Lɛkpa Ulu 7

Katɔti Ɔ́bɔku Kadi Bamba Bekyuli

1Amii Israelƒuɔ, si uwi ɔni na bina Unwoti Katɔti ɔ́kpanku-mii úboku kalɔ kani na bɛdubuti binwini bina ɔdi kemmo ni, ɔdubɔbɔku Hitiƒuɔ ku Girgasiƒuɔ ku Amoriƒuɔ ku Kanaanƒuɔ ku Perisiƒuɔ ku Hewiƒuɔ ku Yebusiƒuɔ lɛnɔ ute-mii. Kadi maatɛ bamɛni bekyuli bemomo betulo-mii na bebo ɔkplu lɛnɔ betulo-mii. 2Unwoti ɔdubo-ma budie bute-mii na bɛbɔku-ma bɛlɛku kalɔ kammɔ lɛlɔ. Na mmɔ na ɔlɛka bɛyila-ma udu ƒui na bitanu ɔdi biala kɔnyana lɛnɔ. Amii ku-ma bitenyimi lɛla biala bitete lɛlɔ. 3Na bitaya na amii ku kadi bamba bammɔ bekyuli biti lɛlɔ. Biteti bina bebi beleku bitete-ma iye biti bana belekubi bite bina bananabi. 4Na si bɛ́ya na bábla lɛni ni, bekyuli bammɔ badubɔkpanku bina bebi na batátaakpa baƒiɔ na benwini kama bakya bana Unwoti. Na ɔmɛni ɔdubɔya na Katɔti uti kɔnyi ɔkya-mii na ɔyila-mii udu kɔnakunwi. 5Anwuɔsu ni, bibo bana akpabi ƒui bɛbwɛ. Na bibo bana atabi ani baalɔ banii atabi kedee lɛnɔ bɛbwɛ kpɛtɛ kpɛtɛ. Na bɛƒɛ bana lɛƒiɔgyii lɛni na bálɛ béte bana baƒiɔ beledi bani baalɔ Asera baƒiɔ. Na bibo bana baƒiɔ ƒui bɛkya ogya kemmo.

Amii Ndi Katɔti Bekyuli Baƒunadi

6Bɛdi Unwoti Katɔti bekyuli kedee bani na ɔ́ƒuna ɔ́bla nwuna badi na kayawi bekyuli ƒui akɔ. Na bɛ́ƒɔ-nwu kuye geen.

7Katɔti útaƒuna-mii ka bimomo bitulo kadi bamba bekyuli ɔsu, ɔsika amii nse blii suɛ ntulo. 8Nsu Katɔti ɔ́ƒuna-mii, ɔsika ɔɔyɔ́-mii litemi na úse bina bati kuuku kenye úse ɔsu. Na ɔkɛnku nwuna ɔyikun bonwu kenye na úkpo ɔ́ƒɔ-mii ɔ́lɛku Egyipteƒuɔ ɔga enu kemmo kesii kani na nka únye-mii lɛlɔ na bɛ́kya bɛɛbla kabla teete-nwu. 9Na bɛti nwaa ka bina Unwoti Katɔti kani ndi Katɔti ɔni nkya na ɔɔdi nwuna litemi lɛlɔ uwi ndi uwi na ulalɛ-ni kama. Na ɔɔdi nwuna bunyimi lɛlɔ na uudie nwuna bɔyɔ taatina bekyuli bani mɔɔyɔ́-nwu na baadi nwuna ɔda bubo lɛlɔ útédu kaba apim apim.

10Nsu bani muukisi-nwu ni, ulenye taanu-ma gyɔlɔɔ mmomu uudie taalɛ-ma anumi ku anumi na ɔyila-ma udu kɔnakunwi. 11Anwuɔsu bɛsia anu na bitaadi nwuna ɔda bubo ku ala ani mɔɔtina-mii ɔmwi kadi mɛni lɛlɔ.

Katɔti Ɔdubute-mii Kusɛ Kusɛ Si Bɛ́di Nwuna Ɔda Bubo Lɛlɔ

12Si bɛ́di ɔda bubo bɔmɛni ƒui lɛlɔ kaduɛ ni, bina Unwoti Katɔti ɔdubɔdi nwuna linyese lɛlɔ na utaayɔ-mii uwi ndi uwi aani kalɛ na ɔ́su bula bati kuuku úse. 13Na ɔmɛni ɔdubɔya na ɔyɔ-mii litemi na bimomo na ute amii ku bina bebi kusɛ kusɛ na bɛkɛ edula pii na bina adingyii ku nnɔ egyii mmo bɔbla kaduɛ. Na bina ɔmantɛ bakɔ ku baƒonu lɛnɔ bawɔ pii na kalɔ kani na ɔ́su bina bati kuuku úse ka wete-mii lɛlɔ. 14Katɔti ɔdubute-mii kusɛ kusɛ utulo kadi bamba bekyuli biala. Na uláya na udinkɔ ɔdi wakya amii iye bina bebuo akɔ. 15Na Katɔti ɔɔɔdubo bɔya na ɔlɛ ɔdi ubo-mii lɛlɔ. Na uláya na lɛlɛ buɛ lɛni nébo na Egyipte kalɔ lɛlɔ mmɔ ɔdi webo-mii lɛlɔ. Mmomu kadi biala mekisi-mii ni, ɔdubɔya lɛlɛ lɛmmɔ udu libo bekyuli bammɔ lɛlɔ.

Bɛyila Ɔma Biala Ku Bana Baƒiɔ Udu

16Si Unwoti Katɔti úbunku-mii na bíkpo bɛ́di bina bekisine lɛlɔ ni, bɛnu ka bɛ́yila lɛla biala udu. Na bitanu ukyuli biala kɔnyana. Na bɛnu kaduɛ kalɛ na ɔdi uleduo bukpoku taanu bɔdi kemmo na ɔkpa bana baƒiɔ bammɔ badi. 17Na ɔdi utéye lɛlɔ ɔnii, “Dɛ na wabla asa na bɔkana bekyuli bamɛni udu bɔyila? Ɔsika bebo ɔyikun bétulo-bu.” 18Biteti kasusu kammɔ udu bitekpoku lɛlɔ. Mmomu binyimo kaduɛ lɛla lɛni na Katɔti ɔ́bla Egyipteƒuɔ ku bana ɔga. 19Na bɛ́nu kalɛ na ɔkɛnku Unwoti Katɔti ɔyikun bonwu ku akɔla lidu lidu budie taatina lɛlɔ na Katɔti ɔ́da-mii údie Egyipte kalɔ lɛlɔ. Na lɛni kani na ɔdubɔbla akɔla na bina akɔ si bɛ́siaku bina bekisine bani mɔɔda-mii liƒu mmɔ. 20Na bekisine bani mekeli matábɛ ku bani ƒui mekeli kukpi ni, Unwoti Katɔti ɔdubɔya na ɔtɔtɔ bonwu ɔgyu-ma na bekpi kɔnakunwi.

21Anwuɔsu si bɛ́da bɛ́lɛ-ma lɛlɔ na kekpo kemmo ni, bitaya bana lɛlɔ liƒu lɛda-mii. Ɔsika bina Unwoti Katɔti údu na ɔkya-mii akɔ na ɔɔda liƒu, na anwu ndubukpo ute-mii. 22Na Katɔti ɔɔyɔ́ ka bitaayila kadi bamba bekyuli bammɔ udu blii blii, na ɔɔɔdi kɔnakunwi. Ɔsika si bítabla lɛni ni, beƒiebuo badubumomo betulo-mii. 23Nsu si bísie bítékpoku bina bekisine ni, Unwoti Katɔti ɔdubɔya na bana kasusu keƒu na ɔbla-ma gyuma gyuma utédu ka bɛ́yila-ma udu ƒui. 24Na bɛdubɔdi baga bammɔ lɛlɔ na ɔdi ɔsɔ ulenyimo si bélie ngba dii. Na ɔdi ulakana-mii bunye bɔsiaku lɛnɔ.

25Na si bɛ́di kadi bekyuli badi lɛlɔ ni, bɛkyula bana baƒiɔ bani na bátu bálɛ. Nsu ɔdi biala ɔnu kaduɛ na anumi etegyie-nwu na bana sika ugyiedi iye ɔƒualadi ɔni na béti bámana bana baƒiɔ bammɔ lɛlɔ na ɔdi ɔsu ɔnii uuti ɔdi. Ɔsika Katɔti ukisi ala ammɔ na adi kakpagyuɛ ete-mii. 26Anwuɔsu bɛyila lɛla biala na Katɔti ukisi mmɔ udu. Ɔsika si ɔdi úti lɛla lɛmmɔ udu úboku nwuna kaduli ni, Katɔti ɔdubɔyila ukyuli ɔni nábla lɛla lɛmmɔ ku nwuna kaduli bekyuli ƒui udu. Anwuɔsu ukyuli biala ɔda lɛlɔ ɔmami lɛƒiɔkpa lɛlɔ, ɔsika Katɔti ɔdubudie ukyuli ɔmmɔ udu use lɛti ka ɔkyula.

Currently Selected:

Lɛkpa Ulu 7: lef

Highlight

Copy

Compare