قصة الأنبياء 34
34
دينا بنت النبي يعقوب
1وفي يوم خرجت دينا بنت النبي يعقوب من زوجته ليئة علشان تزور بنات من جيرانها في المنطقة. 2-3فشافها شكيم بن حمور، ابن كبير المنطقة الي سكنوها، فاخدها غصب عنها، لكنه حبها فخلاها عنده. 4وبعدين راح شكيم لأبوه وقال له: «اخطب لي البنت دي أنا عايز اتجوزها». 5ولما عرف النبي يعقوب أن شكيم اعتدَى علَى بنته دينا. استنى لحد ما يرجع ولاده اللي كانوا وقتها في الحقول بيرعو الغنم.
6وراح حَمور وابنه شكيم للنبي يعقوب علشان يخطبوا بنته دينا. 7ولما رجع ولاد النبي يعقوب من المرعىَ وعرفوا اللي حصل مع أختهم، ثاروا وتملكهم الغضب لأن شكيم ارتكب كبيرة من الكبائر في حق أهل بيت النبي يعقوب لما اعتدى على أختهم. 8فقالهم حمور: «ابني شكيم لما شاف بنتكم حبها واتعلق بها، وأنا بطلبها منكم علشان ابني يتجوزها. 9ويبقىَ فيه نسب بينا، نتجوز من بناتكم وتتجوزوا من بناتنا. 10واسكنوا بينا. والأرض اهه قدامكم واسعة ، فتملكو منها وتاجروا فيها زي ما أنتم عايزين». 11بعدها اتكلم شكيم وقال لهم: «ياريت ترضوا تجوزوهالي، وكل اللي تطلبوه مني اعمله علشان خاطرها. 12اطلبوا هدايا ومهر زي ما أنتم عايزين، لكن جوزوني بنتكم». 13فَرد ولاد النبي يعقوب عليهم بمكر، لأن شكيم اعتدىَ على دينا أختهم. 14وقالوا لشكيم: «لكن أنت رجل مش مختون وده عار كبير عَندنا، ومانقدرش نجوز اختنا لواحد مش مختون زينا. 15على شرط أنكم تختنوا ذكوركم زينا. ساعتها ممكن نقبَل طلبكم وتتجوز اختنا. 16وساعتها يبقى فيه نسب بينا، تتجوزوا من بناتنا ونتجوز من بناتكم، ونبقىَ شعب واحد ونسكن كمان بينكم. 17ولو رفضتم تعملوا زي ما قلنا لكم، نأخذ بنتنا ونرحل من أرضكم». 18فرضَى حَمور وابنه شكيم بكلامهم. 19وكان شكيم أكرم جميع بيت أبوه، وكان قلبه متعلق بدينا بنتهم فوافق على تنفيذ طلبهم.
20فراح حمور وٱبنه شكيم عند باب المدينة مكان ما بيكون قادة المدينة متجمعين، وعرضوا عليهم الموضوع وقالوا: 21«يعقوب وجماعته ناس طيبين ومُسالمين، يكون أحسن لو سكنوا بينا، وأرضنا اهيه واسعة يتاجروا فيها. هنتجوز من بناتهم، وهم يتجوزوا من بناتنا. 22لكنهم مش هيناسبونا ولا يسكنوا معانا إلا على شرط أننا نختن زيهم كل ذكورنا. 23لو عملنا كده، بمرور الزمن تتنقل لنا كمان أملاكهم، فعلشان يسكنوا بينا ، احسن لنا لو نوافق علَى شروطهم.» 24فاستجاب لكلام حمور وشكيم كل اللي كانوا عند باب المدينة مجتمعين، واختتن كل الذكور اللي كانوا في المدينة ساكنين.
25وبعد 3 أيام، لما كان رجال المدينة وكل ذكورها متوجعين من ألم الختان ، أخذ ولاد النبي يعقوب شمعون ولاوي اشقاء دينا سيوفهم، وهجموا على المدينة وأهلها غافلين وقتلوا كل الرجالة اللي فيها، 26-29وقتلوا كمان حَمور وابنه شكيم بحد السيف، وأخذوا دينا من بيت شكيم وراحوا خارجين. ولما عرف بقية ولاد النبي يعقوب أن شمعون ولاوي راحوا علشان ينتقموا لأختهم، انتهزوا الفرصة وراحوا ونهبوا المدينة والحقول، وأسروا نسائهم وأطفالهم، واستولوا على كل شيء حتى على مواشيهم وأغنامهم.
30ولما عرف النبي يعقوب اللي عمله شمعون ولاوي قالهم: «جلبتم عليَّ البؤس والشقاء واسأتم لسمعتي عند أهل البلاد من ٱلكنعانيين وٱلفرزيين بفعلكم المُشِين، احنا جماعة صغيرة ولو اجتمعوا علينا يقتلوني ويهلكوا أهل بيتي اجمعين». 31فقال شمعون ولاوي: «وأنت ترضى لنا أنهم يعتدوا على أختنا ومانبقاش غضبانين؟»
Currently Selected:
قصة الأنبياء 34: EAT
Highlight
Share
Compare
Copy
Want to have your highlights saved across all your devices? Sign up or sign in
Wycliffe Bible Translators, Inc.
