Na̱ Ruu̱t 2
2
Bi̱ tsꞌén katsꞌénxá na̱ Ruu̱t ngi̱jin tꞌanangii̱ Boo̱
1Kó ki̱a̱ na̱xi̱ńdáꞌniú Belee̱n, kisꞌijña ngo nda̱ xi xkjín kamá ndie xi̱ꞌii̱n na̱ Noemii̱, ngo nda̱ xi achichí cho̱n kamá, xi chji̱a̱ni xota̱ ndiꞌaa̱ ndie Elimelee̱k, Boo̱ kiꞌmí kui nda̱a̱. 2Kó na̱ Ruu̱t, na̱ xi chji̱a̱ni nangi Moaa̱b, bi̱ katsoó na̱ Noemii̱:
—ꞌNiú míꞌaá nga ko̱e̱ꞌéndièní nga kjuín án nínga jno̱o̱, kó kjuínkjáꞌaꞌyá an ńtiín sebanda̱, ki̱a̱ kjuín án nga̱xto̱n xota̱ xi ndyi̱tsꞌènxaá xi nda sa̱sieén an.
Kó na̱ Noemii̱, bi̱ katsoó:
—Tꞌen ji chjo̱ón.
3Kósꞌe̱ na̱ Ruu̱t kijí ngo kꞌijñá nínga tjitjíe̱ sebandaa̱, kó ítsꞌi̱yanii̱ nga jaꞌátikó ńtín xí ixóngií xota̱ xi ndyi̱tsꞌènxaá. Kó kui kꞌijñaá tsi̱ꞌe̱ Boo̱ boá, kui nda̱ xi xkjín kamá ndie Elimelee̱k.
4Kó Boo̱ na̱xi̱ńdáꞌniú Belee̱n kjindibáni, sꞌe̱ jachókatsijee̱n kui já xí ndyi̱tsꞌènxaá, kó bi̱ katsoó:
—¡Tindejnú, Néná ngatꞌíjñajo̱jnú ngayejejnú!
Kó kui jaá, bi̱ katsó:
—¡Néná ngatsꞌénchíkonñeé ji!
5Kósꞌe̱ Boo̱, bi̱ katsoó moso̱ xi tikóntjoón já xí ndyi̱tsꞌènxaá:
—ꞌYá xota̱ chji̱a̱ni kui na̱ xo̱ngo̱ò.
6Kó bi̱ katsó kui moso̱ xi tikóntjoón já xí ndyi̱tsꞌènxaá:
—Kuí boá kui na̱ xi chji̱a̱ni nangii̱ xota̱ Moaa̱b, kui xi nijan jeꞌejo̱ na̱ Noemii̱, nga kjindibáni tꞌanangii̱ nangi Moaa̱b. 7Kó bi̱ katsóna: Te̱ꞌéndièní nga kjo̱a̱ꞌáꞌyá an ńtín xí bixóngií xota̱ xi ndyi̱tsꞌènxaá. Kó bo̱a̱ tsꞌén nga jeꞌe kꞌi̱e̱e̱, kó ndeskande koó ngoye ta̱jñó tjitsꞌénxá, kó sꞌe̱ tsí chií tjítsꞌénkjaꞌyá ngotjón ki̱a̱ ndiꞌaa̱.
8Kósꞌe̱ Boo̱, bi̱ katsoó na̱ Ruu̱t:
—Ji tsa̱kjìn, nda nda má ndaꞌyé ji ni xi xiaán: Ngata̱ xínjín ngi̱ndie ꞌmi chjeꞌéꞌyé ji ńtín, ta̱sá kꞌi̱e̱ ti̱ndyinra ji kꞌi̱e̱e̱, kó ki̱a̱ nijan ti̱ꞌinxéje̱ ji ínchjín moso̱na. 9Nda má tsitsíjìi̱n nínga ndyi̱tsꞌènxá, kó ki̱a̱ ti̱ńtje̱tji̱ngìi̱. Jè bo̱a̱ kixiáa̱n moso̱na nga sa̱ꞌínxtíjiín. Kó kjiꞌanga ka̱ma xíndaá, ki̱a̱ tꞌi̱ ji ndáfoa nínga síndo ti̱jì ndáfoa xi je íkitsie moso̱na.
10Kósꞌe̱ na̱ Ruu̱t, ni̱ma̱kjo̱a̱ íjñá yojoo̱, kó asiéntikoó ngaskande nga kisitꞌaa̱ xtjien tꞌanangii̱, kó bi̱ katsoó Boo̱:
—Ánní nga bo̱a̱ má ta̱ nda niꞌínje̱ní. Ánní nga nda̱ maa̱ an, nga ye ji nga jmí tsi kui nangii̱ chjiá an.
11Kó Boo̱, bi̱ katsoó:
—Jè kiꞌmíyà cha̱n cha̱nna ngayeje ni xi kiniꞌín ji nganda tsi̱ꞌe̱ ṉchiꞌyáa̱, ngije ja̱bo̱a̱ je kꞌien xi̱ꞌíi̱n. Kó ti̱ jè be an nga ikꞌíndemasin ji xi na̱ꞌmíi̱ ko̱jo na̱áa̱n, ko̱jo nangi nínga katsen ji, tsi̱ꞌe̱ nga kꞌi̱e̱ kjindibé ji ngo nangi xi nde kji̱e̱ yejín ji. 12Néná ngatꞌíchjií ngayeje ni nda xi kiniꞌín ji, kó nda ngatsꞌénjoo̱ kui Néná xí tsi̱ꞌe̱ na̱xi̱ńdá Israee̱l, Kui xi timindyisé ji tsi̱ꞌe̱ nga skoón.
13Kósꞌe̱ na̱ Ruu̱t, bi̱ katsoó Boo̱:
—¡Mejénna nga nda kꞌo̱kaa̱ an, ji ndi̱a̱ xi tsa̱ꞌa̱n! Ngatꞌa̱ kiniꞌíndajìnní, kó tsjá kamaá ini̱ma̱na ni xi kase ji, ndatsi jmí tsi na̱ moso̱ tse̱ ma an.
14Nga jachó chi̱bo̱a̱a̱ nga chinie nichiniee̱, Boo̱, bi̱ katsoó na̱ Ruu̱t:
—Kꞌi̱e̱, ja̱bíboeꞌéꞌi̱n, kó chi̱ni̱ ji pan, ko̱jo ti̱ꞌinkꞌandyi̱ ji nichiniée̱ kꞌi̱e̱ ngi̱jii̱n kui ndáxtii̱.
Kósꞌe̱ na̱ Ruu̱t ki̱a̱ kisꞌijña nga iskjinie nichinie, nínga síndo ngayeje já xí tsꞌénxaá. Kó Boo̱ katsjaá to xi kamátsjó, kó iskjinie ngaskande nga kitsie cha̱n cha̱a̱n, kó ngaskande tsꞌangii̱ nichinie.
15Ngije kijíkjaꞌaꞌyá nginí ńtín na̱ Ruu̱t, Boo̱, bi̱ katsoó já xí ndyi̱tsꞌènxaá:
—Ngaskande ki̱a̱ nínga síndo chꞌo̱ ńtín xi tjíꞌniuú sebandaa̱, ka̱ma ki̱a̱ ngatjaꞌáꞌyá ńtín na̱ Ruu̱t nga, kó ngata̱ jmí ni ꞌmíjínjnúu̱. 16Ngaskande ka̱ma xá ko̱ti̱tsojo chiboajnúu̱ ńtín, tsi̱ꞌe̱ nga kjo̱a̱ꞌáꞌyá, kó ngata̱ niꞌánxtíjínjnúu̱.
17Kó bo̱a̱ tsꞌén kui naa̱, jaꞌátikó ńtín kuí jno̱o̱ ngaskande nga kamángixoón, sꞌe̱ iñá kui ńtiín sebanda̱ xi jaꞌátikoó, kó tsꞌatiora̱ kan kilo̱ kamá kui too̱. 18Iskjíbé kuí sebandaa̱, sꞌe̱ kijí nginí na̱xi̱ńdáꞌniú Belee̱n, kó akoó ṉchiꞌyaá ngayeje kui to xi jaꞌátikoó. Kó ti̱ katsjaá na̱ Noemii̱ nichinie xi tsꞌangii̱ nga. Kósꞌe̱ na̱ Noemii̱, bi̱ katsó nga asíyaá:
19—Ñá kiniꞌínxé jí ngotꞌe̱. Kótsꞌèn kamánii̱ nga bo̱a̱ kjiꞌi sebanda̱ katjaꞌátikoó. ¡Néná ngatsꞌénchíkonñé kui xota̱ askotsijeen ji!
Kó na̱ Ruu̱t katsóyaà ṉchiꞌyaá, ꞌyá tsi̱ꞌe̱ tꞌanangi nínga katsꞌénxá, kó bi̱ katsó ngasee̱: Boo̱ ꞌmí kui xota̱ xi tsi̱ꞌe̱ tꞌanangi nínga katsꞌenxá án. 20Kósꞌe̱ na̱ Noemii̱, bi̱ katsoó kja̱ndaa̱:
—¡Néná ngatsꞌénchíkonñé kui xotaa̱! Ngatꞌa̱ Néná achichí kjo̱a̱ni̱ma̱takón tjiín kjo̱a̱a̱ xota̱ xi síndoo̱, ko̱jo kjo̱a̱a̱ xota̱ xi je jesoón nga.
Kó na̱ Noemii̱, bi̱ katsó ngasee̱:
Kui xota̱ xi se ji, xota̱ xkjín ndie xi̱ꞌinna boá, kó tsó kjo̱a̱kiti xi tjínná, nga tjín xoò ngo kjo̱a̱ꞌniú nga kui xi ka̱ma kꞌo̱xiéꞌáná.
21Kósꞌe̱ na̱ Ruu̱t, na̱ xi chji̱a̱ni nangi Moaa̱b, bi̱ katsó ngase:
—Kui xotaa̱ jè bi̱ katsóna: Ki̱a̱ nijan ti̱ꞌinxéje̱ ji ínchjín mosoo̱, ngaskande nga kju̱i̱e̱ cha̱a̱n sebandaa̱.
22Kó na̱ Noemii̱, bi̱ katsoó kja̱ndaa̱:
—Achichí ndakjiꞌi kui nii̱ ji chjo̱ón, nga ki̱a̱ si̱ꞌinxéje̱ ji ínchjín mosoo̱ kui xotaa̱, tsi̱ꞌe̱ nga sa̱ꞌínxtíjiín xota̱ xi xín tꞌanangi ndyi̱tsꞌènxá.
23Kó bo̱a̱ tsꞌén nga na̱ Ruu̱t, ki̱a̱ nijan jaꞌátikórá ńtiín sebanda̱ ko̱jo ínchjín mosoo̱ Boo̱, ngaskande nga je cha̱a̱n sebandaa̱, ko̱jo cha̱a̱n to ndso̱ko̱a̱n ṉño̱paa̱n, ta̱nga ki̱a̱ kisꞌijñajo̱ra ṉchiꞌyaá.
Currently Selected:
Na̱ Ruu̱t 2: MAIX
Highlight
Share
Compare
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014