Lɛkpa Ulu 3

Israelƒuɔ Bádi Ɔga Og Lɛlɔ

1Ɔmmɔ kama búnwini na bútásia ulu ɔni ntɛ úsie Basan kalɔ kemmo. Na Ɔga Og ɔni mɔɔdi Basan kalɔ kammɔ lɛlɔ ku nwuna bekpone ƒui báta ka bebekpoku-bu na ɔma ɔni nde Edrei. 2Nsu Unwoti ɔ́su-mi ɔnini, “Tayia ɔga ɔmmɔ. Ɔsika líti Ɔga ɔmmɔ ku nwuna bekpone ƒui ku nwuna kɔlɔ lɛ́kya-a enu kemmo. Anwuɔsu kalɛ na ábla Amoriƒuɔ Ɔga Sihon ɔni nádi lɛga na Hesbon na kekpo kemmo ni, lɛni kani na adubɔbla Ɔga Og.”

3Anwuɔsu Unwoti úti Ɔga Og ku nwuna bekpone ƒui ɔ́kya-bu enu kemmo na bɔ́du-ma ƒui kede kede. 4Uwi ɔmmɔ kemmo búukpo bɔ́ƒɔ nwuna kalɔ kani baalɔ banii Argob ƒui ku lɛma libendi lɛni bumomo ndubɔbla liti ku leevu na Basan kalɛkɛ kani lɛlɔ na Ɔga Og ɔɔdi mmɔ. Na ɔma biala uuubo ɔni na bútaƒɔ bútasiku-nwu enu kemmo. 5Na lɛma lɛni ƒui kɔtɛ na mɔɔtɛmi-mii mɛni ni, bátu awodu ebendi báka bámana-nya na ana kɔyakun ni, abuala kɔlɛmikɔ sɔɔn na kɔdi na béti bábala-ku. Na akpaklɔ adi lɛnɔ akya na ébomo, nsu anya amu ni, bátatu awodu bátaka bátatamana-nya. 6Bɔ́yila-ma udu ƒui na lɛma ku akpaklɔ ammɔ kemmo. Na bɔ́du banana ku beleku ku banamu bammɔ ƒui aani kalɛ na bɔ́bla Ɔga Sihon ɔni mɔɔdi lɛlɔ na Hesbon. 7Nsu bana ɔmantɛ bebuo ama ni, bútadu-ma. Mmomu búti-ma ku bana ala ƒui búnwini bula adi.

8Anwuɔsu uwi ɔmmɔ kemmo ni, búkpo bɔ́ƒɔ lɛmii lɛni nkya Yordan Ketu ɔƒɛ katukɔ kakɛ bɔ́lɛku Amoriƒuɔ baga inyɔ bammɔ enu kemmo. Úti ɔ́si Arnon Kɔwɛ ɔvi útédu Hermon Kɔbi lɛlɔ. 9Hermon Kɔbi kɔmɛni na Sidomƒuɔ bátaalɔ banii Sirion. Na Amoriƒuɔ bátaalɔ-ku banii Senir. 10Búkpo bɔ́ƒɔ lɛma lɛni ƒui nwi ɔtantɛ ku Gilead kalɛkɛ ku Basan úti útédu Salka ku Edrei. Na lɛma lɛmɛni ni, nka Basanƒuɔ Ɔga Og útaadi-ni lɛlɔ. 11Na Raƒa bekyuli ƒui kemmo ni, Ɔga Og lɛti pɛ nébu. Na binu! Nwuna lɛla lɛni lɛlɔ na ɔɔtɛ ni, nwuna bune butulo lɛgba leevu-ɛtɛ. Na nwuna bɔbɛbɛ bɔbla aani lɛgba ɛku. Na abuala lɛti lɛti na béti bábla lɛla lɛmmɔ. Na kamu kese Arnonƒuɔ ɔma ubendi ɔni baalɔ banii Raba ɔmwi kadi.

Béle Kalɔ Kammɔ Béte Kaba Biala

12Uwi ɔni kemmo búkpo bɔƒɔ kɔlɔ kɔni mɔɔsu mɛni ni, líti kalɔ kani nkya Aroer katɔ kakɛ kani nde Arnon Kɔwɛ ku Gilead abi lɛlɔ kalɔ ntɛ bule lɛma lɛni nkya-ni kemmo líte Ruben kɔdua bekyuli ku Gad kɔdua bekyuli. 13Na Gilead abi lɛlɔ kalɔ kakladi kani nébu ku Basan kalɔ kani lɛlɔ na Ɔga Og útaadi ni, líti líte Manase kɔdua bekyuli kakɛ kenwi. Na Argob kalɛkɛ na Basan kalɔ kemmo ni, mmɔ na Raƒaƒuɔ beli. 14Na Yair ɔni nási Manase kɔdua ni, anwu náƒɔ Argo kalɛkɛ ƒui na Basan kalɔ kemmo úti útédu Gesur ku Maakatƒuɔ ɔmii. Na úti nwuna lɛnyi ɔ́sia lɛma lɛmmɔ, anwuɔsu na baalɔ mmɔ ɔmwi ɔmwi banii Yair lɛma. 15Na líti Gilead abi lɛlɔ kalɔ líte Makir. 16Na Ruben kɔdua bekyuli ku Gad kɔdua bekyuli ni, líti kalɔ kani nwi ɔ́si Gilead úti ɔɔyu útédu Arnon Kɔwɛ úti útédu Yabok Ketu ɔni ndi Arnon bebi ɔmii líte-ma. 17Na nwuna ɔƒɛ kanukɔ kakɛ na Yordan Ketu kakya ɔ́si Galilea Ɛpu na katɔ kakɛ ɔ́yu úbedu Mma Ɛpu na ɔkɛ ɔdanku Pisga Kɔbi.

18Uwi ɔmmɔ kemmo ni, líbo-ma ɔda nnini, “Bula Unwoti Katɔti néti kalɔ kani nkya Yordan Ketu ɔƒɛ katukɔ kakɛ úte-mii ka biti bɛbla bina kadikɔ. Nsu ɔƒɛni mɔɔsu bina bekpone ƒui ka bavia Yordan Ketu na bagyu batɔ-bu na betékpo baƒɔ kɔlɔ kɔni nkya mmɔ bete Israel adua akladi na beti babla bana kadikɔ. 19Nsu bɛda bina beleku ku bebi ku bebuo pii bani na bibo mmɔ bɛkya kama. 20Binye ku bina banwani na bikpo bɛƒɔ kɔlɔ kɔni na Katɔti ɔ́su ka wete ama lɛnɔ na Yordan Ketu ɔvi ɔmmɔ útédu ka ama lɛnɔ bákɛ bana kadikɔ aani kalɛ na amii lɛnɔ bɛ́kɛ kɔdikɔ kɔni na líti líte-mii asa na bɛsɔ binwini bibo bina keliekɔ.”

21Ɔmmɔ kama líbo Yosua ɔda nnini, “Awɔ ɔlati, ánu ku ƒula anumi lɛla lɛni na Katɔti ɔ́bla Ɔga Sihon ku Ɔga Og. Lɛni kani na Katɔti ɔdubɔbla ɔga biala ɔni na wata wenye-mii lɛlɔ. 22Anwuɔsu tayia-ma, ɔsika ƒula Unwoti Katɔti ɔdubukpo ƒula kekpo biala ute-ɔ.”

Katɔti Ɔ́su Mose Ka Nwuna Ɔgba Ulanya Kanaan

23Uwi ɔmmɔ kemmo ni, lɛ́kpali katɔ na lívele Unwoti kpakplaa nnii, 24“O Ɔyikune Ƒui Katɔti, awɔ nése kalɔ eedie ƒula ɔyikun bonwu taatina ami ƒula kabla ɔblane ku ƒula akɔla budie taatina. Na ɔyikun ɔdi uuubo na katɔ iye kalɔ na ɔkana akɔla ebendi ani na aabla mɛni bɔbla. 25Anwuɔsu muuvele-ɔ nnii ya na lɛvia lisie kalɔ kabunidi kani nwi Yordan Ketu ɔvi ngye na ntánu abi lɛlɔ kɔlɔ kɔbunidi kɔni nkya mmɔ ku Lebanon abi kalɔ kabuni kammɔ.”

26Nsu ɔ́si amii ɔsu ni, Katɔti úti kɔnyi ɔ́kya-mi na útakpete-mi. Mmomu úbo-mi ɔda ɔnini, “Da bɔtɛmi ya! Takpali-mi na ɔmmɔ lɛlɔ lɛnɔ! 27Kɔ sie na eténye Pisga Kɔbi lili na asia kalɔ kammɔ anu amana kaduɛ. Ɔsika aaadubo Yordan Ketu kamɛni bɔvia. 28Mmomu lɔ Yosua na ebo-nwu ɔda na bekyuli bammɔ anumi na akya-nwu ogya, ɔsika kalɔ kani na ánu mmɔ ni, anwu ndubɔkpanku bekyuli bammɔ ɔvia Yordan Ketu na betéti mmɔ babla bana kadikɔ.” 29Anwuɔsu bɔ́sɔ búlie kɔwɛ kɔni nde Bet-Peor ɔma kakɛ.

Currently Selected:

Lɛkpa Ulu 3: lef

Highlight

Copy

Compare