Ƒilipiƒuɔ 1

1Ami, Paulo ku Timoteo bani ndi Kristo Yesu kabla bablane ni, abu nénweni ɔku ɔmɛni.

Na búti buute amii Kristo Yesu badi ƒui ku baƒɔtaadine lɛkpa batɔnkune ku bebunkune bani ƒui nkya Ƒilipi.

2Na buuvele bɔnii lɛƒɔndia ku keyi buɛɛ kani nási Katɔti ɔni ndi bula Ɔti ku Blɔti Yesu Kristo kudɔ kasiaku-mii.

Paulo Ɔ́kpali Katɔ Úte Baƒɔtaadine Bani Nkya Ƒilipi

3Uwi biala na bina kasusu kébo-mi lili ni, mɔɔgyá Katɔti enu na bina lili. 4Na uwi biala na mɔɔkpali katɔ na bina lili ni, mɔɔkpali ku lɛlɔyɔ 5ɔ́si kalɛ na bíbunku-mi ɔ́si limeyi lideedi lɛni na líti litemi buni lɛmmɔ líboku-mii úbedu ɔƒɛni ɔsu. 6Na lɛ́ƒɔ lɛ́di ka Katɔti ɔni nése kabla kabuni kamɛni kalɔ na bina akɔ ni, ɔdubɔnu ka kabla kamɛni katáwɔlɔ na uwi ɔni na Kristo Yesu wasɔ webo.

7Bina ala akya-mi kayi kemmo geen uwi biala na ɔdi ulu lɛlɔ lɛnɔ ka use-mi lɛni. Ɔsika kuƒi kɔni na Katɔti úte-mi na ɔ́ya lɛ́kɛ nwuna litela ni, amii lɛnɔ bɛ́kɛ-nwu lɛlɔ kɔsia na uwi ɔni na ntɛ ɔtɔ mɛni ku uwi ɔni na mbo bɔnwuna ka likpo lite litemi lɛmmɔ na lidie-ni kenye lite bekyuli na baƒɔ-ni kpakplaa. 8Na Katɔti ɔlati nnye-mi kama ka litemi geen na mɔɔsu nnii bina ala akya-mi kayi kemmo geen aani kalɛ kani na Yesu Kristo ɔɔyɔ́-mii kalɛ.

9Muuvele Katɔti nnii ɔya na bina bɔyɔ bɔni na bibo butaakɔ katɔ teebu na bɛkɛ lɛlati lɛni na biti bɛnu ala kemmo kaduɛ, 10kalɛ na bidie lɛla lɛni ndia ntulo. Mmɔ na bɛdubudie lɛlɔ na ala ani muusé lɛlɔ ƒui kudɔ na baládu-mii kɔtɔ na uwi ɔni kemmo na Kristo wasɔ webo. 11Na bɛnwu ebi ani mɔɔtina ka bise siin na bina ngba bulie kemmo ka bɛ́ƒɔ Blɔti Yesu Kristo bɛ́di ɔsu, na biti ɔbu ku bumwi bite Katɔti.

Ukyuli Ɔni Mɔɔbla Yesu Kabla Mbo Ngba

12Banwa, mɔɔyɔ́ ka lɛ́su-mii ka ala ani nálɛku-mi ni, ébunku na litemi buni lɛmmɔ lísie anumi líbu. 13Ɔmɛni ɔsu ni, lɛla biala lɛ́bla nwaa na ɔ́ya na bekpone bani ƒui mɔɔgyumana aban ɔtɔ mmɔ ku bani ƒui nkya mɛni bánu báti ka ɔni ndi Kristo Yesu kabla ɔblane ɔsu na ntɛ ɔtɔ. 14Na mina ɔtɔ bɔtɛ bɔmɛni bɔ́ya na mina banwa pii na Blɔti kemmo básɔ bákɛ kayi buse bébu na bákana na básu Katɔti litemi lɛmmɔ, na bɔyia bɔdi bɔsɔ buuubo-ma kemmo.

15Na ɔdi sɔsɔ ka badi baasu Kristo litemi lɛmmɔ ɔsika beekpó kogyulo na baawia lɛnyi ɔsu. Nsu badi ama baasu-ni taasiku kasusu kabuni kemmo. 16Na bani mɔɔsu-ni ku kasusu kabuni mmɔ ni, baasu-ni ku bɔyɔ. Ɔsika bagyi ka Katɔti néti kabla kamɛni ɔ́kya-mi lɛkɔkɔ ka likpo na lɛgyumana litemi buni lɛmmɔ. 17Nsu badi balásu Kristo litemi lɛmmɔ taasiku bana kayi kemmo ƒui, mmomu ama alati bana lɛkɛ ɔsu. Na baakali ka baya na mina lɛbibo litaakɔ katɔ teebu ɔni na ntɛ aban ɔtɔ mɛni.

18Nsu ɔmɛni ƒui ɔɔɔda! Lɛla lɛni kani mɔɔda-mi kubiti ndi ka Kristo lɛlɔ litemi na baasu. Na si baasu-ni taasiku kasusu kabuni iye kekpidi kemmo ni, ami lɛlɔ lɛdubo-mi butaayɔ. 19Ɔsika ngyi ka ɔkɛnku bina katɔ bɔkpali na mina lili ku Katɔti Kɔyu kebunku kani nási Yesu Kristo kudɔ ɔsu ni, ndubɔkɛ bɔnwuna. 20Na lɛla lɛni mɔɔwia na mina anu lɛnɔ asia kpakplaa ndi ka kabla kani mɔɔbla mɛni ni, kɔƒa kulekpo-mi. Mmomu na uwi biala kemmo ku ɔƒɛni muedi ni, lɛkya ɔkplu na liti bumwi lite Kristo na mina ngba bulie ƒui kemmo. Si ina nli ngba iye líkpi.

21Na bi ndi ngba? Na mina kakɛ ni, anwu ndi si eli aabla kabla teete Kristo. Na kukpi ndububoku kɔsia utulo. 22Na si bani nsie anumi na lɛsɔ lɛkya ngba bɔmɛni kemmo ni, ndubɔkana na lɛbla ala abuni libu. Nsu ɔmani na ɔlɛka lidie? Naaati! 23Mina kasusu kéƒu na ala akpa anyɔ amɛni lɛlɔ. Ndubɔyɔ si lɛ́tɔlɔ na lísie nkya Kristo kudɔ. Nka ɔmɛni ɔdia-mi utulo. 24Nsu amii ɔsu ni, si nkya-mii kudɔ ɔdia utulo.

25Nsu ngyi ka ndubulie kayawi kamɛni kemmo ku-mii na liti libunku bina anumi busie na bɛkɛ kubiti na bina bɔƒɔtaadi kemmo. 26Kalɛ na si nkya-mii kudɔ ni, lɛlɔyɔ lɛdubɔyɔ-mii na Kristo kemmo geen ɔkɛnku ami ɔsu.

27Ɔƒɛni lɛla lɛni ntulo ndi ka bina ngba bulie bɔbla aani kalɛ na litemi buni lɛmmɔ lɛɛtina ɔsika ɔmɛni na Kristo ɔɔwia. Na si líbo ḿbanu-mii iye línu-mii kɔku ni, ndubunu ka binye kpakplaa na kɔyu kemmo biikpó ku kasusu kenwi na bina bɔƒɔtaadi kemmo teete litemi buni lɛmmɔ. 28Bitayia bina bekisine. Mmomu binye kpakplaa uwi biala kemmo. Na ɔmɛni ndubɔtina-ma ka Katɔti ɔdubɔƒɔ-mii na ɔyila-ma udu. Ɔsika Katɔti muukpó bina kekpo teete-mii na anwu mɔɔyá na bɛɛdi kekpo kammɔ lɛlɔ. 29Na úte-mii kuƒi ka bimwi Kristo, na ɔɔɔdi ka bɛƒɔ-nwu bɛdi ɔsu kani na ɔ́sa. Mmomu ɔdi ka amii lɛnɔ bibo abi na anwu ɔsu. 30Kekpo kani nnye muukpó mɛni ni, amii lɛnɔ bibunku-mi. Kekpo kamɛni kani na bɛ́nu ka lɛ́kya ńteekpo. Na aani kalɛ na bínu ni, aka kani na mmu nnye muukpó.

Currently Selected:

Ƒilipiƒuɔ 1: lef

Highlight

Copy

Compare