Koloseƒuɔ 3

1Ka amii ku Kristo na Katɔti ɔ́gyila ɔ́lɛku bekpine akɔ ɔsu ni, bɛwia ala ani nkya katɔ kama ulu na kesii kani na Kristo ulie ɔɔdiku Katɔti lɛga. 2Na bina kasusu kataasia ala ani nkya katɔ mmɔ lɛlɔ, na ɔɔɔdi kalɔ ala lɛlɔ. 3Ɔsika use aani bíkpi na bɛkya Katɔ Ɔga Ɔma ku Kristo. 4Bina ngba ƒui ndi Kristo. Na si Kristo ɔ́da ɔ́lɛ kayawi kamɛni kemmo ni, amii ku-nwu ƒui bɛdubɔdi lɛga bɛsala ku kubiti.

Bínwini Bekyuli Bawɔdi

5Anwuɔsu ni, bɛdu ɔlɔna kemmo ɔkwɛ adala biala nkya-mii lɛlɔ kemmo. Na bitasiaku-nya kama aani lɛsɔnɔdi ku ala ani muusé lɛlɔ ku ɔlɔna ɔkwɛ adala ani muuti ukyuli teesienku likpidi bɔbla kemmo na aayá na ukyuli uuti kasusu kekpidi ku ɔdivo udu biala ɔni ndi lɛƒiɔkpa. 6Ala amɛni udu bɔbla ɔsu ni, Katɔti ɔdubo kɔnyi buti bɔkya bani naaabla kalɛ na nwuna litemi lɛɛsu. 7Na uwi ɔdi návi kemmo ni, ngba bɔmmɔ udu na bílie.

8Nsu ɔƒɛni ni, ɔlɛka bɛda ala amɛni udu bɔbla bɛya. Anya ndi kɔnyi buti ku ala ani mɔɔtu bekyuli kayi ku bekyuli lɛlɔ kasusu kekpidi buti. Na bitalɔ lɛlɔ anyikpi, na bitaya na etemila ani mɔɔyá na ukyuli uusé lɛlɔ alɛ-mii kenye. 9Bitatɔlɔ lɛlɔ, ɔsika bɛ́da udu ɔkukudi ɔni nákya-mii kemmo mmɔ bídie. 10Na bínwini bekyuli bawɔdi. Na Katɔti ɔɔyá na bɛɛdia teebu, na bina udu ɔbla aani anwu ɔdi kalɛ na bɛti-nwu geen.

11Ɔmɛni ɔsu kavumana kadi keeebo bani ndi Yudaƒuɔ ku bani naaadi Yudaƒuɔ ntɛ, iye bani muukúlo ago ku bani neeekulo ntɛ. Lɛni kani na kavumana kadi keeebo bani ndi baƒɔ ku bani nási Sitia ku bekyuli bani mɔɔbla bekyuli bamba kabla ku bani mɔɔbla ama alati kabla ntɛ. Mmomu Kristo ndi-bu lɛla biala, na ulie ɔdi biala lɛlɔ kemmo.

12Amii lɛnɔ bɛdi Katɔti bekyuli bani na ɔ́ƒuna mmɔ badi. Ɔmɛni ɔsu bitaabla lɛƒɔndia teete bekyuli, na bitaanu bekyuli kɔnyana, na biteeboku lɛlɔ kalɔ, na bitaanyuɛ lɛlɔ ku kayi buɛɛ. 13Na biteebunku lɛlɔ. Na si ɔdi ɔ́ƒiɔ ɔdi ni, uti ɔkyiɛ-nwu aani kalɛ na Blɔti úti ɔ́kyiɛ-mii. 14Na ɔmɛni kama ƒui ni, bɛyɔ lɛlɔ. Ɔsika bɔyɔ muunyimi ala ƒui taasala na aabla unwi.

15Na bɛya Kristo ɔni muute keyi buɛɛ ɔdi lɛga na bina kayi kemmo. Ɔsika Katɔti ɔ́lɔ-bu ɔsala ɔnii bula ƒui bɔbla ɔlɔna unwi na bɔkɛ keyi buɛɛ. Na bitaagya enu. 16Bɛya na Kristo litemi buni lilie-mii kayi kemmo kaduɛ. Na bitaatina ala na bitaalɛ lɛlɔ na lɛnunda kemmo. Bitaatu Bunweni Kedee Ɔku kemmo lɛnu ku baƒɔtaadine lɛnu ku lɛnu lɛni nkɛnku Katɔti Kɔyu ala lɛlɔ teeti taagya Katɔti enu ku bina kayi ƒui. 17Na lɛla biala lɛni na bɛɛsu iye bɛɛbla kemmo ni, bɛbla-ni na Blɔti Yesu lɛnyi kemmo. Na bitaagya Katɔti enu taasiaku Blɔti Yesu lɛlɔ.

Bilie Na Ngba Bɔwɔdi Kemmo Aani Kristo Basiakune Kalɛ

18Amii beleku biboku lɛlɔ kalɔ bite bina bagya, ɔsika ɔmɛni námanku-mii aani Kristo kama basiakune.

19Amii banana lɛnɔ, biti bɔyɔ bite bina beleku. Na bana lɛlɔ liteteeƒi-mii livo.

20Na amii bebi ni, binu bina bawɔne litemi, ɔsika ɔmɛni mɔɔda Blɔti ebiti.

21Amii bawɔne bitakya bina bebi kɔnyi kalɛ na enu aƒɛ-ma na kabla biala kemmo.

22Amii bekyuli bamba kabla bablane binu bina benwoti litemi na ulu biala lɛlɔ. Na bidie kayi na bɛbla kabla uwi biala kemmo, na ɔɔɔdi uwi ɔni na bakya-mii kudɔ lɛti kalɛ bakɛ-mii lɛlɔ kubiti. Mmomu bɛbla kabla ku kayi ƒui na ɔbu ɔni bibo bite Blɔti ɔsu. 23Na lɛla biala na bɛɛbla ni, bɛbla-ni ku kaƒɔ nwaa aani si Blɔti na bɛɛbla bite na ɔɔɔdi bekyuli. 24Bɛgyi ka Blɔti ndubute-mii lɛyuƒɔla lɛni na ɔ́su úse ka wete nwuna bekyuli. Na Kristo ndi Unwoti ɔni geen kabla na bɛɛbla. 25Ukyuli biala likpidi lɛni na ɔ́bla ni, nina lɛlɔ na Katɔti ɔdubo bunye na ɔni-nwu kɔtu. Ɔsika Katɔti ulánu bekyuli anumi si ɔɔní kɔtu.

Currently Selected:

Koloseƒuɔ 3: lef

Highlight

Copy

Compare