Lɛkpa Ulu 8

Biteenyimo Katɔti Uwi Ndi Uwi

1Si bɛ́sia anu na bɛɛdi ɔda bubo bɔni muute-mii ɔmwi mɛni ƒui lɛlɔ ni, bɛdubusie na bitélie kalɔ kani na Unwoti úse kenye ka weti wete bina bati kuuku mmɔ lɛlɔ. Na bɛdubulie mmɔ na bimomo na biti kalɔ kammɔ binwini bina ɔdi. 2Na bitayiƒala kalɛ na bina Unwoti Katɔti ɔ́tɔnku-mii na kalɔ kakwiidi kamɛni kemmo akwa aavlene. Ɔ́bla ɔmɛni ɔnii ɔɔnu si bɛdubɔti ka anwu nda-mii. Na ɔkɔku-mii ɔnu si bina kasusu kadubɔsia-nwu lɛlɔ na bɛdi nwuna ɔda bubo lɛlɔ. 3Anwuɔsu ɔ́ya na kɔka kɔ́da-mii na úte-mii adila ani baalɔ banii manna ɔ́siku Katɔ na bɛ́di. Na adila ammɔ udu ni, bina bati kuuku iye amii bina ɔdi útanu-nya kudii. Ɔ́bla ɔmɛni ɔ́tina-mii na biti bɛtɛya ala ka ɔɔɔdi lɛdila lɛti pɛ muute ukyuli ngba. Mmomu litemi biala na lɛ́si Katɔti kudɔ lɛlɔ bɔdi muute ngba geen bɔmmɔ. 4Na bɛnu bɛti ka akwa aavlene amɛni ulu busie kemmo ƒui ni, ɔdi biala awu útabwɛ na ɔdi ɔgba lɛnɔ úteƒu. 5Anwuɔsu bɛya na ɔbla-mii kasusu ka kalɛ kani na si bina bebi bábla ala ani naaadia na bɛɛdɔnku-ma ni, lɛni kani na si amii lɛnɔ bɛ́bla ala ani naaadia Unwoti Katɔti lɛnɔ na ɔdubɔdɔnku-mii.

6Bɛdi ɔda bubo bɔni na bina Unwoti Katɔti úti úte-mii mɛni lɛlɔ, na bɛsia-mu kama na biti ɔbu bite-nwu. 7Ɔsika bina Unwoti Katɔti ɔdubuti-mii ubeduoku kalɔ kani na kadia kemmo. Ntukpa búyi-ka, na aba ntu lɛnɔ bɔkya mmɔ, na abiɔ ntu aalɛ́ abinkpo lɛlɔ ku awɛ kemmo. 8Na kalɔ kammɔ lɛlɔ ni, edula ebi aani anta ku kakpa ku ana lidu pii lɛkya ku egyiibi bamba lidu ku nnɔ egyii ku uwɔ. 9Na si bílie kalɔ kammɔ lɛlɔ ni, kɔka kulada-mii kudii iye bilayaki lɛla lɛdi. Na atakpɛ ammɔ kemmo ni, bɛdubɔkɛ abuala ani na beeti taakywɛ kɔlɛmii. Na abuala kpakplaa ku ani nse kpɛtɛ kpɛtɛ lɛnɔ akya abi ammɔ kemmo.

Bitedie Atu Na Nwuna Ɔda Bubo Lɛlɔ

10Si bɛ́di na bímo ni, binyimo na biti linugya bite bina Unwoti Katɔti ɔkɛnku kalɔ kabuni kani na úti úte-mii ɔsu. 11Na bise likpo na bitayiƒala Unwoti Katɔti. Na bitedie atu na nwuna ɔda bubo ku nwuna ala bɔtina bɔni líti muute-mii ɔmwi mɛni lɛlɔ. 12Na si bɛ́di bímo na bɛ́tu lɛtɔ lɛbuni na bilie-ni kemmo 13na bina ɔmantɛ bakɔ ku baƒonu báwɔ pii na sika ɔƒualadi ku ugyiedi ku akɛla bamba émomo ni, 14bɛnu kaduɛ na bilatalaku lɛlɔ katɔ na bɛyiƒala bina Unwoti Katɔti ɔni nébedie-mii na Egyipteƒuɔ kalɔ lɛlɔ kesii kani na bénye-mii lɛlɔ na bɛɛbla bana kabla.

15Na binyimo kalɛ na ɔ́tɔnku-mii na kalɔ kakwiidi bonwu kamɛni kemmo, kesii kani na balakpi bekpidi ku batamlukpa bakya. Ntu bútakya mmɔ, nsu Unwoti Katɔti ɔ́ya na ntu bɔ́bwɛ bɔ́lɛ lɛtakpɛ kemmo na bɛ́ni. 16Na úte-mii adila ani ndi manna na kalɔ kakwiidi kammɔ kemmo. Na adila ɔmmɔ udu ni, bina bati kuuku muedi bátati-nya kudii. Na Unwoti Katɔti ɔ́bla ɔmɛni ɔnii ɔɔnu si bɛdubɔti ka anwu nda-mii, na ɔkɔku bina bɔƒɔtaadi ɔnu kalɛ na weti ala abuni wete-mii na kawɔlɔkɔ ku kaƒɔ ƒaa.

17Na si bɛ́kɛ akɛla amɛni udu ni, ɔdi utasu ɔnini, “Akɛla pii ani na mbo mɛni ni, ami ɔlati ɔyikun ku ɔlɔkplu na líti lɛ́kɛ-nya.” 18Mmomu binyimo ka bina Unwoti Katɔti néte-mii ɔyikun ɔmmɔ asa na bɛ́bla akɛla ammɔ na úti ɔɔtina ka ɔ́di kenye kani na úse ku bina bati kuuku úse lɛlɔ aani kalɛ na use ɔmwi mɛni.

19Nsu mɔɔsu-mii nwaa ɔmwi ka si bínwini kama bɛ́kya bina Unwoti Katɔti na bísie bɛɛkpá ala bamba ni, Unwoti Katɔti ɔdubɔyila bina ƒui udu. 20Kalɛ na ɔ́yila kadi bamba bekyuli bani nákya bina ulu lɛlɔ ni, lɛni kani na ɔdubo-mii udu bɔyila si bítadi nwuna litemi lɛlɔ.

Currently Selected:

Lɛkpa Ulu 8: lef

Highlight

Copy

Compare