 23Na ɔ́tɛ Unwoti Bodobodo ɔmmɔ ɔ́sia-nwu lɛlɔ aani kalɛ na Unwoti úbo-nwu ɔda.
24Na úti lɛsogya kasiakɔ ugyii ɔmmɔ lɛnɔ ɔ́lɛ ɔtɔ ɔmmɔ kemmo na kada kakɛ kesii kani na ala kasiakɔ kammɔ kalɛ. 25Na ɔ́tu lɛsogya lɛmmɔ ɔ́sia nina kalɛkɔ mmɔ na Unwoti anumi aani kalɛ na Unwoti úbo-nwu ɔda.
26Na úti sika ugyiedi lɛkpabi lɛmmɔ lɛnɔ ɔ́lɛ ɔtɔ ɔmmɔ kemmo na kesii kani kakpakɔ bule kɔdi kɔmmɔ kɔ́ƒa anumi kakɛ. 27Na ɔ́kyula oloƒui ƒɛƒɛɛ aani kalɛ kani na Unwoti úbo-nwu ɔda. 28Na úti kɔdi ɔ́ƒala kevo kammɔ kayakun.
29Na úti bɔkyula lɛkpabi ɔ́lɛ úde Unwoti Adi Kevo kani ndi Kevo Kasakɔ mmɔ kayakun na ɔ́kyula akpala na béti edula etela lɛnɔ béboku Unwoti na mmɔ aani kalɛ kani na Unwoti úbo-nwu ɔda.
30Na úti lɛkyami lɛni kemmo badubo enu butaaƒɔ mmɔ ɔ́lɛ Kevo Kasakɔ ku lɛkpabi lɛmmɔ ntɛ na ɔ́ya na bédu ntu béwi-ni kemmo kalɛ na bataaƒɔ enu. 31Na lɛkyami lɛmmɔ kemmo na Mose ku Aaron ku Aaron bebi baaƒɔ enu ku lɛgba. 32Na uwi biala na badubuduo Kevo Kasakɔ mmɔ ku si báni beedé lɛkpabi lɛmmɔ ni, baaƒɔ bana enu ku lɛgba aani kalɛ na Unwoti úbo Mose ɔda.
33Amu na Mose ɔ́ya na béti ɔban eku ammɔ na bálɛ bámana bákya kaduli béte kevo ku lɛkpabi lɛmmɔ na béti kayakun kɔdi báƒala kaduli kammɔ kayakun. Anwuɔsu Mose ɔ́wɔlɔ kabla kammɔ.
Unwoti Bukeye Búwi Nwuna Adi Kevo
34Amu na liƒlukutu lɛdi líbebi Kevo Kasakɔ kammɔ lɛlɔ na Unwoti bukeye bɔ́ƒɔ ɔtɔ ɔmmɔ kemmo ƒui. 35Liƒlukutu lɛni mbi ɔtɔ ɔmmɔ lɛlɔ ku kalɛ na Unwoti bukeye bɔ́ƒɔ ɔtɔ ɔmmɔ kemmo ɔsu ni, Mose útakana na uduo ɔtɔ ɔmmɔ kemmo.
36Na Israelƒuɔ ulu buse biala kemmo ni, si bánya bánu ka liƒlukutu lɛmmɔ lɛ́ta Adi Kevo kammɔ eli ni, na ɔlɛka ama lɛnɔ basiaku-nwu. 37Nsu si liƒlukutu lɛmmɔ lítata tɔ ni, ama lɛnɔ balata tɔ wetédu limeyi lɛni na liƒlukutu lɛmmɔ lɛ́ta.
38Anwuɔsu na Israelƒuɔ ulu busie kemmo ƒui ni, Unwoti liƒlukutu lɛmmɔ liibi Adi Kevo kammɔ lɛlɔ na kadi nwaa. Na usien lɛnɔ liinwíni aani lɛgyavonku lɛkpa taatɔnku-ma.
Currently Selected:
Israelƒuɔ Bɔlɛ 40: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
