قصة الأنبياء 27

بركة النبي إسحاق

1في يوم من الأيام، ولما عجز النبي إسحاق وضعف نظره، نادى على عيسو ابنه البكر وقال له: «عيسو يا ابني». فقال له عيسو: «نعم يا أبي». 2فقال له النبي إسحاق: «يا ابني أنا خلاص عجزت ومش عارف امتَى يتوفاني ربي. 3فدلوقت جهز للصيد أسلحتك، وخذ سهامك وقوسك، واخرج للبرية علشان تصطاد لي بإيدك، 4وبعدين جهز لي اكل من اللي بحبه علشان أكل وأدعي لك بالبركة قبل ما يتوفاني ربي».

5وسمعت رفقة زوجة النبي إسحاق الكلام اللي دار بين عيسو وأبوه. فلمّا خرج عيسو للصيد في البرية. 6قالت رفقة لابنها يعقوب: «يا ابني أنا سمعت أبوك بيكلم أخوك عيسو وقال له: 7اخرج للبرية علشان تصطاد لي بإيدك، وبعدين جهز لي اكل من اللي بحبه علشان أكل منه وأدعي لك بالبركة قبل ما يتوفاني ربي. 8فدلوقت يا ابني تسمع كلامي وتعمل زي ما هقولك. 9روح لقطيع الغنم ونقي جديين، وأنا هاجهز لأبوك الأكل اللي بيحبه. 10وبعدين أنت تقدم له الأكل بنفسك، فياكل ويدعي لك أنت بالبركة قبل ما ينتهي أجله».

11فرد يعقوب على أمه وقال لها: «يا أمي لكن أخويا عيسو مُشعر وأنا أجرد مفيش شعر على جسمي. 12وممكن أبويا يلمسني ويعرف إني بكذب عليه، وبدل من البركة أجيب لنفسي اللعنة». 13فقالت له أمه رفقة: «لو كانت لعنة يا ابني تبقى تنزل عليَّ أنا. يلا روح وهات لي الجديين زي ما قولتك فوراً». 14فراح يعقوب ونقَى جديين وجابهم لأمه، فجهزت رفقة الأكل اللي بيحبه أبوه. 15وبعدين أخذت رفقة هدوم ابنها البكر عيسو اللي في خيمتها، ولبستها لابنها الصغير يعقوب، 16وغطت ايديه ورقبته بفروة من شعر الغنم. 17وبعدين عطت ليعقوب العيش والأكل اللي جهزته. 18فدخل يعقوب على أبوه وناداه: «يا أبي»، فرد النبي إسحاق: «نعم يا ابني، أنت مين من ولادي؟» 19فقال له يعقوب: «أنا عيسو ابنك البكر، وأنا عملت زي ما أمرتني، قوم وأقعد علشان تاكل من صيد ايدي وبعدين تدعي لي بالبركة». 20فقال له النبي إسحاق: «إزاي لقيت صيد بالسرعة دي يا ابني؟»، فرد عليه يعقوب: «ربنا أكرمني وسهل لي الصيد». 21فقال له النبي إسحاق: «قرب يا ابني وخليني ألمسك، علشان اتأكد لو كنت أنت ابني عيسو فعلاً». 22فقرب يعقوب من أبوه، فلمسه النبي إسحاق وبعدين قال: «الصوت صوت يعقوب، لكن الأيدين ايدين عيسو». 23فمقدرش النبي إسحاق يتعرف عليه، لأن ايديه كانت متغطية بالشعر زي ايدين عيسو أخوه، وأفتكر أنه ابنه البكري واستعد علشان يدعي له بالبركة. 24وبعدين سأله وقال له: «هو أنت فعلاً عيسو ابني؟». فرد عليه يعقوب: «ايوه أنا هو فعلاً». 25فقال له النبي إسحاق: «طيب يا ابني قدم لي من صيد ايدك علشان أكل وأدعي لك بالبركة». فقرب له يعقوب الأكل، فأكل النبي إسحاق وشرب. 26وبعدين قال النبي إسحاق: «قرب مني يا ابني علشان احضنك». 27فقرَب منه يعقوب وحضنه ، فشم النبي إسحاق ريحة هدوم عيسو اللي كان لابسها يعقوب، فدعا له بالبركة وقال:

«هي دي ريحة ابني،

زي ريحة بستان باركه ربي.

28ربي ينزل عليك فيض من ندَى السماء،

ويجعل الخير في طرح أرضك.

ويكفي قوتك بالزيادة من القمح والعنب،

29وتكون الناس كلها لك خدم.

وتنحني وتخضع لك كل الأمم.

وتكون سيد على أخواتك،

ويركع أبناء أمك قدامك.

اللي يدعى لك بالبركة ربنا يباركه،

واللي يلعنك يكون من الملعونين!»

30وأول ما انتهى النبي إسحاق من دعوته، خرج يعقوب من خيمته، وساعتها كان عيسو لسه راجع ومعاه الصيد اللي طلبه أبوه منه. 31فجهز عيسو الأكل اللي بيحبه أبوه، ودخل على النبي إسحاق وقال له: «يا أبي ، اتفضل قوم علشان تأكل من صيد يدي، وبعدين تدعيلي بالبركة». 32فسأله النبي إسحاق: «وأنت تكون مين؟». فرد عليه عيسو: «أنا عيسو ابنك البكري». 33فتفاجأ النبي إسحاق وقال وهو بيرتجف: «امال يبقى مين ده اللي جاب لي الأكل اللي طلبته قبل منك، فأكلت من كل الأكل اللي جابه، ودعيت له بالبركة ، وبالفعل هو نال بركتي!» 34فلمّا سمع عيسو كلام أبوه صرخ بحسره وقال له: «وأنا يا أبويا! أدعي لي أنا كمان بالبركة». 35لكن النبي إسحاق رد عليه وقال له: «يا ابني، أخوك عمل حيلة وسرق بركتك». 36فقال عيسو: «هو مش اسمه يعقوب؟ وهو أسم علىَ مُسمَى فعلاً! احتال عليا وغشني مرتين. المرة الأولى ابتزني في حق بكوريتي، واهو دلوقت سرق مني بركتي كمان. فهل يا أبويا عندك بركة تانية لسه محتفظ بها علشاني؟» 37فقال له النبي إسحاق: «يا ابني، ده أنا كمان خليته سيد عليك وعلى كل إخواته، وكلم هتكونوا في خدمته، ودعيت له بزيادة المحاصيل ومن كل اللي يحتاجه. فأيه اللي تبقىَ علشان اعمله علشانك؟». 38فقال عيسو لأبوه: «وهو أنت عندك بركة واحدة فقط يا أبي؟ باركني أنا كمان يا أبويا!». وبكَى عيسو بحسرة. 39فقال أبوه إسحاق: «سكنك يا ابنى هيكون بعيد عن الأرض الخصبة ، ومفيش قطرة ندَى تنزل من السما على أرضك. 40هتعيش حياتك بسيفك، وتكون عبد لأخوك،

لكن لما تقرر أنك تتحرر، تكسر قيده وتبقَى حر».

يعقوب يهرب من أخوه عيسو

41فغضب عيسو وحقد على يعقوب لأنه سرق بركة أبوه اللي كانت له هو. ففكر عيسو في نفسه وقال: «بعد أبويا ما يموت، أنا هاقتل يعقوب». 42ولما عرفت رفقة باللي عايز يعمله ابنها الكبير عيسو، بعتت وجابت ابنها الصغير يعقوب عندها وقالت له: «يا ابني، أخوك عيسو بيخطط علشان يقتلك. 43فاسمعني كويس وأعمل زي ما هاقول لك، يلا امشي من هنا دلوقت وروح عند أخويا لابان في حاران، في أرض ما بين النهرين. 44وخليك عنده فترة، لحد ما يهدأ غضب أخوك من ناحيتك. 45وينسى اللي عملته معاه، ساعتها هبعتلك علشان ترجع هنا. يلا، ليه أفقد ولادي الاتنين في يوم واحد؟»

46وحصل بعدها أن رفقة قالت للنبي إسحاق: «بنات الحثيين اللي اتجوزهم ابنك عيسو خلوا حياتي جحيم، فلو يعقوب هو كمان اتجوز واحدة من بنات الأرض دي الوثنيين، فالموت أحسن لي من حياتي معاهم».

Currently Selected:

قصة الأنبياء 27: EAT

Highlight

Compare

Copy