قصة الأنبياء 28
28
يعقوب في حاران
1وبعدما سمع النبي إسحاق اللي قالته زوجته رفقة، نادى علَى يعقوب ودعا له بالبركة، وقال له: «يا ابني إياك تتجوز واحدة من بنات كنعان الوثنيين. 2لكن تروح لبيت جدك بتوئيل في سهل آرام اللي في شمال أرض ما بين النهرين، وتتجوز واحدة من بنات خالك لابان. 3وأنا هادعي إلهي القدير أنه يبارك فيك، ويجعل من ذريتك أمم كثيرة ويُنميك. 4ويوهبك أنت ونسلك البركة اللي وهبها لإبراهيم ، وتملك الأرض اللي أنت عايش فيها النهاردة غريب».
5وبَعت النبي إسحاق ابنه يعقوب علشان يعيش عند لابان أخو أمه رفقة في سهل آرام في شمال أرض ما بين النهرين. 6-9ولما شاف عيسو إن أبوه دعا بالبركة ليعقوب وبعته أرض آرام علشان يتجوز واحدة من بنات خاله لابان، وكمان لما عرف إن أبوه النبي إسحاق منع يعقوب من إنه يتجوز من بنات كنعان، راح عيسو للمكان الي عايش فيه عمه إسماعيل، وتزوج واحدة من بنات عمه إسماعيل وكان أسمها محلة، وهي أخت نبايوت الابن البكر لعمه إسماعيل.
10-11ولما كان النبي يعقوب في طريقه من بير السبع علشان يروح آرام في أرض ما بين النهرين، وصل وقت غروب الشمس ، لمكان قريب من مدينة القدس، فقرر إنه يبات الليله هناك، وأخذ حجر وحطه تحت رأسه ونام. 12ولما غفل شاف في المنام، زي سلم بيوصل بين الأرض و السماء، والملائكة بتنزل عليه وبتطلع للسماء. 13وشاف يعقوب وحي الحي القيوم واقف قريب منه وقال له: «أنا هو الحي القيوم رب آبائك إسحاق وإبراهيم، الأرض اللي أنت راقد عليها دي أنا وهبتها لك ولذريتك. 14وهكَثر نسلك زي رمل الأرض، وينتشروا في الشمال والغرب والجنوب والشرق، ومنك ومن ذريتك تكون بركة لأمم الأرض أجمعين. 15مكان ما تروح أحفظك وأحميك، وهكون موجود معاك، وارجعك هنا لأرض كنعان مرة ثانيه».
16-17فصحى يعقوب من النوم وهو خايف وقال: «ده مكان شريف و له جلالة! أكيد هنا بيت من بيوت الله وباب من أبواب السماء».
18وأول ما النهار طلع أخذ يعقوب ٱلحجر ٱللي كان تحت رأسه ونصبه ذكرى في مكانه، ومسحه بالزيت. 19وسمى يعقوب المكان ده بيت إيل و معناه بيت الله بعد ما كان أسمه الأصلي لوز.
20ونذر يعقوب لله وقال في نذره: «لو أن الله حيكون معايا، يحفظني في طريق رحلتي، ويرزقني بطعامي ويكفيني في كسوتي، 21و إن كان الله حيرجعني بالسلامة تاني لبيت أبويا، فالحي القيوم فعلاً إلهي! 22وهخلي الحجر الي نصبته هنا ذكرى وعلامة لبيت عبادة الله، والعُشر من كل اللي يرزقني به ربنا هقدمه زكاة».
Currently Selected:
قصة الأنبياء 28: EAT
Highlight
Share
Compare
Copy
Want to have your highlights saved across all your devices? Sign up or sign in
Wycliffe Bible Translators, Inc.
