Israelƒuɔ Bɔlɛ 39

Báka Bakpane Lɛwu

1Amu na béti linwo buluu ku ligyiedi lɛni náƒɔ kuye geen na bédi lɛwu lɛni mɔɔdia bɔnu béte bakpane bani ndubo kabla butaabla na Unwoti Adi Kevo kedee kammɔ kemmo. Na bédi ɔkpane awu sɛsɛɛ béte Aaron aani kalɛ na Unwoti úbo Mose ɔda.

2Na béti linwo buluu ku ligyiedi lɛni náƒɔ kuye geen bédi bakpane awu kpɛtɛ kpɛtɛ kedee ɔni mɔɔdia bɔnu geen na béti sika ugyiedi bákya-nwu bɔdia. 3Sika ugyiedi na bétu bábla aani kɔbuli gyɛlɛɛ na bélii-nwu básala ku linwo buluu ku ligyiedi na bedine babuni geen bédi-nwu kaduɛ ku adi kpɛtɛ kpɛtɛ. 4Na béti kadii bada-nwu atu anyɔ ammɔ na ɔdia beteebo taada lɛlɔ. 5Na bédi kavobi lɛduni na lɛ́lɛ kadii kammɔ ku linwo buluu ku ligyiedi lɛni náƒɔ kuye ku kɔdi kpɛtɛ kpɛtɛ. Na bákya-nwu bɔdia ku sika ugyiedi báda awu ɔmmɔ lɛlɔ na ɔ́bla unwi aani kalɛ Unwoti úbo Mose ɔda.

6Béti atabi anyɔ ani náƒɔ kuye na baalɔ-nya oniks na bénweni Israel bebi anyi básia-nya lɛlɔ. 7Na báka-nwu bámana awu kedee ɔmmɔ amangba lɛlɔ aani likposela úte Israelƒuɔ aani kalɛ na Unwoti úbo Mose ɔda.

Kayi Lɛbalala Lɛdiku

8Na kayi lɛbalala lɛdiku lɛmmɔ ni, bedine babuni geen nédi-ni aani awu kedee ɔmmɔ kalɛ. Na bédi-nwu ku linwo buluu ku ligyiedi lɛni náƒɔ kuye geen ku adi kpɛtɛ kpɛtɛ. 9Na kɔdi kɔmmɔ ni, báƒɛ-ku kemmo inyɔ. Na nwuna bɔbɛbɛ ku bune ƒui bɔdi bɔkɔku bunwi aani lɛnimi ntɛ bukulo yaalenwi ɔƒɛnyi biala. 10Na béti atabi ani náƒɔ kuye báka lɛgala ine bámana-nwu lɛlɔ. Na ɔgaala udeedi atabi adi sardis ku topas ku beril. 11Na ɔgaala unyɔdi atabi adi torkis ku sapir ku smardo. 12Na ɔgaala ɔtɛdi atabi adi yiakint ku agate ku ametist. 13Na ɔgaala unedi atabi adi krisolit ku oniks ku yaspa. Na lɛni bámana atabi ammɔ na sika ugyiedi asɛɛ ebi eƒi kemmo. 14Na adi atabi leevu-inyɔ ani lɛlɔ na bénweni Yakob bebi leevu-inyɔ bammɔ anyi básia unwi unwi. Na adi ekposela úte Israelƒuɔ kaba leevu-inyɔ bammɔ.

15Na kayi lɛdiku lɛmmɔ lɛlɔ ni, béti sika ugyiedi bélii-nwu aani kɔbuli. 16Na béti sika ugyiedi na bédie asɛɛ ebi eƒi anyɔ na bábla kɔkwɛnimii inyɔ na béti bákya lɛdiku lɛmmɔ atu. 17Na béti sika ugyiedi kɔbuli inyɔ bákya kɔkwɛnimii kɔmmɔ kemmo na lɛdiku lɛmmɔ lɛlɔ. 18Na sika ugyiedi kɔbuli kɔmmɔ eli anyɔ akladi ni, béti-nya bébo báda awu kedee ɔmmɔ amangba na sika asɛɛ ebi eƒi anyɔ ammɔ kemmo na anumi kakɛ. 19Na básɔ bábla sika ugyiedi kɔkwɛnimii inyɔ bamba báda lɛdiku lɛmmɔ atu na kemmo kakɛ kesii kani nda awu kedee ɔmmɔ lɛlɔ. 20Na básɔ bábla sika ugyiedi kɔkwɛnimii inyɔ bamba báda kayi lɛdiku lɛmmɔ amangba kada kakɛ na kesii kani na kavobi lɛduni lɛmmɔ lɛdanku awu kpɛtɛ kpɛtɛ ɔmmɔ na kadii kani na bákya bɔdia mmɔ kudɔ mmɔ. 21Bébo unwo buluu kadii kammɔ báda lɛdiku lɛmmɔ kɔkwɛnimii bábala bádanku awu kedee ɔmmɔ kɔkwɛnimii lɛlɔ. Na kadii kammɔ kasia awu ɔmmɔ kavobi lɛduni lɛni bédi bákya-ni bɔdia mmɔ lɛlɔ kalɛ na ɔda lɛdiku lɛmmɔ use nwuna keliekɔ.

Báka Bakpane Bakladi Lɛwu

22Na awu gyɔlɔɔ ɔni lɛlɔ na bakpane awu kpɛtɛ kpɛtɛ kedee ɔmmɔ ɔɔsia ni, báka-nwu na ɔdi kɔdi buluu. 23Na bédie liƒi kesii kani na lili lɛɛví na kɔdi kɔmmɔ ntɛntɛ na bédie liƒi lɛmmɔ békpo atu kalɛ na uleyile bɔbwɛ. 24Na awu gyɔlɔɔ ɔmmɔ atu na lɛgba kada ni, béti unwo buluu ku ugyiedi ɔni náƒɔ kuye bédi egyiibi adi udu básia bámana. 25Na béti sika ugyiedi lɛdɔn wɛlɛ wɛlɛ báƒala-nwu ntɛ aani kalɛ kani na Unwoti úbo Mose ɔda.

26Na awu gyɔlɔɔ ɔni na baakya taabla lɛkpa mmɔ atu na lɛgba kada ni, béti unwo buluu ku ugyiedi ɔni náƒɔ kuye bédi egyiibi adi udu básia bámana na béti sika ugyiedi lɛdɔn wɛlɛ wɛlɛ báƒala-nwu ntɛ.

27Na bédi awu ɔtɔdi akɔnkɔ bune ku adi kpɛtɛ kpɛtɛ buni béte Aaron ku nwuna bebi bananabi. 28Na dukuu kɔbwa ku eli aduni bamba ƒui ku awu gyɔlɔɔ kalɔ lɛwuku lɛmmɔ ni, bédi-ni ku adi kpɛtɛ kpɛtɛ buni ƒui. 29Na kavobi lɛduni lɛmmɔ ni, béti unwo buluu ku ugyiedi ɔni náƒɔ kuye bédi-nwu na bávili-nwu atu kaduɛ aani kalɛ na Unwoti úbo Mose ɔda.

30Na béti sika ugyiedi na bábla kalɛkɛ blii kadi na bánwi-nwu kemmo na bénweni básia banii, Ɔmɛni Use Sɛsɛɛ Ute Unwoti. 31Na unwo buluu na bényimi bámana kabwa kammɔ anumi aani kalɛ kani na Unwoti úbo Mose ɔda.

Mose Úsie Útánu Kalɛ Bátu Unwoti Kevo Kammɔ

32Ɔmɛni ɔsu Israelƒuɔ báwɔlɔ Unwoti Adi Kevo kani ndi Kevo Kasakɔ kammɔ bɔtu. Na bátu-nwu pɛpɛɛpɛ aani kalɛ kani na Unwoti úbo Mose ɔda. 33Amu na béti Unwoti Adi Kevo kammɔ atula ammɔ ƒui bátátina Mose na ɔ́nu kalɛ bánwi kɔyakun ku ƒansili kugyikɛ ku lɛtagyii lɛmmɔ ku akpa ku ana kalɔ ɔka ɔmmɔ. 34Na ɔ́nu kalɛ békpeyi baƒonu lɛku na bákya-ni kuvo kugyiedi béte adaka ɔmmɔ bubi ku bebuo bamba lɛku na bábla kakpakɔ bule kɔdi béte adaka ɔmmɔ. 35Na ɔ́nu Bunyimi Adaka ɔmmɔ ku nwuna ligyii ku likpidi kɔtu bɔni budie libila lɛmmɔ. 36Na ɔ́nu ala kasiakɔ kammɔ ku nwuna lɛlɔ ala ku bodobodo ɔni muusé Unwoti anumi. 37Ɔ́nu sika ugyiedi asogya kasiakɔ ligyii ku lɛsogya lɛmmɔ otogyi ƒui ku nina lɛlɔ ala ku lɛsogya nnɔmii bɔmmɔ. 38Na ɔ́nu sika ugyiedi lɛkpabi lɛmmɔ ku likpose nnɔmii ku oloƒui ƒɛƒɛɛ ɔmmɔ ku kevo kammɔ kayakun aduni ammɔ. 39Ɔ́nu abuala egyiedi lɛkpabi ku abuala egyiedi ntɔ kaƒɔkɔ kammɔ ku ana ligyii ku kabla ablala ku ɔdi lɛlɔ bɔƒɔ lɛkyami bonwu ku nina ɔka. 40Ɔ́nu Unwoti Adi Kevo kammɔ kaduli aduni ku kana ligyii ku ɔka ɔni lɛlɔ na liinye ku kaduli kayakun lɛduni ku kana lɛbuli ku ewele ku Unwoti Adi Kevo kani ndi Kevo Kasakɔ kammɔ lɛlɔ ala ƒui. 41Na ɔ́nu Aaron lɛwu sɛsɛɛ lɛni bédi ku nwuna bebi lɛwu lɛni na badubo butaakya taabla bakpane kabla.

42Na Israelƒuɔ bábla kabla kammɔ pɛpɛɛpɛ kalɛ kani na Unwoti úbo Mose ɔda. 43Na ka Mose ɔ́sia ala ammɔ ƒui anu na ɔ́nu ka bábla-nya kalɛ kani na Unwoti úbo-nwu ɔda ni, úte Israelƒuɔ kusɛ kusɛ.

Currently Selected:

Israelƒuɔ Bɔlɛ 39: lef

Highlight

Copy

Compare