Eƒesoƒuɔ 6

Bilie Ngba Bɔni Námanku Bebi Ku Bawɔne

1Amii bebi bɛbu bina bawɔne na Kristo ulu lɛlɔ, ɔsika ɔmɛni ndi lɛla lɛbuni lɛni na ɔlɛka bɛbla. 2Na ɔda bubo bɔni mɔɔsu bɔnii, “Bu ƒ'ɔti ku ƒ'ini” ni, bɔdi budeedi bɔni ndanku linyese. 3Búsie anumi bɔnii, “Kalɛ na keyi kayɔku-ɔ na elie ngba gyɔlɔɔ na kalɔ lɛlɔ mɛni.”

4Na amii bawɔne lɛnɔ ni, bitabla ala ani makya bina bebi kɔnyi. Mmomu bɛtumini-ma na bɛlɛ-ma bɛsiaku bɔƒɔtaadi ulu lɛlɔ.

Kabla Bablane Belieku Bana Benwoti Kaduɛ

5Amii bani mɔɔbla ukyuli bamba kabla ni, biboku lɛlɔ kalɔ na binu bina benwoti litemi ku ɔbu ɔsiku kayi ƒui aani kalɛ na bɛdubunu Kristo litemi. 6Ka bɛdi Kristo kabla bablane ɔsu ni, biti bina ɔyikun ƒui bɛbla lɛla lɛni na Katɔti ɔɔwia. Na ɔɔɔdi bana anumi na ɔdi ka bɛbla lɛla lɛdi biti bɛtina bekyuli kalɛ na bemwi-mii. 7Bɛbla bina kabla kaduɛ aani si Katɔti na bɛɛbla bite na ɔɔɔdi bekyuli. 8Si ukyuli ɔdi ɔɔbla ukyuli bamba kabla iye ɔɔbla anwu ɔlati kabla ni, ɔlɛka ɔbla-ka kaduɛ. Ɔsika ɔdubɔƒɔ lɛyuƒɔla ɔsiku Blɔti kudɔ.

9Na amii benwoti lɛnɔ ni, bɛbla lɛni kani bite bekyuli bani mɔɔbla-mii kabla. Bitakya-ma liƒu, ɔsika bɛgyi ka amii ku-ma ƒui lɛnɔ bibo Unwoti unwi na katɔ ɔni naaanu bekyuli anumi taatɛ litemi.

Biti Kɔyu Kemmo Ekpola Bɛda

10Na kawɔlɔkɔ ni, bɛya na Katɔti ɔyikun ɔkya-mii ɔkplu. 11Biti Katɔti ala ani ƒui na úte-mii bɛkya aani ukpone adala ani mɔɔgyumana-nwu na bɛkana binye bitile ukisine ɔmmɔ kakwɛ kekpidi biala. 12Ɔsika ɔɔɔdi abu ku bekyuli muukpó. Mmomu abu ku bayikune ku kenyekɔ biala ku kayawi kamɛni lɛdisa ku kayaa bayikune bekpidi ƒui muukpó. 13Ɔmɛni ɔsu ni, bɛkya Katɔti adala ani mɔɔgyumana lɛlɔ mmɔ ƒui, kalɛ na bɛkana na binye kpakplaa na limeyi lɛni na likpidi lɛdi lɛdubɔsiaku-mii lɛlɔ. Na ɔmmɔ kama ni, binye kpakplaa uwi ƒui.

14Anwuɔsu binye kagyumana na biti Katɔti litemi geen binwini aani kabuli bɛda kavobi, na biti lɛlɔ bɔbla siin binwini aani lɛgyumanala bɛbala kayi. 15Na binye kagyumana na biti keyi buɛɛ litemi buni lɛmmɔ bɔsu binwini aani agbanvuo bɛkya lɛgba. 16Ɔmɛni kama ni, biti bina bɔƒɔtaadi bɛda kɔnu aani bina lɛgyumanala. Ɔsika amu ndubo-mii bɔgyumana si ukisine ɔmmɔ ɔɔtu nwuna ɔkɔ ala taalɛ-mii aani kɔtaminta kɔni mɔɔda ogya. 17Na biti bina ngba bɔƒɔ bibi lili aani kekpo kabwa na biti Katɔti litemi lɛni nse aani kewii kani na Katɔti Kɔyu kuute-mii bɛda kɔnu kɔkladi. 18Na Katɔti Kɔyu kɔkya-mii lɛlɔ kemmo na bitaakpali katɔ uwi biala teevele Katɔti kebunku aani kalɛ na Kɔyu kɔmmɔ kɔ́tina-mii. Ɔmɛni ɔsu ni, binye kagyumana na enu ataƒɛ-mii. Na bitaakpali katɔ teete Katɔti bekyuli ƒui lili.

19Bivele na ami lɛnɔ lili na Katɔti ɔya na kenye kada-mi kalɛ na makana menye kpakplaa na medie litemi lɛmmɔ abɛla matina bekyuli na ɔyikun kemmo. 20Na litemi lɛmmɔ ɔtalane na ndi, ina ka nkya kɔgba kemmo mɛni. Bivele na mina lili na lɛsu litemi lɛmmɔ kalɛ na ɔ́manku ku kayi buse!

Bɔɔkada-mii

21Na ɔƒɛni ni, kalɛ na ɔbla na bɛti kalɛ nkya mɛni ɔsu ni, Tihiko ɔni ndi bula ɔnwa ɔyɔne ku Blɔti kabla ɔblane ɔni mɔɔsia Blɔti kabla kammɔ anu kaduɛ ɔdubɔsu-mii ana ƒui. 22Ɔmɛni ɔsu na mɔɔtala-nwu na bina kudɔ na ubasu-mii kalɛ na bɔkya, na ɔkya-mii ɔkplu.

23Banwa, Unwoti Katɔti ku Blɔti Yesu Kristo ute-mii keyi buɛɛ ku bɔyɔ ku bɔƒɔtaadi. 24Katɔti lɛƒɔndia lɛsiaku bekyuli bani ƒui mɔɔyɔ́ Blɔti Yesu Kristo ku kayi ƒui.

Currently Selected:

Eƒesoƒuɔ 6: lef

Highlight

Copy

Compare