Koloseƒuɔ 4

1Amii benwoti bani mbo kabla bablane ni, bɛda-ma na bɛnu-ma lɛlɔ kaduɛ. Ɔsika amii lɛnɔ bɛgyi ka bibo Unwoti ɔni nkya katɔ.

Bitaabla Ala Abambadi Lɛnɔ

2Bitada Katɔti bɔkpali bitaya. Na binye kagyumana, na biteeti linugya teete-nwu. 3Na uwi biala kemmo na bɛɛkpali katɔ ni, bivele Katɔti na ɔlɛmi ulu ute-bu na bɔkana na bɔsu Kristo litemi buni lɛmmɔ abɛla. Ɔmɛni ɔsu na ntɛ aban ɔtɔ. 4Bɛkpaliku-mi katɔ na lɛkana na lɛsu litemi buni lɛmmɔ na benu-ni kalɔ nwaa.

5Bɛda anu na bina keliela kemmo na bɛti kalɛ na bilieku bani naaadi baƒɔtaadine. Na kuƒi biala na bɛ́kɛ ni, bɛbla kabla bite Blɔti. 6Bɛya na bina butemi bɔdia bunu na ɔda kubiti. Bɛya na Katɔti lɛnunda lɛkya-mii kemmo kalɛ na bɛti ala kenye budie bite ukyuli biala.

Bɔɔkada-mii

7Tihiko ɔdubɔsu-mii mina lɛlɔ kɔtɛ. Ɔdi bula ɔnwa ɔni litemi na mɔɔyɔ́ geen na unye Blɔti kabla kammɔ kemmo sɔsɔ uubunku-bu. 8Ɔmɛni ɔsu na mɔɔtala-nwu lɛkya-mii na ubakya-mii ogya na ɔsu-mii kalɛ na abu lɛnɔ buwi kabla kammɔ lɛlɔ. 9Ɔdubo-mii kudɔ ku bula ɔnwa Onesimo ɔni litemi na bɔɔyɔ́ geen na bɔ́ƒɔ-nwu bɔ́di na ɔdi bina akɔ unwi. Ama ndubɔsu-mii ala ani ƒui mɔɔlɛ́ mɛni.

10Aristarko ɔni na ami ku-nwu bɔtɛ ɔtɔ mɛni ku Marko ɔni ndi Barnaba ɔnwani banii beegyele-mii o-o! Líte-mii bɔti na Marko ɔmɛni lɛlɔ ka si úbo-mii kudɔ ni, bigyingya enu na bɛƒɔ-nwu ku ebiti. 11Yosua ɔni na basɔ baalɔ banii Yusto lɛnɔ uugyele-mii. Yudaƒuɔ nkyuli ɛtɛ bamɛni ndi baƒɔtaadine bani nkya-mi kudɔ na bɔɔbla kabla kalɛ na Katɔti lɛga kadikɔ kebo. Kalɛ na benyeku-mi mɛni ni, ɔ́ya na lɛlɔ lɛɛyɔ́-mi geen.

12Epaƒra ɔni ndi Kristo kabla ɔblane na ɔdi bina lɛkpa lɛmmɔ baƒɔtaadine kemmo unwi lɛnɔ uugyele-mii o-o! Ɔnwa ɔmɛni úti ɔ́sia lɛlɔ kpakplaa na ɔɔkpali katɔ na bina lili kalɛ na binye kpakplaa na bɛlɛ lili bɛwɔlɔ na bina bɔƒɔtaadi kemmo na bɛdi Katɔti litemi biala lɛlɔ. 13Ami ɔlati muudie-nwu kenye ka ɔ́bla kabla kpakplaa úte-mii ku bani nkya Laodikea ku Hierapoli. 14Bula ɔkpana ɔyɔne Luka ɔni ndi evogyii ɔblane ku Dema lɛnɔ banii beegyele-mii o-o! 15Bɔɔkya banwa bani nkya Laodikea ku Ɔnwa Uleku Nimƒa ku baƒɔtaadine lɛkpa lɛni mɔɔsa na nwuna kaduli kenye o-o!

16Si bɛ́ka ɔku ɔmɛni ni, biti bimene Laodikea baƒɔtaadine lɛkpa, na ama lɛnɔ baka. Na amii lɛnɔ bɛka ɔku ɔni na línweni líte Laodikea baƒɔtaadine lɛkpa lɛmmɔ.

17Na bɛsu Arkipo ka ɔkya ɔkplu na ɔwɔlɔ Blɔti kabla kani na úti ɔ́kya-nwu enu kemmo mmɔ.

18Ami Paulo ɔlati mina kɔnu na líti muunweni-mii kegye kamɛni. Na bitayiƒala ka ntɛ aban ɔtɔ. Na muuvele Katɔti nnii ɔya na nwuna lɛƒɔndia lɛsiaku-mii.

Currently Selected:

Koloseƒuɔ 4: lef

Highlight

Copy

Compare